ភ្នំពេញ-បាងកក ៖ គ្រោះថ្នាក់សរសៃឈាមខួរក្បាល គឺជាប្រភេទជំងឺធ្ងន់ធ្ងរហើយអាចកើតឡើងភ្លាមៗ ដោយយើងមិនអាចដឹងមុនទេ ហើយជំងឺនេះអាចបណ្តាលឲ្យគ្រោះថ្នាក់ដល់អាយុជីវិត ឬក៏ពិការភាពអស់មួយជីវិត ។
លោកវេជ្ជបណ្ឌិត ច័ន្ទ វិជ្ជា ឯកទេសផ្នែកប្រសាទសាស្ត្រនៃមន្ទីរពេទ្យកាល់ម៉ែត មានប្រសាសន៍ប្រាប់សារព័ត៌មានកោះសន្តិភាពថា « ដើម្បីការពារ កុំឲ្យ មានបញ្ហាគ្រោះថ្នាក់សរសៃឈាមក្នុងខួរក្បាល យើងត្រូវចៀសឲ្យបានពីកត្តាដែលបង្កឲ្យមានជំងឺគ្រោះថ្នាក់សរសៃឈាមក្នុងខួរក្បាល ដូចជាជំងឺលើសឈាម គឺគាត់ត្រូវលេបថ្នាំឲ្យបានទៀងទាត់ ហូបបន្ថយប្រៃ ។ បើមានជំងឺទឹកនោមផ្អែម យើងត្រូវហូបតមអាហារណាដែលសំបូរជាតិស្ករ។ គាត់ត្រូវឧស្សាហ៍ហាត់ប្រាណឲ្យបានទៀងទាត់ កាត់បន្ថយការហូបអាហារណាដែលសំបូរជាតិខ្លាញ់ ហើយគាត់ត្រូវឈប់ជក់បារី ឈប់ពិសារស្រា ។ អ្នកជំងឺដែលមានបញ្ហាបេះដូងវិញ គឺគាត់ត្រូវឧស្សាហ៍មកតាមការណាត់ជាមួយនឹងគ្រូពេទ្យឲ្យបានញឹកញាប់ ដើម្បីតាមដានការប្រើប្រាស់ថ្នាំរបស់គាត់»។ លោកវេជ្ជបណ្ឌិត ឈីរ៉ាផាត់ អ៊ុកាឈុក ( Chirapat Ukachoke ) ដែលជាប្រធានផ្នែកប្រព័ន្ធប្រសាទ នៃមន្ទីរពេទ្យ Phyathai 3 Hospital មានប្រសាសន៍ថា ដើម្បីការពារកុំឲ្យកើតគ្រោះថ្នាក់សរសៃឈាមក្នុងខួរក្បាល គឺត្រូវធ្វើការត្រួតពិនិត្យសុខភាពឲ្យបានទៀងទាត់យ៉ាងហោចណាស់១ឆ្នាំម្តង ព្រោះបងប្អូនអាចដឹងអំពីជំងឺនានា មិនថាតែជំងឺគ្រោះថ្នាក់សរសៃឈាមក្នុងខួរក្បាល នៅដំណាក់ដំបូងៗដែលអាចទទួលការព្យាបាលបានជាសះស្បើយ ។លោក បន្ថែមទៀតថា៖ «ក្រៅពីការធ្វើការពិនិត្យប្រចាំឆ្នាំ ពួកគេគួរតែកែប្រែនូវសកម្មភាពរស់នៅ ដោយធ្វើការលំហាត់ប្រាណឱ្យបានទៀងទាត់ ដើម្បីគ្រប់គ្រងជំងឺទឹកនោមផ្អែម និងជៀសវាងរបបអាហារដែលបណ្តាលអោយមានសម្ពាធឈាម។ ដូច្នេះរបបអាហារមានសារសំខាន់ណាស់ ហើយរបៀបរស់នៅសំខាន់បំផុត គឺកុំពិសារបារី តែបើអ្នកធ្លាប់ពិសារបារី គឺត្រូវឈប់ជក់បារី កុំពិសារស្រា ជៀសវាងភាពតានតឹង ជាដើម» ៕
អត្ថបទនេះនាំជូនមកដោយក្រុមហ៊ុនធានារ៉ាប់រងជីវិត AIA
ចែករំលែកព័តមាននេះ