អ្នកម្នាងជាបេក្ខជនឈរឈ្មោះតំណាងរាស្ត្រមណ្ឌលខេត្តព្រៃវែង អ្នកម្នាង អ៊ុក ផល្លា ត្រូវបាន គ.ជ.បទទួលស្គាល់ជាបេក្ខជនឈរឈ្មោះជាអ្នកតំណាងរាស្ត្រលំដាប់លេខរៀងលេខ១ នៅមណ្ឌលខេត្តព្រៃវែងជាមួយបេក្ខជន១០រូបផ្សេងទៀត ។ យោងតាមការប្រកាសបេក្ខជនរបស់ គ.ជ.ប…
អ្នកម្នាងជាបេក្ខជនឈរឈ្មោះតំណាងរាស្ត្រមណ្ឌលខេត្តព្រៃវែង អ្នកម្នាង អ៊ុក ផល្លា ត្រូវបាន គ.ជ.បទទួលស្គាល់ជាបេក្ខជនឈរឈ្មោះជាអ្នកតំណាងរាស្ត្រលំដាប់លេខរៀងលេខ១ នៅមណ្ឌលខេត្តព្រៃវែងជាមួយបេក្ខជន១០រូបផ្សេងទៀត ។ យោងតាមការប្រកាសបេក្ខជនរបស់ គ.ជ.ប បានបង្ហាញថា អ្នកម្នាងកើតនៅថ្ងៃទី២៧ កក្កដា ១៩៧៩ ។ អ្នកម្នាង អ៊ុក ផល្លា ជាអតីតនាដកាអប្សរាល្បីឈ្មោះអ្នកម្នាង អ៊ុក ផល្លា គឺជានាដកាអប្សរាដ៏ល្បីល្បាញមួយរូបនៅកម្ពុជា ដែលមហាជនខ្មែរនាអំឡុងទសវត្សឆ្នាំ១៩៩០បានស្គាល់។
ជាមួយនឹងចំណង់ចំណូលចិត្តលើវិស័យសិល្បៈបុរាណខ្មែរ កុមារី អ៊ុក ផល្លា បានចូលហ្វឹកហាត់របាំបុរាណខ្មែរតាំងពីអាយុ៩ឆ្នាំ រហូតបានក្លាយជាសិស្សដ៏គាប់ព្រះទ័យម្នាក់របស់សម្តេចរាជបុត្រីព្រះរៀមនរោត្តម បុប្ផាទេវី ទេពនាថវដ្តីឯក ។ ជាមួយនឹងការពុះពារតស៊ូគួបផ្សំនឹងទេពកោសល្យដ៏ជំនាញរួមទាំងរូបឆោមដ៏ស្រស់សោភាផងនោះ កញ្ញា អ៊ុក ផល្លា បានក្លាយជាតួឯករបាំអប្សរា ដ៏ល្បីល្បាញប្រចាំប្រទេសកម្ពុជាពិសេស ក្នុងអំឡុងទសវត្សឆ្នាំ១៩៩០ ។ ដោយរូបភាពរបស់នាងត្រូវបានផ្សព្វផ្សាយនៅលើបណ្តាញព័ត៌មាននានា ក្នុងនាមជានាដការបាំបុរាណដ៏លេចធ្លោនៅក្នុងប្រទេស ជាពិសេសរូបនាងក៏បានចូលរួមចំណែកក្នុងការបង្អួតពីរបាំបុរាណ ក៏ដូចជាសិល្បៈវប្បធម៌ខ្មែរទៅកាន់មជ្ឈដ្ឋានអន្តរជាតិ ។ តាមរយៈការបង្ហាញខ្លួនដ៏ល្វតល្វន់នៅលើឆាកតូចធំនានា ប្រកបដោយភាពស្រស់ស្អាត ថ្លៃថ្នូរ និងទេពកោល្យ ។ ក្រោយមករូបនាងបានចាកឆ្ងាយពីជីវិតជានាដកាបន្តិចម្តងៗ បន្ទាប់ពីបានចាប់ផ្តើមជីវិតអាពាហ៍ពិពាហ៍កាលនោះ ជាមួយនឹងសា្វមីដែលជាមន្ត្រីធំមួយរូបគឺលោក វ៉េង សិរីវុឌ្ឍ ។
យ៉ាងណាក៏ដោយ ជីវិតអាពាហ៍ពិពាហ៍នេះ មានរយៈពេលមិនយូរប៉ុន្មានឡើយ ក៏បានបែកបាក់គ្នាទៅ ខណៈដែលក្រោយមកទៀតលោកស្រី អ៊ុក ផល្លា ត្រូវបានសម្តេចក្រុមព្រះនរោត្តមរណឫទ្ធិ សព្វព្រះទ័យឱ្យដើរតួក្នុងខ្សែភាពយន្តព្រះអង្គរឿងរាជបូរី ហើយក៏បានក្លាយជាស្នេហា សាងជីវិតគ្រួសារជាមួយគ្នារហូតដល់បច្ចុប្បន្ន និងត្រូវបានគេស្គាល់ថាជាអ្នកម្នាងនរោត្តម ផល្លា រណឫទ្ធិ ។
ក្នុងជីវិតជាគ្រួសាររាជវង្ស អ្នកម្នាងទទួលបានបុត្រា២អង្គ គឺទ្រង់នរោត្តម សុធាឫទ្ធិ និងទ្រង់នរោត្តម រ៉ាណាវង្សដែលមានព្រះជន្មមិនទាន់បាន១០វស្សានៅឡើយ ។ មានប្រភពខ្លះៗបានបង្ហាញពីជីវប្រវត្តិអ្នកម្នាងមានឪពុកឈ្មោះ អ៊ុក ខាន់និងម្តាយឈ្មោះ សុខ ស៊ីណាត មានបងប្អូន៨នាក់ ៕
ចែករំលែកព័តមាននេះ