ខេត្តបាត់ដំបង ៖ លោកហង្ស ផល្លីមធុរ៉ាជាតារាភាពយន្ត បានលាចាកពីពិភពសិល្បៈច្រើនឆ្នាំកន្លងមកហើយ បន្ទាប់ពីលោករៀបការជាមួយអាណិកជន និងក្លាយជាថៅកែរោងម៉ាស៊ីនកិនស្រូវនៅខេត្តបាត់ដំបងក្នុងភាពស្តុកស្តុម្ភ ។
តើបច្ចុប្បន្នតារាសម្តែងដែលមានរហស្សនាម «ស្តេចអាប៉ោង» រូបនេះកំពុងរស់នៅប្រកបដោយសុភមង្គលមែនទេ ? មិនមែនទេ
ខេត្តបាត់ដំបង ៖ លោកហង្ស ផល្លីមធុរ៉ាជាតារាភាពយន្ត បានលាចាកពីពិភពសិល្បៈច្រើនឆ្នាំកន្លងមកហើយ បន្ទាប់ពីលោករៀបការជាមួយអាណិកជន និងក្លាយជាថៅកែរោងម៉ាស៊ីនកិនស្រូវនៅខេត្តបាត់ដំបងក្នុងភាពស្តុកស្តុម្ភ ។
តើបច្ចុប្បន្នតារាសម្តែងដែលមានរហស្សនាម «ស្តេចអាប៉ោង» រូបនេះកំពុងរស់នៅប្រកបដោយសុភមង្គលមែនទេ ? មិនមែនទេ លោកកំពុងមានវិបត្តិក្នុងជីវិតផ្ទាល់ខ្លួន ដោយចំណងអាពាហ៍ពិពាហ៍ត្រូវដាច់ដោយ និងជំពាក់ជំពិនរឿងក្តីបែងចែកទ្រព្យសម្បត្តិទៀតផង ។ថ្មីៗនេះលោកហង្ស ផល្លីមធុរ៉ា បានបង្ហាញឯកសារមួយចំនួនដែលជារឿងផ្ទៃក្នុងគ្រួសាររបស់លោក ដោយលោកអះអាងថា ទទួលបានភាពអយុត្តិធម៌ក្នុងការបែងចែកទ្រព្យសម្បត្តិ ។ ភាគីខាងប្រពន្ធ និងម្តាយ ឪពុកក្មេករបស់លោកបានចំណាយលុយអស់រាប់ម៉ឺនដុល្លារសម្រាប់ដំណើរការក្តីយកឈ្នះចិត្តបំបាក់ស្មារតីលោក និងប្រមូលទ្រព្យសម្បត្តិរួម ដែលលោកបានដាក់ទុនរួមគ្នាកាន់កាប់ស្របច្បាប់ មានអាជ្ញាធរភូមិឃុំ ស្រុកដឹងឮ និងទទួលស្គាល់រាប់ឆ្នាំមកហើយ។
លោកមធុរ៉ា បានបង្ហាញពាក្យបណ្តឹងពីរគឺ មួយរឿងសុំលែងលះគ្នាជាប្តីប្រពន្ធ និងមួយទៀតរឿងបែងចែកទ្រព្យសម្បត្តិដែលមានដីស្រែចម្ការជាង១០ហិកតា រោងម៉ាស៊ីនកិនស្រូវ ផ្ទះថ្មកម្ពស់៣ជាន់ រថយន្ត និងម៉ូតូដែលជាមធ្យោបាយបម្រើការងារពេលកំពុងតែរកស៊ីរួមគ្នានោះ។ មុនឆ្នាំ២០០០ លោកហង្ស ផល្លីមធុរ៉ា ជាតារាសម្តែងភាពយន្ត និងរស់នៅភ្នំពេញ ។ អំឡុងពេលនោះ លោកសន្សំបានលុយទិញរថយន្តជិះតាមបែបទាន់សម័យ ។ លោកបានរៀបការជាមួយនាង ហ៊ួន សាមេនតា ដែលរស់នៅសហរដ្ឋអាមេរិកជាមួយឪពុកម្តាយ និងមានកូនស្រីមួយឈ្មោះ ផល្លី ប្រីតនី កើតក្នុងឆ្នាំ២០០៣ ។
ក្រោយពេលរៀបការរួចមក លោកមធុរ៉ា បានបោះបង់ការងារសម្តែង ហើយប្រមូលលុយដាក់ទុនរួមជាមួយឪពុកម្តាយក្មេកបង្កើតរោងម៉ាស៊ីនកិនស្រូវនៅភូមិគោកខ្ពស់ ឃុំរូងជ្រៃ ស្រុកថ្មគោល ខេត្តបាត់ដំបង និងពង្រីកដីស្រែចម្ការបានជាច្រើនកន្លែង ដោយមានរូបលោកជាអ្នកគ្រប់គ្រងដឹកនាំការរកស៊ីដោយផ្ទាល់ ។ច្រើនឆ្នាំក្រោយមក ការរកស៊ីមានការរីកចម្រើន ដូច្នេះហើយមានការច្រណែនពីម្តាយក្មេកចំពោះរូបលោក ។ ដូច្នេះហើយធ្វើឱ្យមានភាពរកាំរកូសកើតឡើងពីមួយថ្ងៃទៅមួយថ្ងៃ ហើយរីករាលដាលធំឡើងៗរហូតប្តឹងគ្នាបែងចែកទ្រព្យសម្បត្តិ ។
អតីតតារាសម្តែងរូបនេះបញ្ជាក់អំពីបញ្ហារកស៊ីដាក់ទុនរួមគ្នានេះ ទោះបីលោកមានទុនតិចជាងក៏ពិតមែន តែជំហរការងារដឹកនាំគ្រប់គ្រង គឺនៅលើើលោកទាំងស្រុង ។ក្រៅពីការងារផ្ទាល់ខ្លួន លោកហង្ស ផល្លីមធុរ៉ា មានចំណែកចូលរួមពង្រឹងក្រុមការងារគណបក្សប្រជាជនក្នុងឃុំរូងជ្រៃរហូតដល់មានស្នាដៃល្អទទួលបានគ្រឿងឥស្សរិយយសមុនីសារភណ្ឌពីសម្តេចតេជោ ហ៊ុន សែន កាលពីឆ្នាំ២០០៨ និងមានប្រជាពលរដ្ឋជាច្រើនគាំទ្រស្រឡាញ់រាប់អាន និងទុកចិត្តចំពោះលោក ។
លោកហង្ស ផល្លីមធុរ៉ា ចាត់ទុកថា ភាគីខាងប្រពន្ធ និងឪពុកម្តាយក្មេកលោកចំណាយលុយរាប់ម៉ឺនដុល្លារដើម្បីយកឈ្នះលោកតាមរយៈតុលាការ និងបំបាក់ស្មារតីលោក ។ ក្នុងរឿងក្តីនេះ លោកពុំបានទទួលការបែងចែកទ្រព្យសម្បត្តិសមរម្យដែលអាចទទួលយកបានឡើយ។ ដូច្នេះហើយលោកចាត់ទុកខ្លួនឯងថាទទួលភាពអយុតិ្តធម៌ពីការកាត់ក្តីនេះ ។លោកហង្ស ផល្លីមធុរ៉ា មានប្រភពកំណើតនៅស្រុកបាទី ខេត្តតាកែវ បានកសាងកេរ្តិ៍ឈ្មោះខ្ពស់ត្រដែតក្នុងពិភពសិល្បៈភាពយន្ត ។ លោកធ្លាប់បានសម្តែងក្នុងខ្សែភាពយន្តជាច្រើនរឿង និងចម្រៀងកាយវិការខារ៉ាអូខេជាច្រើនបទផងដែរ ។
ក្នុងជីវិតជាតារាសម្តែងនេះ មហាជនដាក់រហស្សនាមឱ្យលោកហង្ស ផល្លីមធុរ៉ា ថាជា «ស្តេចអាប៉ោង» តាមរយៈការសម្តែងជាតួអង្គងប់នឹងល្បែងអាប៉ោងក្នុងខ្សែភាពយន្តរឿង «ជើងមេឃដាច់ស្រយាល» ។បាត់មុខស្ងប់ស្ងាត់ក្នុងពិភពសិល្បៈ តែពេលនេះលោកហង្ស ផល្លីមធុរ៉ា អណ្តែតឡើងក្នុងពិភពវិបត្តិនៃជីវិតផ្ទាល់ខ្លួន ៕
ចែករំលែកព័តមាននេះ