រាជធានីភ្នំពេញ ៖ បុរសវ័យចំណាស់ម្នាក់បើកបររថយន្តមួយគ្រឿងងងុយគេងងោកមួយភាំងក៏រ៉េចង្កូតបញ្ច្រាសទៅបុករថយន្តមួយគ្រឿងទៀតដែលកំពុងឈប់រង់ចាំស្តុបចំពីមុខពេញទំហឹង បណ្តាលឲ្យរងការខូចខាតទាំងសងខាង ហេតុការណ៍នេះបង្កឲ្យមានការភ្ញាក់ផ្អើលឡើងកាលពីវេលាម៉ោង៦និង៥០នាទីយប់ ថ្ងៃទី១៤ ខែមិថុនា ឆ្នាំ២០១៨ ត្រង់ចំណុចស្តុបទេពផន តាមបណ្ដោយម៉ៅសេទុង…
រាជធានីភ្នំពេញ ៖ បុរសវ័យចំណាស់ម្នាក់បើកបររថយន្តមួយគ្រឿងងងុយគេងងោកមួយភាំងក៏រ៉េចង្កូតបញ្ច្រាសទៅបុករថយន្តមួយគ្រឿងទៀតដែលកំពុងឈប់រង់ចាំស្តុបចំពីមុខពេញទំហឹង
បណ្តាលឲ្យរងការខូចខាតទាំងសងខាង ហេតុការណ៍នេះបង្កឲ្យមានការភ្ញាក់ផ្អើលឡើងកាលពីវេលាម៉ោង៦និង៥០នាទីយប់ ថ្ងៃទី១៤ ខែមិថុនា ឆ្នាំ២០១៨ ត្រង់ចំណុចស្តុបទេពផន តាមបណ្ដោយម៉ៅសេទុង ស្ថិតក្នុងសង្កាត់ផ្សារដេប៉ូទី១ ខណ្ឌទួលគោក ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញបុរសម្នាក់បើកបររថយន្តមួយគ្រឿងម៉ាក ឡិចស៊ីស LX-470 ពណ៌ស្ករ ពាក់ស្លាកលេខ ភ្នំពេញ ២J-៩២២៩ ធ្វើដំណើរតាមបណ្ដោយមហាវិថីម៉ៅសេទុងក្នុងទិសដៅពីត្បូងទៅជើង ។ លុះមកដល់ចំណុចកើតហេតុរថយន្តខាងលើក៏បានឈប់រង់ចាំស្តុបដើម្បីបត់ឆ្វេងទៅផ្លូវ១៨២ ខណៈពេលនេះស្រាប់តែមានរថយន្តមួយគ្រឿងទៀតម៉ាកកាមរីបាឡែន ពណ៌ស ពាក់ស្លាកលេខ ភ្នំពេញ ២W-៩២៧៥ បើកបរដោយបុរសវ័យចំណាស់ម្នាក់ក្នុងទិសដៅបញ្ច្រាសទិសគ្នា និងក្នុងល្បឿនយ៉ាងលឿនរួចក៏រ៉េចង្កូតទៅខាងឆ្វេងបញ្ច្រាសទៅបុករថយន្តដែលកំពុងឈប់រង់ចាំស្តុបខាងលើចំពីមុខពេញទំហឹងបណ្តាលឲ្យរថយន្តទាំងពីរគ្រឿងរងការខូចខាតផ្នែកខាងមុខយ៉ាងដំណំ តែមិនបង្កឲ្យមានអ្នករងរបួសទេ ។
បើតាមប្រភពពីបុរសវ័យចំណាស់ដែលជាអ្នកបើកបររថយន្តបង្កខាងលើបានប្រាប់ឲ្យដឹងថាគាត់ទើបតែបើករថយន្តចេញមកពីផ្ទះកូនរបស់គាត់នៅឯខេត្តសៀមរាបលុះពេលបើកមកដល់ចំណុចកើតហេតុដោយសារតែគាត់អស់កម្លាំងខ្លាំងពេកហើយក៏ងោកមួយភាំងក៏រ៉េចង្កូតទៅបុករថយន្តដែលកំពុងឈប់រង់ចាំស្តុបខាងលើតែម្ដងទៅ ។
ក្រោយពេលកើតហេតុដោយភាគីទាំងសងខាងមិនអាចធ្វើការដោះស្រាយគ្នាដើម្បីបញ្ចប់រឿងនៅកន្លែងកើតហេតុបានក៏ត្រូវសមត្ថកិច្ចជំនាញធ្វើការវាស់វែងយករក្សាទុកនៅអធិការដ្ឋាននគរបាលខណ្ឌទួលគោកដើម្បីរង់ចាំធ្វើការដោះស្រាយគ្នាទៅតាមផ្លូវច្បាប់នៅពេលក្រោយ ៕
ចែករំលែកព័តមាននេះ