ព្រហ្មដោយសន្មតបានដល់មាតាបិតា ឧបជ្ឈាយ៍ អាចារ្យ និងមេដឹកនាំ ចៅហ្វាយនាយ រហូតដល់លោកអ្នកមាននាទីគ្រប់គ្រងមនុស្សលោកទាំងមូល។ ព្រហ្មទាំងនេះរមែងមានចិត្តប្រកបដោយធម៌៤យា៉ងជាប់ក្នុងសន្តានជានិច្ច ទើបបាននាមថាព្រហ្មវិហារធម៌ គឺ ៖…
ព្រហ្មដោយសន្មតបានដល់មាតាបិតា ឧបជ្ឈាយ៍ អាចារ្យ និងមេដឹកនាំ ចៅហ្វាយនាយ រហូតដល់លោកអ្នកមាននាទីគ្រប់គ្រងមនុស្សលោកទាំងមូល។ ព្រហ្មទាំងនេះរមែងមានចិត្តប្រកបដោយធម៌៤យា៉ងជាប់ក្នុងសន្តានជានិច្ច ទើបបាននាមថាព្រហ្មវិហារធម៌ គឺ ៖
១-មេត្តា តាមអត្ថបានដល់សេចក្តីប្រាថ្នាឱ្យអ្នកដទៃបានសុខបានចម្រើន ។ ន័យមួយទៀត ។ មេត្តាចំពោះបុគ្គល ចំពោះគណៈ ដូចជាមាតាបិតា ឬគ្រូអាចារ្យរាប់អានស្រឡាញ់ចំពោះតែបុគ្គល ឬមនុស្សរបស់ខ្លួន សិស្សរបស់ខ្លួន មេត្តាបែបនេះលោកឲ្យឈ្មោះថាជាឧទ្ទិសមេត្តា ជាមេត្តាក្នុងព្រហ្មវិហារធម៌នេះ ។
២-ករុណា សេចក្តីអាណិតអាសូរគិតជួយឱ្យគេរួចចាកទុក្ខទាំងពួង ករុណាចំពោះបុគ្គលជាករុណារបស់អ្នកធំក្នុងព្រហ្មវិហារធម៌នេះ ។ ករុណានេះបើមាននៅក្នុងសន្តានចិត្តមនុស្សគ្រប់រូបនៅក្នុងលោកនេះប្រាកដជាមិនបង្កឲ្យស្រុកទេសកើតកលយុគទេ សុខសន្តិភាពនឹងកើតមានពេញបរិបូណ៌ ។
៣-មុទិតា ដំណើរមានចិត្តរីករាយទៅរកសេចក្តីសុខរបស់អ្នកដទៃមិនរើសមុខ គឺដំណើរដែលដឹងថាអ្នកដទៃតាមតែអ្នកណាក៏ដោយ គេមានទ្រព្យធនបុណ្យស័ក្តិបានប្រកបដោយសេចក្តីសុខចម្រើនក៏មានចិត្តជួយអរគេ មិនច្រណែននិន្ទាឈ្នានីសចង់ឲ្យគេវិនាសសោះឡើយ ។ មុទិតានេះជាធម៌យា៉ងសំខាន់មួយសម្រាប់មនុស្សគ្រប់រូបគួរមាននៅក្នុងសន្តាន ។
៤-ឧបេក្ខា បានដល់សេចក្តីព្រងើយកន្តើយ តាំងចិត្តជាកណ្តាលមិនលម្អៀងទៅខាងណា មិនសោមនស្ស មិនទោសមនស្សក្នុងវេលាដែលគេបានសុខចម្រើន ឬជួបវិបត្តិក្នុងសង្គមគ្រួសារ ក៏មិនមានចិត្តពុះកញ្ជ្រោលទៅតាមអារម្មណ៍ ជាចិត្តនឹងដូចភ្នំទោះជាព្យុះភ្លៀងបុកសន្ធប់យា៉ងណាក៏មិនកម្រើកញាប់ញ័រ ។
ព្រោះហេតុដូច្នោះហើយធម៌៤យ៉ាងនេះទើបបាននាមថា «ព្រហ្មវិហារ» ជាធម៌សម្រាប់អ្នកធំ ឬធម៌របស់ព្រះព្រហ្មសង្គ្រោះចំពោះមនុស្សសត្វទូទៅមិនចំពោះ ។
ចែករំលែកព័តមាននេះ