ខេត្តមណ្ឌលគិរី ៖ បុរសម្នាក់ដែលរងនូវអំពើហិង្សាក្នុងវង់ផឹកស៊ី កាលពីព្រឹកថ្ងៃទី១១ មិថុនា ២០១៨ បានស្លាប់ ក្រោយបញ្ជូនទៅដល់មន្ទីរពេទ្យស្រុកស្នូល ខេត្តក្រចេះ ព្រោះតែស្ថានភាពរបួសធ្ងន់ធ្ងរមិនអាចជួយសង្គ្រោះទាន់ពេល ។ លោកស៊ុន ប៊ុនធឿន អធិការនគរបាលស្រុកកែវសីមាបានឲ្យដឹងថា ជនរងគ្រោះដែលត្រូវគូទំនាស់ចាក់មួយកាំបិតចំដើមទ្រូង បានស្លាប់ នៅវេលាម៉ោង៥ល្ងាចថ្ងៃទី១២ ក្រោយកើតហេតុប្រមាណជិត១០ម៉ោង ខណៈក្រុមគ្រួសារបានបញ្ជួនទៅសង្គ្រោះនៅមន្ទីរពេទ្យបង្អែកស្រុកស្នួល ។
លោកអធិការបន្តថា ក្រោយជនរងគ្រោះស្លាប់ជនដៃដល់ត្រូវបានសមត្ថកិច្ចកសាងសំណុំរឿងបញ្ជួនទៅសាលាដំបូងខេត្តក្រោមបទចោទប្រកាន់ មនុស្សឃាតដោយចេតនា ។ សូមរំឮកថា យុវជនម្នាក់ត្រូវបានសាច់ញាតិបញ្ជូនទៅសង្គ្រោះបន្ទាន់ ក្រោយផ្ទុះអំពើហិង្សាក្នុងវង់ផឹកស៊ីកាលពីវេលាម៉ោង៩និង៣០ នាទីថ្ងៃទី១១ ខែមិថុនា ឆ្នាំ២០១៨ នៅចំណុចផ្ទះឈ្មោះថុន ថៃ ក្នុងភូមិចក់ចារ ឃុំស្រែឈូក ស្រុកកែវសីមា ខេត្តមណ្ឌលគិរី ។
លោកវរសេនីយ៍ទោ ស៊ុន ប៊ុនធឿន អធិការនគរបាលស្រុកកែវសីមាបានឲ្យដឹងថា មានករណីអំពើហិង្សាដោយចេតនាយកកាំបិតចាក់គ្នាក្នុងពេលផឹកស្រា ។ លោកអធិការបន្តថា ជនរងគ្រោះឈ្មោះប៉ាវ សំណាង ភេទប្រុស អាយុ២៣ឆ្នាំ ជនជាតិខ្មែរ មុខរបរកសិករ មានស្រុកកំណើតភូមិក្ដុល ឃុំទង្លូង ស្រុកមេមត់ ខេត្តត្បូងឃ្មុំ ត្រូវ១កាំបិតលើដើមដោះខាងស្ដាំរបួសជាទម្ងន់ ត្រូវបានបងប្អូនសាច់ញ្ញាតិបញ្ជូនទៅសង្គ្រោះបន្ទាន់នៅមន្ទីរពេទ្យស្រុកស្នួល ខេត្តក្រចេះ ។ ជនបង្កឈ្មោះវ៉ាន់ ភាក់ណា ភេទប្រុស អាយុ៣១ឆ្នាំ ជនជាតិខ្មែរ មុខរបរកសិករ មានស្រុកកំណើត ភូមិខ្សាច់ទប់ ឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ ៕
ចែករំលែកព័តមាននេះ