រាជធានីភ្នំពេញ ៖ យុវជនម្នាក់ត្រូវបានកម្លាំងនគរបាលចរាចរណ៍ដែលប្រចាំការនៅចំណុចរង្វង់មូលថ្នល់បំបែកចោមចៅធ្វើការចាប់ខ្លួនប្រគល់ឲ្យនគរបាលប៉ុស្តិ៍ចោមចៅ៣ដើម្បីសាកសួរ បន្ទាប់ពីយុវជនម្នាក់នេះយកដុំថ្មគប់ទៅលើអ្នកបើកបររថយន្តម្នាក់ ប៉ុន្តែមិនត្រូវអ្នកបើកបររថយន្ត បែរជាដុំថ្មបានហោះទៅត្រូវកញ្ចក់រថយន្តខាងមុខបណ្ដាលឲ្យបែករងការខូចខាត ។ ដោយយុវជនរូបនេះបានចោទប្រកាន់ថា រថយន្តធុនធំ១គ្រឿងនោះបើកកៀរ ក្នុងខណៈពេលដែលខ្លួនកំពុងជិះកង់ ហើយខឹងខ្លាំងពេកទើបខ្លួនរើសដុំថ្មគប់ទៅលើអ្នកបើកបរតែខុស បែរជាត្រូវកញ្ចក់រថយន្តបែបនេះទៅវិញ។
ហេតុការណ៍នោះបានកើតឡើងកាលពីវេលាម៉ោង៨និង២០នាទីព្រឹកថ្ងៃទី៥ ខែមិថុនា ឆ្នាំ២០១៨ នៅតាមផ្លូវវេងស្រេង ត្រង់ចំណុចខាងត្បូងរង្វង់មូលថ្នល់បំបែកចោមចៅ មុខផ្សារចោមចៅ ស្ថិតនៅក្នុងភូមិព្រៃជីសាក់ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ។
យុវជនខាងលើមានអាយុប្រហែល២០ឆ្នាំ ហើយទោះជាសមត្ថកិច្ចសួរយ៉ាងណាក៏មិនបានប្រាប់ឲ្យដឹងពីអត្តសញ្ញាណរបស់ខ្លួនឡើយ ។ ចំណែករថយន្តមួយគ្រឿងដែលត្រូវយុវជននេះគប់បណ្ដាលឲ្យរងការខូចខាតបែកកញ្ចក់មុខនោះម៉ាកហ៊ីណូ ពណ៌ស ពាក់ស្លាកលេខ បាត់ដំបង ៣A-១០៤០ ហើយអ្នកបើកបររថយន្តក៏មានការលាក់លៀមមិនបានប្រាប់ឈ្មោះរបស់ខ្លួនឲ្យដឹងផងដែរ។
តាមប្រជាពលរដ្ឋបានឲ្យដឹងថា មិនមាននរណាម្នាក់បានដឹងថា រឿងរ៉ាវនេះពីដំបូងកើតឡើងយ៉ាងម៉េចនោះឡើយ ប៉ុន្តែនៅពេលកើតហេតុ ពួកគាត់បានឃើញយុវជនម្នាក់នេះជិះកង់១គ្រឿងធ្វើដំណើរតាមផ្លូវជាតិលេខ៤ ក្នុងទិសដៅពីលិចទៅកើត ។ ដោយជិះកង់តាមពីក្រោយរថយន្តខាងលើដែលបើកស្របគ្នាក្នុងល្បឿនលឿនគួរសមដែរ ប៉ុន្តែភ្លាមៗនោះមិនមាននរណាម្នាក់បានចាប់អារម្មណ៍ថាយុវជននេះខឹងសម្បារជាមួយអ្នកបើកបររថយន្តនោះឡើយ។
ប្រភពដដែលបានបន្តទៀតថា បន្ទាប់មករថយន្តខាងលើបានបត់ទៅតាមផ្លូវវេងស្រេង និងបើកយឺតៗ ព្រោះផ្លូវនោះស្ទះចរាចរណ៍ មិនអាចបើកលឿនបានឡើយ ។ ខណៈនោះស្រាប់តែយុវជនខាងលើនេះរើសដុំថ្មគប់តាមទ្វារខាងស្ដាំនៃរថយន្តដែលចំហរកញ្ចក់ ដែលការគប់នេះជាការប៉ុនប៉ងគប់ទៅអ្នកបើកបររថយន្តតែម្ដង ប៉ុន្តែមិនបានបណ្ដាលឲ្យត្រូវអ្នកបើកបររថយន្ត បែរជាដុំថ្មបានហោះទៅត្រូវកញ្ចក់មុខរថយន្តបណ្ដាលឲ្យបែករងការខូចខាត ។ ភ្លាមនោះយុវជនខាងលើប្រុងជិះកង់គេចខ្លួនដែរ ប៉ុន្តែគេចមិនរួចត្រូវបាននគរបាលចរាចរណ៍រាជធានីភ្នំពេញដែលប្រចាំការនៅគោលដៅរង្វង់មូលថ្នល់បំបែកចោមចៅនោះចាប់ខ្លួនបាន បន្ទាប់មកបានហៅនគរបាលប៉ុស្ដិ៍ចោមចៅ៣ចុះទៅវាយខ្នោះដៃនាំយកទៅកាន់ប៉ុស្ដិ៍ធ្វើការសាកសួរ និងចាត់ការតាមច្បាប់។
ក្រោយពេលនាំទៅដល់ប៉ុស្តិ៍ ភាគីទាំង២បានប្រកែកយកត្រូវរៀងៗខ្លួន ដោយយុវជនខាងលើបាននិយាយថា មូលហេតុដែលខ្លួនរើសដុំថ្មគប់នោះ ព្រោះតែខឹងរថយន្តនេះបើកកៀរពេលដែលខ្លួនកំពុងជិះកង់ដោយមិនដឹងខ្លួន ។ ចំណែកខាងអ្នកបើកបររថយន្តបានប្រកែកថា ខ្លួនមិនបានបើកកៀរនោះឡើយ ហើយក៏មិនបានដឹងថាយុវជននោះតាមគប់បែបនេះដែរ ៕
ចែករំលែកព័តមាននេះ