ខេត្តព្រៃវែង ៖ គ្រោះថ្នាក់ចរាចរណ៍ គឺជាឃាតកលាក់មុខដែលនៅចាំឆក់យកអាយុជីវិតរបស់បងប្អូនប្រជាពលរដ្ឋខ្មែរ គ្រប់ទីកន្លែង គ្រប់ពេលវេលា ឲ្យតែធ្វើដំណើរដោយខ្វះការប្រុងប្រយត្ន័ និងមិនគោរពតាមច្បាប់ចរាចរណ៍។ ជាក់ស្តែងនៅខេត្តព្រៃវែងឯណោះវិញ យ៉ាងហោចណាស់មានមនុស្ស២នាក់…
ខេត្តព្រៃវែង ៖ គ្រោះថ្នាក់ចរាចរណ៍ គឺជាឃាតកលាក់មុខដែលនៅចាំឆក់យកអាយុជីវិតរបស់បងប្អូនប្រជាពលរដ្ឋខ្មែរ គ្រប់ទីកន្លែង គ្រប់ពេលវេលា ឲ្យតែធ្វើដំណើរដោយខ្វះការប្រុងប្រយត្ន័ និងមិនគោរពតាមច្បាប់ចរាចរណ៍។ ជាក់ស្តែងនៅខេត្តព្រៃវែងឯណោះវិញ យ៉ាងហោចណាស់មានមនុស្ស២នាក់ បានបាត់បង់ជីវិតភ្លាមៗនៅនឹងកន្លែង កើតហេតុ និង២នាក់ផ្សេងទៀតបានរងរបួសស្រាល នៅក្នុងហេតុការណ៍គ្រោះថ្នាក់ចរាចរណ៍២ករណីផ្សេងពីគ្នា។ ករណីទី១ បានកើតឡើងកាលពីវេលាម៉ោង៧ និង១៥នាទីយប់ ថ្ងៃទី២ មិថុនា នៅលើកំណាត់ផ្លូវជាតិលេខ៨អា ត្រង់ចន្លោះគីឡូម៉ែត្រលេខ៥២ និង៥៣ ក្នុងភូមិវៃវេទ ឃុំរាប ស្រុកពារាំង ដោយម៉ូតូមួយគ្រឿងម៉ាក CFR ពាក់ស្លាកលេខ ភ្នំពេញ 1DE-7400 បានបើកទៅបុកបង្គោលថ្មចំណាំងផ្លាត ដែលនៅចិញ្ចើមថ្នល់ពេញទំហឹងបណ្តាលឲ្យបាក់ដាច់ បង្គោលថ្មជាពីរ រីឯម៉ូតូបានរងការខូចខាតយ៉ាងដំណំ។
ចំណែកឯអ្នកបើកបរម៉ូតូឈ្មោះ សុខ សុផា ភេប្រុស អាយុ២៤ឆ្នាំ មានទីលំនៅក្នុងភូមិព្រះម្លូ ឃុំព្រៃស្រឡិត ស្រុកពារាំង បានស្លាប់ភ្លាមនៅហ្នឹងកន្លែងកើតហេតុ។ មូលហេតុដែលបណ្តាលឲ្យកើតមានគ្រោះថ្នាក់ចរាចរណ៍នេះត្រូវបានសមត្ថកិច្ចបញ្ជាក់ប្រាប់ថា គឺដោយសារតែជនរងគ្រោះ បើកបរក្នុងល្បឿនលឿនខ្លាំងក្នុងពេលយប់ងងឹតលុះដល់ផ្លូវកោងបត់កោងមិនទាន់ទើបជ្រុលទៅបុកបង្គោលថ្មតែម្តង។
ចំណែកករណីទី២ បានកើតឡើងកាលពីវេលាម៉ោង៩ និង១០នាទីព្រឹក ថ្ងៃទី៤មិថុនា នៅចំណុចភូមិស្នួល ឃុំក្រញូង ស្រុកកំចាយមារ ដោយជនរងគ្រោះមានគ្នា២នាក់ បានជិះម៉ូតូមួយគ្រឿងម៉ាក ហុងដាសេ១២៥ ពណ៌ខ្មៅ ពាក់ស្លាកលេខ ក្រចេះ ១D-២៧៦១ ធ្វើដំណើរតាមបណ្តោយផ្លូវជាតិលេខ៨អា ក្នុងទិសដៅពីលិចទៅកើត ពេលមកដល់ចំណុចកើតហេតុ ដែលជាចំណុចផ្លូវកោង ម៉ូតូជនរងគ្រោះបានជ្រុលចង្កូតចេញពីផ្លូវ ធ្លាក់ចូលទៅក្នុងប្រឡាយក្បែរមាត់លូកាត់ថ្នល់ បណ្តាលឲ្យជនរងគ្រោះឈ្មោះ ម៉ៅ ធារ៉ា ភេទប្រុស អាយុ២២ឆ្នាំ ជាអ្នកបើកម៉ូតូស្លាប់ភ្លាមៗនៅហ្នឹងកន្លែងកើតហេតុ ចំណែកអ្នករួមដំណើរម្នាក់ទៀតឈ្មោះ គយ ហុងសេង ភេទប្រុស អាយុ១៩ឆ្នាំ បានរងរបួសស្រាល។ ជនរងគ្រោះទាំង២នាក់មានទីលំនៅក្នុងភូមិព្រៃតាម៉ាន់ ឃុំឆ្លូង ស្រុកស្នួល ខេត្តក្រចេះ៕
ចែករំលែកព័តមាននេះ