រាជធានីភ្នំពេញ ៖ ផ្លូវប្រទះឡាងឬផ្លូវក្រវាត់ក្រុងទី៤ ជាផ្លូវតភ្ជាប់រវាងខេត្តកណ្តាល ជាមួយខណ្ឌពោធិ៍សែនជ័យនិងខណ្ឌដង្កោ រាជធានីភ្នំពេញ មានប្រវែងជាង១២គីឡូម៉ែត្រ ហើយដែលបានបើកការដ្ឋានស្ថាបនាជាងមួយឆ្នាំកន្លងមកហើយ ពេលនេះការដ្ឋានទាំងមូលបានបញ្ចប់ទាំងស្រុងហើយ ដោយចំណាយថវិកាចំនួន…
រាជធានីភ្នំពេញ ៖ ផ្លូវប្រទះឡាងឬផ្លូវក្រវាត់ក្រុងទី៤ ជាផ្លូវតភ្ជាប់រវាងខេត្តកណ្តាល ជាមួយខណ្ឌពោធិ៍សែនជ័យនិងខណ្ឌដង្កោ រាជធានីភ្នំពេញ មានប្រវែងជាង១២គីឡូម៉ែត្រ ហើយដែលបានបើកការដ្ឋានស្ថាបនាជាងមួយឆ្នាំកន្លងមកហើយ ពេលនេះការដ្ឋានទាំងមូលបានបញ្ចប់ទាំងស្រុងហើយ ដោយចំណាយថវិកាចំនួន ៥លានដុល្លារអាមេរិក ។
លោក សាំ ពិសិដ្ឋ នាយកមន្ទីរសាធារណការនិងដឹកជញ្ជូនរាជធានីភ្នំពេញ បានឲ្យដឹងនៅព្រឹកថ្ងៃទី២៨ ខែឧសភាថា ផ្លូវបេតុងប្រទះឡាង ចាប់ពីផ្លូវជាតិលេខ៣ដល់ផ្លូវជាតិលេខ៤មានប្រវែង១២.៦២០ម៉ែត្រ ទទឹង៧ម៉ែត្រ បានបញ្ចប់ការដ្ឋាន១០០ភាគរយនៅថ្ងៃនេះហើយ ។ នេះជាផ្លូវខ្សែក្រវាត់ទី៤ ដែលរថយន្តធុនធ្ងន់រថយន្តកុងតឹន័រ អាចធ្វើចរាចរណ៍ពីផ្លូវជាតិលេខ៤ទៅផ្លូវជាតិលេខ៣ ផ្លូវជាតិលេខ២ ផ្លូវជាតិលេខ១ដោយមិនចាំបាច់ឲ្យយានយន្តចូលមកដល់រង្វង់មូលចោមចៅដែលតែងតែកកស្ទះចរាចរណ៍រាល់ថ្ងៃនោះទេ ។
លោកបានឲ្យដឹងទៀតថា ផ្លូវប្រទះឡាងឬផ្លូវខ្សែក្រវាត់ក្រុងទី៤នេះ គឺជាផ្លូវមួយមានសារៈសំខាន់ក្នុងការរំដោះចរាចរណ៍តភ្ជាប់ពីផ្លូវជាតិលេខ៤ ត្រង់ចំណុចផ្សារបែកចានមកផ្លូវជាតិលេខ៣ត្រង់ចំណុចវត្តស្លែង ។ ផ្លូវនេះបានរងការខូចខាតស្ទើរទាំងស្រុងដោយកត្តាជាច្រើន ទើបអាជ្ញាធររាជធានីភ្នំពេញ និងអាជ្ញាធរខេត្ត
កណ្តាល សហការគ្នាធ្វើការជួសជុលឡើងវិញតាមបទបញ្ជាសម្តេចតេជោ ហ៊ុន សែន ។ លោក សាំ ពិសិដ្ឋ បញ្ជាក់ថា កំណាត់ផ្លូវនេះបើតាមការគ្រោងទុក នៅពេលខាងមុខនឹង ពង្រីកឲ្យមានទទឹងរហូតទៅដល់១៤ម៉ែត្រ រួមនឹងការដាក់ប្រព័ន្ធលូសងខាងផ្លូវផងដែរ ។ ប៉ុន្តែ ដោយសារថវិកានៅមានកម្រិត ទើបអាជ្ញាធរ សម្រេចស្ថាបនាទទឹងតែ៧ម៉ែត្រសិន ។លោកក៏បានធ្វើការអំពាវនាវដល់អ្នកបើកបរ ទាំងរថយន្តធំៗដឹកទំនិញ ក៏ដូចជារថយន្តតូចសូមវាងមកផ្លូវខាងលើនេះ ដើម្បីកុំឲ្យមានការកកស្ទះចរាចរណ៍នៅចំណុចរង្វង់មូលចោមចៅ ។
គួររំលឹកថា កំណាត់ផ្លូវខាងលើនេះបានបើកការដ្ឋានជួសជុលកាលថ្ងៃទី៣១ ខែតុលា ឆ្នាំ២០១៦ ក្រោមអធិបតីភាពលោកអភិបាលរាជធានីភ្នំពេញ និងលោកអភិបាលខេត្តកណ្តាល។ ផ្លូវនេះមិនមែនត្រឹមតែបម្រើផលប្រយោជន៍ដល់ប្រជាពលរដ្ឋទូទៅដែលឆ្លងកាត់ភូមិសាស្ត្រតំបន់នេះប៉ុណ្ណោះទេ តែគឺអាចកាត់បន្ថយការកកស្ទះចរាចរណ៍លើកំណាត់ផ្លូវជាតិលេខ៤ និងលេខ៣ផងដែរ ជាពិសេសត្រង់ចំណុចប្រសព្វរង្វង់មូលចោមចៅ ដែលជាចំណុចតភ្ជាប់រវាងផ្លូវជាតិលេខ៤និងផ្លូវជាតិលេខ៣ ៕
ចែករំលែកព័តមាននេះ