រាជធានីភ្នំពេញ ៖ តារាសម្តែងលោកពៅ គីសាន់ ហៅនាយឆើត បានសម្តែងក្តីបារម្ភយ៉ាងខ្លាំងពីឱកាសកាន់តែខើចសម្រាប់អាជីពសម្តែងរបស់លោក ព្រោះលោកកំពុងតែញាំញីដោយជំងឺ និងវ័យកាន់តែចាស់ ។
ដ្បិតបានបម្រើអារម្មណ៍ទស្សនិកជនជិតឆ្នាំ៣០មកហើយក្តី លោកពៅ គីសាន់ ហាក់មិនមានបំណងណាមួយចង់បោះបង់អាជីពសម្តែងរបស់ឡើយ រហូតមកដល់ពេលនេះ ប៉ុន្តែដោយសារតែលោកហាក់គ្មានទីផ្សារដូចមុន ទើបលោកសម្តែងក្តីបារម្ភយ៉ាងខ្លាំង ។
ថ្លែងប្រាប់កោះសន្តិភាពតាមទូរស័ព្ទកាលពីពេល ថ្មីៗកន្លងមក តារាសម្តែងជំនាញខាងតួកាចទាត់ធាក់លោកពៅ គីសាន់ ហៅនាយ ឆើត ឲ្យដឹងថា រហូតមកដល់ពេលនេះលោកបានឈានចូលដល់វ័យជាង៥០ឆ្នាំទៅហើយ បូករួមជាមួយនឹងជំងឺប្រចាំកាយផងនោះធ្វើឲ្យលោកបាត់ចំណែកទីផ្សារសិល្បៈស្ទើរហៅមិនឮ ។ បច្ចុប្បន្នលោកមិនមានផលិតករណាមួយហៅរូបលោកឲ្យចូលរួមសម្តែងទៀតឡើយ បន្ទាប់ពីលោកបានថតបញ្ចប់ខ្សែភាពយន្តចំនួនពីរចុងក្រោយឲ្យផលិតកម្មខ្មែរមេគង្គ និងរឿងភាគចាក់ផ្សាយនៅស្ថានីយទូរទស្សន៍PNN នោះមក ។ ផលិតករហាក់មើលរំលងរូបលោកដែលធ្លាប់មានបទពិសោធន៍ជិត៣០ឆ្នាំមកនេះ បើទោះបីជាបច្ចុប្បន្នលោកមានវ័យចាស់ក៏ពិតមែន ប៉ុន្តែនៅតែមានបំណងចូលរួមសម្តែងត្រឹមជាតួឪពុកក៏បាន ។
បើតាមលោកពៅ គីសាន់ ឆ្លងកាត់បទពិសោធន៍លោកអាចសម្តែងបានគ្រប់តួអង្គទាំងអស់មិនថាតួកាច ស្លូត កំប្លែងនោះទេ ប៉ុន្តែសម្រាប់តួដែលហក់លោតដូចមុននោះគឺលោកទទួលស្គាល់ថា មិនអាចសម្តែងបានទៀតឡើយ ព្រោះវ័យកាន់តែចាស់ ។ លោកអាចសម្តែងត្រឹមជាតួឪពុក ឬតួអង្គណាមួយដែលសមស្របទៅតាមការដាក់ឲ្យរបស់អ្នកដឹកនាំរឿង ព្រោះតួអង្គ នីមួយៗគ្រាន់តែជាធាតុផ្សំនៃសាច់រឿងប៉ុណ្ណោះ ។
លោកពៅ គីសាន់ ឲ្យដឹងបន្ថែមថា ផលិតករមួយចំនួនហាក់មានបំណងផ្តាច់ទីផ្សារសម្តែងសម្រាប់តួ ចាស់ៗដូចជារូបលោកជាដើម ក្នុងពេលដែលតួអង្គទាំងនោះចូលវ័យកាន់តែចាស់ ។ ផលិតករទាំងនោះបានជំនួសមកវិញនូវតួងអង្គ ថ្មីៗដែលមិនសូវមានបទពិសោធន៍ឲ្យមកសម្តែងទៅវិញ ដែលកត្តានេះលោកយល់ថា ជាការបាត់តម្លៃ និងគុណភាពនៃខ្សែភាពយន្តខ្មែរយើង ។ ជាផ្នែកមួយផ្សេងទៀតផលិតករខ្លះហាក់ប្រកាន់បក្សពួកនិយម ដោយឲ្យតែបក្សពួកខ្លួនបានសម្តែងប៉ុណ្ណោះ បើទោះបីជាតួអង្គនោះសម្តែងនៅមិនទាន់ដល់កម្រិតក៏ដោយ ខណៈពេលដែលតួអង្គខ្លះក៏យកតម្លៃថតតិចតួច ជាងតួ ចាស់ៗផងនោះ ។
បញ្ហាទាំងនោះនាយឆើត ចាត់ទុកថា ជារឿងដែលមិនអាចគេចរួចឡើយ ព្រោះបច្ចុប្បន្នតួអង្គ ក្មេងៗជាច្រើនកំពុងកើតមានដូចផ្សិត ហើយតួអង្គទាំងអស់នោះក៏បានធ្វើឲ្យផលិតករពេញចិត្តពេញថ្លើមផងដែរ ។
លោកពៅ គីសាន់ បញ្ជាក់ថា ដោយសារកក្តាទាំងអស់នេះហើយ ទើបលោកយល់ថា ឱកាសសម្រាប់សិល្បករ ចាស់ៗដូចជារូបលោកគឺកាន់តែ ខើចទៅៗ ហើយក្លាយជាមនុស្សឯកាមួយដែលត្រូវបានផលិតករមើលរំលង បើទោះបីជានៅមានសមត្ថភាពសម្តែងនៅឡើយក្តី ។
ឈរលើកក្តានេះក្នុងនាមជាតារាសម្តែងជើងចាស់មួយរូប នាយឆើត សំណូមពរដល់ភាគីពាក់ព័ន្ធ និងបណ្តាផលិតករនានាសូមគិតគូឡើងវិញចំពោះតារាចាស់ដែលនៅមានសមត្ថភាពសម្តែងនៅឡើយ ។ តួអង្គចាស់ខ្លះ ជាពិសេសរូបលោកផ្ទាល់គឺសង្ឃឹមតែអាជីពសិល្បៈនេះប៉ុណ្ណោះសម្រាប់ផ្គត់ផ្គង់គ្រួសារ បើគ្មានការសម្តែងទេនោះ ប្រាកដជាជួបបញ្ហាក្នុងជីវភាពដោយចៀសមិនរួច ៕
ចែករំលែកព័តមាននេះ