ខេត្តបន្ទាយមានជ័យ ៖ ពលរដ្ឋប្រមាណជិត៥០នាក់ តំណាងឲ្យពលរដ្ឋជាង១០០គ្រួសារបានប្រមូលផ្តុំគ្នាលើដងផ្លូវលំ មួយក្នុងភូមិ ហើយអំពាវនាវតាមរយៈក្រុមអ្នកយកព័ត៌មានឲ្យជួយផ្សព្វផ្សាយទាមទារផ្លូវដែលត្រូវអ្នកស្រុកសង់លំនៅដ្ឋានបិទស្ទើរជិតអស់ពិបាកធ្វើដំណើរ ។ ករណីខាងលើកើតឡើងនៅភូមិក្បាលកោះសង្កាត់ និងក្រុងប៉ោយប៉ែត កាលពីរសៀលថ្ងៃទី២៨ ខែឧសភានេះ ។
បុរសចំណាស់វ័យជិត៦០ឆ្នាំ ឈ្មោះកេត សុធា តំណាងឲ្យក្រុមអ្នកតវ៉ាបានលើកឡើងថា ពួកគាត់រស់នៅសងខាងផ្លូវ ចំណុចកើតហេតុតាំងពីឆ្នាំ១៩៩៣ ហើយថា កន្លងមកផ្លូវមួយខ្សែនេះមិនពិបាកធ្វើដំណើរដូចសព្វថ្ងៃឡើយ ។ បុរសរូបនេះបន្តថា កាលពី៣ទៅ៤ឆ្នាំមុន អ្នកស្រុក៣គ្រួសារបាននាំគ្នាសាងសង់ផ្ទះបិទផ្លូវខាងលើ ទើបអស់ផ្លូវនៅសល់តិចតួចស្ទើរជិះម៉ូតូឆ្លងកាត់មិនចង់កើត ។
បុរសខាងលើបន្តថា កន្លងមកគាត់តែងតែប្រាប់ទៅលោកសែមវិរៈមេភូមិឲ្យទប់ស្កាត់ប្រយ័ត្នបាត់ផ្លូវ ចំណុចតភ្ជាប់ផ្លូវរថភ្លើងចេញចូលភូមិ តែអាជ្ញាធរហាក់ព្រងើយកន្តើយ លុះពលរដ្ឋ៣គ្រួសារនាំគ្នាសាងសង់ផ្ទះ រួចគាត់ទូរស័ព្ទប្រាប់អាជ្ញាធរភូមិកាលនោះតបថា គាត់រវល់ទៅស្រុកទើបបញ្ហាកើតមានដល់សព្វថ្ងៃតែម្តង ។
អ្នកតវ៉ាផ្សេងៗទៀតក៏ដូចគ្នាដែរបានលើកឡើងដូចបុរសចំណាស់ខាងលើ ហើយអ្វីដែលសំខាន់នោះពួកគាត់ថា ប្រាថ្នាចង់បានផ្លូវមួយខ្សែនេះនៅដូចដើម ព្រោះគ្រប់គ្នាអាចបើកបរយានយន្តឆ្លងកាត់ឬចេញចូលផ្ទះបាន ។ ក្រុមអ្នកតវ៉ាបន្តថា បច្ចុប្បន្នបើមានប្រាក់ក៏មិនហ៊ានទិញរថយន្តជិះដែរ ព្រោះមិនដឹងបើកចេញចូលតាមណា ហើយថា សូម្បីតែម៉ូតូស្ទើរតែពិបាកឆ្លងកាត់ទៅហើយនោះ។
ពួកគាត់ទទូចសុំអាជ្ញាធរមេត្តាធ្វើយ៉ាងណាពិនិត្យសើរើយកផ្លូវនេះ ឲ្យពួកគាត់បានធ្វើដំណើរចេញចូលផ្ទះងាយស្រួលផង ។ ក្រុមអ្នកតវ៉ាបញ្ជាក់ថាថ្ងៃនេះ គឺគ្រាន់តែផ្តុំគ្នាលើដងផ្លូវ ដើម្បីសម្តែងមតិទេ តែបើគ្មានដំណោះស្រាយពួកគាត់ និងលើកគ្នាទៅតវ៉ាដល់សាលាក្រុង ឬអាចដល់មុខសាលាខេត្ត ហើយក៏បាននាំគ្នាផ្តិតមេដៃរួចរាល់ហើយដែរ ដើម្បីដាក់ជូនទៅសាលាក្រុងប៉ោយប៉ែតឲ្យអាជ្ញាធរជួយដោះស្រាយលើបញ្ហាទុកលំបាកនេះ ។
ករណីនេះគ្រួសារឈ្មោះ ប៉ែន សាវឿន អាយុ៥៤ឆ្នាំ ប្រពន្ធឈ្មោះ ព្រាប ម៉ាលី អាយុ៥៣ឆ្នាំ ផ្ទះថ្មក្រោមឈើលើដែលជាគ្រួសាររងការចោទប្រកាន់ថា សាងសង់លើដីផ្លូវពួកគាត់អះអាងថា បានរស់នៅទីនោះតាំងពីឆ្នាំ១៩៩៦ ប៉ុន្តែពីមុនផ្ទះតូចទើបសាងសង់ផ្ទះថ្មីនេះ៤ឆ្នាំ ។ គ្រួសារនេះបន្តថា ដីដែលពួកគាត់រស់នៅ គឺទិញពីគេ ប៉ុន្តែទទួលស្គាល់ថា ពុំមានពាក្យកាន់កាប់ ឬប្លង់កម្មសិទ្ធចេញឲ្យដោយអាជ្ញាធរនោះទេ ។ ដោយឡែក២គ្រួសារទៀតដែលរងការចោទប្រកាន់ដូចគ្នា១គ្រួសាររវល់ទៅរកស៊ីនៅឯប្រទេសថៃ ។
ដោយឡែក១គ្រួសារទៀតជាស្ត្រីមេម៉ាយឈ្មោះមាច វឹត អាយុ៥៦ឆ្នាំ គាត់អះអាងថា បានរស់នៅទីតាំងកើតហេតុតាំងពីឆ្នាំ១៩៩៦ដូចគ្នាទៅនឹងគ្រួសារទី១ដែរ ហើយថា គ្រួសារដែលទៅរកស៊ីនៅស្រុកថៃជាប្អូនប្រុសគាត់បង្កើតឈ្មោះមាច ប្រាក់ អាយុ៥១ឆ្នាំ ពន្ធឈ្មោះម៉ឺន ភ័ស្ផ អាយុ៥៣ឆ្នាំ ។ ជុំវិញបញ្ហាខាងលើលោកសែមវិរៈមេភូមិក្បាលកោះមិនអាចទាក់ទងសុំការបំភ្លឺបានទេ ដោយទូរស័ព្ទរបស់លោកចុចចូលគ្មានអ្នកទទួល ៕
ចែករំលែកព័តមាននេះ