ខេត្តព្រៃវែង ៖ នគរបាលស្រុកកញ្ជ្រៀចបានចាប់ឃាត់ខ្លួនជនម្នាក់ រួមជាមួយវត្ថុតាងរថយន្តមួយគ្រឿង ដែលជននេះលួចពីរាជធានីភ្នំពេញហើយរត់គេចខ្លួនមកស្រុកកំណើតនៅខេត្តព្រៃវែង ។ជនដែលត្រូវបានឃាត់ខ្លួននេះឈ្មោះ សួង វណ្ណដា ភេទប្រុស អាយុ២៨ឆ្នាំ…
ខេត្តព្រៃវែង ៖ នគរបាលស្រុកកញ្ជ្រៀចបានចាប់ឃាត់ខ្លួនជនម្នាក់ រួមជាមួយវត្ថុតាងរថយន្តមួយគ្រឿង ដែលជននេះលួចពីរាជធានីភ្នំពេញហើយរត់គេចខ្លួនមកស្រុកកំណើតនៅខេត្តព្រៃវែង ។ជនដែលត្រូវបានឃាត់ខ្លួននេះឈ្មោះ សួង វណ្ណដា ភេទប្រុស អាយុ២៨ឆ្នាំ មានទីលំនៅក្នុងភូមិមានជ័យ ឃុំចុងអំពិល ស្រុកកញ្ជ្រៀច ចំណែកវត្ថុតាងដែលបានដកហូតរថយន្តមួយគ្រឿងម៉ាកព្រូស ពណ៌ស ពាក់ផ្លាកលេខ ភ្នំពេញ ២AG-២០៩០ ។
សមត្ថកិច្ចនគរបាលស្រុកកញ្ជ្រៀចបានឲ្យដឹងថា កាលពីថ្ងៃទី២៣ ខែឧសភា សមត្ថកិច្ចនៅរាជធានីភ្នំពេញ បានទទួលពាក្យបណ្តឹងពីជនរងគ្រោះថា បានបាត់រថយន្តមួយគ្រឿងម៉ាកព្រូស ពណ៌ស និងប្រាប់ពីស្លាកលេខ ដែលបានចតទុកនៅចិញ្ចើមថ្នល់ម្តុំក្រោយមន្ទីរពេទ្យមិត្តភាពខ្មែរ-សូវៀត ។ ក្រោយពីទទួលបានពាក្យបណ្តឹងនេះភ្លាម សមត្ថកិច្ចនៅរាជធានីភ្នំពេញ បានទាក់ទងមកសមត្ថកិច្ចគ្រប់ខេត្តទាំងអស់ឲ្យតាមឃ្លាំមើល និងចាប់ឃាត់ភ្លាមប្រសិនបើប្រទះឃើញ ។
ក្រោយពីទទួលបានព័ត៌មាននេះ លោកឧត្តមសេនីយ៍ស្នងការនគរបាលខេត្ត ក៏បានដាក់បទបញ្ជាដល់កងកម្លាំងនគរបាលគ្រប់ស្រុកទាំងអស់ ឱ្យតាមឃ្លាំមើល ។ លុះមកដល់វេលាម៉ោង១និង៤៥នាទីរសៀលថ្ងៃទី២៤ ខែឧសភា កម្លាំងនគរបាលប៉ុស្តិ៍ឃុំចុងអំពិល ស្រុកកញ្ជ្រៀច ប្រទះឃើញរថយន្តដូចភិនភាគដែលបានបាត់ ស្ថិតនៅក្នុងផ្ទះរបស់ជនឈ្មោះ សួង វណ្ណដា ទើបនាំខ្លួនជននេះមកសាកសួរនៅប៉ុស្តិ៍ ។ ជនសង្ស័យបានឆ្លើយសារភាពថា រថយន្តនេះរូបគេបានលួចយកមកពីក្រោយមន្ទីរពេទ្យមិត្តភាពខ្មែរ-សូវៀតពិតមែន ទើបសមត្ថកិច្ចឃាត់ខ្លួនតែម្តង ៕
ចែករំលែកព័តមាននេះ