រាជធានីភ្នំពេញ ៖ ក្រុមហ៊ុនសាជីវកម្ម ខ្មែ-ចិន (CIIDG) បានសម្រេចបោះទុនវិនិយោគទឹកប្រាក់១.២០០លានដុល្លារ ដើម្បីពង្រីកការសាងសង់រោងចក្រផលិតអគ្គិសនីដើរដោយថាមពលធ្យូងថ្ម នៅខេត្តព្រះសីហនុ ដែលអាចផ្តល់ថាមពល៧០០មេហ្គាវ៉ាត់ ។…
រាជធានីភ្នំពេញ ៖ ក្រុមហ៊ុនសាជីវកម្ម ខ្មែ-ចិន (CIIDG) បានសម្រេចបោះទុនវិនិយោគទឹកប្រាក់១.២០០លានដុល្លារ ដើម្បីពង្រីកការសាងសង់រោងចក្រផលិតអគ្គិសនីដើរដោយថាមពលធ្យូងថ្ម នៅខេត្តព្រះសីហនុ ដែលអាចផ្តល់ថាមពល៧០០មេហ្គាវ៉ាត់ ។
អគ្គនាយកថាមពលនៃក្រសួងរ៉ែ និងថាមពល លោក វិចទ័រ សូណា បានថ្លែងតាមទូរស័ព្ទនារសៀលថ្ងៃទី២៨ ឧសភា ម្សិលមិញថា នេះជាការពង្រីកការវិនិយោគរបស់ក្រុមហ៊ុនCIIDGលើការពង្រីកថាមពលអគ្គិសនីថ្មី ដែលផលិតចេញពីធ្យូងថ្មស្អាត ស្ថិតក្នុងស្រុកស្ទឹងហាវ ខេត្តព្រះសីហនុ ។
លោកបន្តថា ក្រុមហ៊ុនបានពង្រីកការផលិតទំហំ២យូនីតទៀត ដែល១យូនីតអាចផលិតបានថាមពល៣៥០មេហ្គាវ៉ាត់ ហើយយូនីតទី១នឹងដាក់ឲ្យប្រើប្រាស់នៅឆ្នាំ២០២៣ និងយូនីតទី២ នឹងដាក់ឲ្យប្រើប្រាស់នៅឆ្នាំ២០២៤ ។
លោកបន្តថា ៖« ថាមពលអគ្គិសនីថ្មីនេះ នឹងតភ្ជាប់ចូលបណ្តាញជាតិ ដែលបច្ចុប្បន្ន បណ្តាញអគ្គិសនីជាតិបានគ្របដណ្តប់១៩រាជធានី-ខេត្តរួចហើយ ។ ហេតុនេះ ថាមពលអគ្គិសនីចេញពីរោងចក្រថ្មីនេះ នឹងអាចពង្រីកការគ្របដណ្តប់បន្ថែម ហើយគម្រោងថ្មីនេះនឹងជួយឲ្យកម្ពុជាសម្រេចគោលដៅនៃការផ្ដល់ថាមពលអគ្គិសនីជូនដល់ប្រជាពលរដ្ឋ » ។
លោកបន្ថែមថា ៖« ដោយសារការរីកចម្រើនសេដ្ឋកិច្ច ចំនួនប្រជាជនកើនឡើង ឧស្សាហកម្មកើនឡើង បានធ្វើឲ្យតម្រូវការថាមពលអគ្គិសនីកើនឡើង១៥% ឬប្រមាណ២៥០មេហ្គាវ៉ាត់ជារៀងរាល់ឆ្នាំ » ។
លោក វិកទ័រ សូណា បានបន្តថា ៖«បណ្តាញថាមពលរបស់យើងពិតជាកំពុងពង្រីកយ៉ាងសកម្ម ហើយរាជរដ្ឋាភិបាលតាមរយៈក្រសួងរ៉ែ និងថាមពល បានពង្រីកការចែកចាយបណ្តាញអគ្គិសនីលឿនលើសល្បឿនកំណត់ » ។
ប្រធានក្រុមប្រឹក្សាភិបាលនៃវិទ្យាស្ថានសិក្សាការអភិវឌ្ឍ លោកបណ្ឌិត ម៉ី កល្យាណ បានថ្លែងថា ការពង្រីកបណ្តាញចែកចាយថាមពលអគ្គិសនីនៅកម្ពុជា តាមរយៈការខិតខំរបស់រាជរដ្ឋាភិបាល ពិតជាបានគ្របដណ្តប់លឿន និងឆ្លើយតបនឹងអ្វីដែលប្រជាពលរដ្ឋចង់បាន ដោយសារការពង្រីកការវិនិយោគពីវិស័យឯកជន និងរាជរដ្ឋាភិបាលកម្ពុជា ប៉ុន្តែទោះជាយ៉ាងណាថាមពលអគ្គិសនីនៅកម្ពុជា មិនទាន់មានគុណភាពល្អប្រសើរនៅឡើយ
ទេ ។
លោកបញ្ជាក់ថា ៖« គុណភាពថាមពលអគ្គិសនី សំដៅដល់អគ្គិសនីដែលមិនដាច់ មានតង់ស្យុងមិនឡើងចុះ និងជាថាមពលដែលរត់ថេរគ្រប់តាមស្តង់ដាកំណត់ » ។
យោងតាមអាជ្ញាធរអគ្គិសនីកម្ពុជា តម្រូវការប្រើប្រាស់ថាមពលអគ្គិសនីបានកើនឡើងជារៀងរាល់ឆ្នាំ ដោយកាលពីឆ្នាំ២០១៧ មានចំនួន២.២៨៣មេហ្គាវ៉ាត់ បើធៀបនឹងឆ្នាំ២០១៦ មានចំនួន២.១១៥មេហ្គាវ៉ាត់ ៕
ចែករំលែកព័តមាននេះ