ខេត្តក្រចេះ ៖ ស្ថានភាពពុលដូចជាពុលទឹកព្រែក ពុលស្រា.ស ពុលនំអន្សមអាំង ពុល នំប៉័ង និងនំចំណីផ្សេងៗ បានធ្វើឲ្យមនុស្សប្រុសស្រីក្មេងចាស់ស្លាប់អស់ជាច្រើននាក់ បើគិតចាប់ពីដើមខែឧសភាមក…
ខេត្តក្រចេះ ៖ ស្ថានភាពពុលដូចជាពុលទឹកព្រែក ពុលស្រា.ស ពុលនំអន្សមអាំង ពុល នំប៉័ង និងនំចំណីផ្សេងៗ បានធ្វើឲ្យមនុស្សប្រុសស្រីក្មេងចាស់ស្លាប់អស់ជាច្រើននាក់ បើគិតចាប់ពីដើមខែឧសភាមក ។ រហូតមកទល់នឹងចុងខែឧសភានេះ ក៏ស្ថានភាពពុលដ៏អាក្រក់នេះ នៅមិនទាន់ថមថយនៅឡើយទេ ដែលបញ្ហានេះធ្វើពលរដ្ឋកំពុងមានការព្រួយបារម្ភពីសុវត្ថិភាពចំណីអាហារ ខណៈស្ថានភាពពុលដែលបណ្តាលមកពីសារ ធាតុ ពុលផ្សេងៗពីគ្នា នៅតែបន្តការយាយីរំខានដល់អាយុជីវិតរបស់ពួកគាត់ជាបន្តបន្ទាប់ ។
បាតុភាពពុលសាជាថ្មីមួយទៀត បានកើតឡើងកាលពីថ្ងៃទី២៥ ឧសភា ដែលការពុលចុងក្រោយនេះបណ្តាលឱ្យពលរដ្ឋនៅឃុំចង្ក្រង់ ស្រុកចិត្របុរីចំនួន៧៥នាក់ ភាគច្រើនជាកុមាររងអាការពុលដូចជា ឈឺ ពោះ ក្អួតចង្អោរ រាករូស និងអស់កម្លាំងជាដើម ។ ករណីពុលដែលកើតឡើងជាលើកចុងក្រោយនេះ ត្រូវបានមន្ទីរសុខាភិបាលខេត្តចេញសេចក្តីសន្និដ្ឋានមួយកាលពីថ្ងៃទី២៦ ខែឧសភា ក្រោយការពុលមួយថ្ងៃថា គឺផ្តើមចេញពីការបរិភោគនំប៉័ង ។ ក្រុមមន្ត្រីបានលើកឡើងថា នំប៉័ងដែលពលរដ្ឋក្មេងចាស់ទទួលទានបណ្តាលឱ្យកើតមានអាការពុល គឺបានមកពីការចែកជូនរបស់ក្រុមការងារដល់ឪពុកម្តាយជាអ្នកភូមិ ក្នុងពិធីប្រជុំផ្សព្វផ្សាយពិគ្រោះយោបល់ ស្តីពីការជំរុញទីផ្សារខ្នាតតូចផលិតផលដំឡូងមី ដែលបានធ្វើឡើងនៅក្នុងឃុំ រៀបចំដោយមន្ទីរពាណិជ្ជកម្ម ។
ជាមួយនឹងករណីពុលដែលបានកើតមានសាជាថ្មី ហើយអាជ្ញាធរថាជាការពុលនំប៉័ងនេះ ត្រូវបានប្រធានមន្ទីរសុខាភិបាលខេត្ត លោក ឈ្នាង សុវត្ថា អះអាងថា ការពុលនេះមិនបានបង្កឱ្យប៉ះពាល់ដល់អាយុជីវិតពលរដ្ឋទេ ។ ទោះជាយ៉ាងណា ពលរដ្ឋដែលពុលបានធូរស្រាលវិញ ហើយ ក្រោយពីនាំទៅសង្គ្រោះនៅមន្ទីរពេទ្យក៏ដូចជាមណ្ឌលសុខភាព ។ទោះបីជាបែបណា ករណីពុលគឺនៅតែកើតមានឡើងគួរឱ្យព្រួយបារម្ភ និងត្រូវបានគេមើលឃើញថាកើតឡើងយ៉ាងគំហុកក្នុងរយៈពេលពេញមួយខែឧសភានេះ ដោយកើតមានឡើងនៅតំបន់ផ្សេងគ្នាក្នុងខេត្តក្រចេះ រហូតស្លាប់មនុស្សអស់១៤នាក់ ។
កាលពីដើមខែឧសភានេះ មានមនុស្សប្រុសស្រីយ៉ាងតិច១៣នាក់ សុទ្ធសឹងជាបងប្អូនជនជាតិភាគតិចព្នង រស់នៅក្នុងភូមិស្រែនន ឃុំកន្ទួត ស្រុកចិត្របុរី មានទីតាំងនៅប្របនឹងដងព្រែកទេរ បានកើតអាការពុលរហូតដល់ស្លាប់ជាបន្តបន្ទាប់ និងជា២០០នាក់ទៀតក៏រងនឹងការពុលនេះដែរ ។ ស្ថានភាពពុលពេលនោះត្រូវបានអាជ្ញាធរកំណត់ថា ផ្តើមចេញពីការពុលទឹកព្រែកទេរ និងពុលស្រា.ស ។ ស្របពេលដែលស្ថានភាពពុលទឹកព្រែក និងស្រា.សមិនទាន់បានធូរស្រាលផង នៅឯស្រុកឆ្លូងឯណោះ ក៏មានពលរដ្ឋប្រុសស្រីក្មេងចាស់ចំនួនជាង៤០នាក់ រស់នៅក្នុងភូមិប្រមា ឃុំកំពង់ដំរី ស្រុកឆ្លូង ក៏ជួបនឹងការពុលដែរ ដោយមានអាការឈឺក្បាល វិលមុខ និងក្អួតចង្អោរ ។ ការពុលនោះត្រូវបានអាជ្ញាធរកំណត់ថា ផ្តើមចេញពីនំអន្សមដែលអាំងលក់ក្នុងភូមិ ហើយអ្នកភូមិបានទិញមកទទួលទាន ។ យ៉ាងណាក៏ដោយ ការពុលនោះមិនបានបណ្តាលឱ្យអ្នកភូមិណាម្នាក់រងគ្រោះថ្នាក់ដល់អាយុជីវិតទេ ដោយគ្រាន់តែមាន២០នាក់រងគ្រោះធ្ងន់ និងបានបញ្ជូនទៅសង្គ្រោះទាន់ពេល ។
ក្រោយពីការពុលដែលកើតឡើងជាប់ៗគ្នានៅស្រុកចិត្របុរី និងស្រុកឆ្លូង បានធូរស្រាលបន្តិច មកដល់ពាក់កណ្តាលខែឧសភាដដែល ការពុលក៏កើតមានសាជាថ្មីមួយករណីទៀតទៅលើក្មេងប្រុសស្រី២នាក់ នៅឃុំកំពង់ចាម ស្រុកសំបូរវិញម្តង ។ ការពុលលើកនេះ ត្រូវបានអាជ្ញាធរកំណត់ថាបណ្តាលមកពីនំកញ្ចប់ និងបណ្តាលឱ្យក្មេងស្រីអាយុ១១ឆ្នាំម្នាក់ស្លាប់ និងក្មេងប្រុសអាយុ១០ឆ្នាំម្នាក់រងគ្រោះ ។ លុះរំលងបាន១០ថ្ងៃក្រោយមក ក៏ផ្ទុះបាតុភាពពុលមួយទៀត ដែលផ្តើមចេញពីការពុលពីនំប៉័ង ។ ការពុលជាលើកចុងក្រោយនៅចុងខែឧសភានេះ ធ្វើឱ្យពលរដ្ឋនៅឃុំចង្ក្រង់ស្រុកចិត្របុរី ចំនួនជាង៧០នាក់ភាគច្រើនជាកុមារ ត្រូវបានអាជ្ញាធរចបញ្ជូនទៅសង្គ្រោះ ។ ក្រុមមន្ត្រីនៃមន្ទីរសុខាភិបាលខេត្តសន្និដ្ឋានថា ការពុលនេះផ្តើមចេញពីនំប៉័ងដែលមានសារធាតុពុល តែការពុលនេះមិនបានសម្លាប់ជីវិតមនុស្សទេ ៕
ចែករំលែកព័តមាននេះ