ខេត្តកំពង់ធំ ៖ បើតាមសេចក្តីរាយការណ៍បានឱ្យដឹងថា ក្មេងស្រី២បងប្អូនបានឱបគ្នាលង់ទឹកស្រះស្លាប់អាណោចអាធ័ម ខណៈឪពុកម្តាយរបស់ពួកគេបានប្រើឱ្យដឹកគោទៅផឹកទឹក ហេតុការណ៍បានកើតឡើងកាលពីម៉ោង១២និង៣០នាទីថ្ងៃត្រង់ ថ្ងៃទី២៨ ឧសភា ស្ថិតនៅចំណុចស្រះទឹកមួយកន្លែង ក្នុងភូមិត្រពាំងទូក ឃុំបាក់ស្នា ស្រុកបារាយណ៍។
លោកវរសេនីយ៍ត្រី សន តាល់ អធិការរងនគរបាលស្រុកបានឲ្យដឹងថា ជនរងគ្រោះទាំងពីរនាក់បងប្អូនខាងលើ ១-ឈ្មោះ ស៊ៀន ឡាត់ ភេទស្រី អាយុ១៤ឆ្នាំ និង២-ឈ្មោះ ស៊ៀន លីស ភេទស្រី អាយុ៨ឆ្នាំ មានឪពុកឈ្មោះ រស់ លៃ អាយុ៤៣ឆ្នាំ និងម្តាយឈ្មោះ វន សាលី អាយុ៤១ឆ្នាំ រស់នៅភូមិ-ឃុំកើតហេតុខាងលើ។
បើតាមការឲ្យដឹងពីសាច់ញាតិនិយាយថា មុនកើតហេតុ ក្មេងស្រីទាំងពីរនាក់បងប្អូនត្រូវបានឪពុកម្តាយប្រើឲ្យពួកនាងដឹកគោយកទៅឲ្យផឹកទឹកស្រះមួយកន្លែងដែលមានចម្ងាយប្រហែលជា១៥០ម៉ែត្រពីផ្ទះ ដោយបាត់កូនៗយូរពេកមិនឃើញត្រឡប់មកផ្ទះ ហើយឃើញតែគោដើរចុះឡើងៗ ក៏នាំគ្នាដើរទៅរកកូននៅស្រះទឹកខាងលើ ស្រាប់តែប្រទះឃើញតែស្បែកជើងកូននៅលើគោកក្បែរមាត់ស្រះ ។ ភ្លាមនោះក៏នាំគ្នាលោតចុះទឹកមុជរាវរកឃើញកូនទាំងពីរនាក់អោបគ្នាស្លាប់យ៉ាងអាណោចអាធ័មនៅក្នុងទឹកស្រះបាត់ទៅហើយ ដោយ ក៏មិនដឹងថា ពួកគេទាំងពីរនាក់ស្លាប់ដោយសារចុះងូជទឹក ឬក៏ពេលដែលដឹកគោទៅឲ្យផឹកទឹកស្រះនោះត្រូវប្អូនស្រីរអិលជើងធ្លាក់ចូលទឹក ហើយបងស្រីឃើញក៏ចុះទៅជួយ ទើបបណ្តាលឲ្យលង់ទឹកស្លាប់យ៉ាងអាណោចអាធ័មយ៉ាងដូច្នេះនោះឡើយ ហើយក៏នាំគ្នាស្រង់ជនរងគ្រោះទាំងពីរនាក់យកមកផ្ទះ។
ក្រោយពេលទទួលបានព័ត៌មាននេះ កម្លាំងជំនាញក៏បានចុះដល់ទីកន្លែងកើតហេតុពិនិត្យសពឃើញថា ជនរងគ្រោះពិតជាស្លាប់ដោយសារទៅលង់ទឹកស្រះប្រាកដមែន ក៏បានប្រគល់សពជូនក្រុមគ្រួសារយកធ្វើបុណ្យតាមប្រពៃណី៕
ចែករំលែកព័តមាននេះ