ខេត្តព្រៃវែង ៖ សេចក្តីរាយការណ៍ឱ្យដឹងថា មានរឿងនឹកស្មានមិនដល់មួយ និងធ្វើឱ្យមានការភ្ញាក់ផ្អើលពេញក្នុងមន្ទីរពេទ្យបង្អែកអ្នកលឿងផងដែរ ក្រោយពីក្រុមគ្រូពេទ្យបានវះកាត់បង្កើតទារកចម្លែកមានក្បាលតែមួយ ប៉ុន្តែមានខ្លួនដល់ទៅ២ ហើយមានជើង៤ និងដៃ៤ ។ ហេតុការណ៍នេះ កើតឡើងកាលពីវេលាម៉ោង២រសៀលថ្ងៃទី២៥ ឧសភា ស្ថិតក្នុងមន្ទីរពេទ្យបង្អែកអ្នកលឿង ។
ប្រភពពីក្រុមគ្រូពេទ្យនៅក្នុងមន្ទីរពេទ្យបានអោយដឹងថា ទារកចម្លែកនេះបានចាប់កំណើតក្នុងគ្រួសារមួយ ដែលជាគ្រូពេទ្យបម្រើការនៅស្រុកពាមជរ និងមានទីលំនៅក្នុងស្រុកពាមរក៍ ខេត្តព្រៃវែង ហើយក៏ជាកូនដំបូងសំរាប់គ្រួសារនេះដែរ ។ ប្រភពដដែលបន្តថា ម្តាយទារកចម្លែកនេះ ត្រូវបានក្រុមគ្រូសារនាំមកដល់មន្ទីរពេទ្យនៅវេលាម៉ោង០៩ព្រឹកថ្ងៃដដែល ហើយក្រោយពីក្រុមគ្រូពេទ្យពិនិត្យឃើញថា ស្ថានភាពអ្នកម្តាយមិនស្រួលពិបាកបង្កើតកូន ទើបនៅវេលាម៉ោង២រសៀលថ្ងៃដដែល ក្រុមគ្រូពេទ្យក៏សម្រេចធ្វើការវះកាត់បង្កើត ។ ជាលទ្ធផល ការវះកាត់នេះក៏ទទួលបានជោគជ័យ ប៉ុន្តែបែរជាមានរឿងភ្ញាក់ផ្អើលកើតឡើង ដោយសារតែទារកដែលក្រុមគ្រូពេទ្យវះកាត់បង្កើតបាន គឺជាទារកចំឡែកដែលមានក្បាលមួយ ខ្លួន២ និងដៃ៤ជើង៤ ហើយពុំមានដុះហេតុបញ្ជាក់ថា ជាស្រីឬប្រុសនោះទេ ដែលគេកម្រនិងជួបប្រទះបំផុត ។
ក្រុមគ្រូពេទ្យបានបញ្ជាក់ថា ថ្វីដ្បិតតែការវះកាត់ទទួលបានជោគជ័យ ប៉ុន្តែក្រោយពីចាប់កំណើតបានប្រមាណជា១ម៉ោងប៉ុណ្ណោះ ទារកចម្លែកនេះក៏បានស្លាប់ទៅវិញ ហើយក្រុមគ្រួសារ ក៏បាននាំយកសាកសពទៅធ្វើបុណ្យនៅឯស្រុកវិញនៅក្នុងថ្ងៃដដែលនោះតែម្តង ចំណែកឯម្តាយ គឺនៅសម្រាកព្យាបាលមុខរបួសនៅក្នុងមន្ទីរពេទ្យបង្អែកអ្នកលឿងនៅឡើយទេ ។
ចែករំលែកព័តមាននេះ