ខេត្តបាត់ដំបង ៖ សមត្ថកិច្ចបានរាយការណ៍ថា រថយន្តម៉ាកឡិចស៊ីស RX-300 មួយគ្រឿងខណៈដែលកំពុងបើកបរស្រាប់តែមានអគ្គិភ័យកើតឡើងឆេះផ្នែកខាងមុខផ្សែងហុយទ្រលោមបង្កឲ្យមានការភ្ញាក់ផ្អើលយ៉ាងខ្លាំង កាលពីវេលាម៉ោង៥ល្ងាច ថ្ងៃទី២៥ ឧសភានេះ នៅលើផ្លូវជាតិលេខ៥៧ ត្រង់ចំណុចខាងមុខសាលាបឋមសិក្សាភ្នំសំពៅ ស្ថិតក្នុងភូមិភ្នំសំពៅកើត ឃុំភ្នំសំពៅ ស្រុកបាណន់។
សេចក្ដីរាយការណ៍បានឲ្យដឹងទៀតថា រថយន្តម៉ាកឡិចស៊ីស RX-300 នោះពណ៌ស ពាក់ស្លាកលេខ បាត់ដំបង 2B-3968 ស៊េរីឆ្នាំ២០០២ ដែលម្ចាស់ឈ្មោះ ឌីន សៅ ភេទប្រុស អាយុ៣៥ឆ្នាំ រស់នៅភូមិអូរតាទាក ឃុំអូរតាតោក ស្រុកសំឡូត មុខរបរធ្វើចម្ការ។ បើតាមសមត្ថកិច្ចដែលបានសួរនាំ ម្ចាស់រថយន្តបានបញ្ជាក់ថា រថយន្តនោះបានបង្កជាអគ្គិភ័យ ខណៈដែលកំពុងធ្វើដំណើរពីបាត់ដំបង ត្រឡប់ទៅផ្ទះវិញនៅឯស្រុកសំឡូត។ ប៉ុន្តែពេលបើកដល់ចំណុចខាងលើស្រាប់តែផ្ទុះឆេះផ្នែកខាងមុខ បង្កជាផ្សែងសក្បុសដោយមិនដឹងមូលហេតុ តែមិនបង្កឲ្យមានគ្រោះថ្នាក់ដល់មនុស្សទេ៕
ចែករំលែកព័តមាននេះ