ខេត្តកណ្ដាល ៖ ប្រជាពលរដ្ឋជាង២០នាក់ ដែលតំណាងឲ្យជាង១០០គ្រួសារនៅក្នុងភូមិឈូកធំ ឃុំឆក់ឈើនាង ស្រុកអង្គស្នួល បានលើកគ្នាទៅកាន់ទីតាំងផ្លូវដែលក្រុមហ៊ុនជីកដីតាក់ជីឡៅ ដែលកាយបំផ្លាញដឹកយកអាចម៌ដីលក់ ធ្វើការតវ៉ាសុំឲ្យក្រុមហ៊ុនមួយនេះធ្វើយ៉ាងណាដឹកដីយកទៅ ចាក់បំពេញផ្លូវឲ្យដូចដើមឡើងវិញ។…
ខេត្តកណ្ដាល ៖ ប្រជាពលរដ្ឋជាង២០នាក់ ដែលតំណាងឲ្យជាង១០០គ្រួសារនៅក្នុងភូមិឈូកធំ ឃុំឆក់ឈើនាង ស្រុកអង្គស្នួល បានលើកគ្នាទៅកាន់ទីតាំងផ្លូវដែលក្រុមហ៊ុនជីកដីតាក់ជីឡៅ ដែលកាយបំផ្លាញដឹកយកអាចម៌ដីលក់ ធ្វើការតវ៉ាសុំឲ្យក្រុមហ៊ុនមួយនេះធ្វើយ៉ាងណាដឹកដីយកទៅ ចាក់បំពេញផ្លូវឲ្យដូចដើមឡើងវិញ។ ការតវ៉ានោះបានធ្វើឡើងកាលពីវេលាម៉ោង៣រសៀល ថ្ងៃទី២៣ ខែឧសភា ឆ្នាំ២០១៨ នៅតាមផ្លូរទេះភ្លើងថ្មី ឬផ្លូវបង្គោលភ្លើង (ផ្លូវកសាងក្នុងរបបប៉ុលពត) ស្ថិតនៅក្នុងភូមិឈូកធំ ឃុំឆក់ឈើនាង ស្រុកអង្គស្នួល ខេត្តកណ្ដាល។ ប្រជាពលរដ្ឋបាននិយាយថា កាលពីពេលថ្មីៗនេះពួកគាត់បានស្នើរសុំឲ្យក្រុមហ៊ុនតាក់ជីឡៅនេះជួយសាងសង់ស្ពានមួយដែលចាស់ទ្រុឌទ្រោមតាមផ្លូវលំមួយខ្សែអមផ្លូវរទេះភ្លើងថ្មីនេះ។ ប៉ុន្តែក្រុមហ៊ុននេះមិនបានយល់ព្រមធ្វើទេ បែរជាសុំដាក់ លូកាត់ទទឹងផ្លូវរទេះភ្លើងថ្មីនេះវិញ និងបានឲ្យពួកគាត់ផ្ដិតមេដៃយល់ព្រមផងដែរ។
ខណៈនោះដោយសារ តែចង់បានលូរំដោះការលិចលង់ពួកគាត់បានយល់ព្រមឲ្យក្រុមហ៊ុនមួយនេះដាក់លូ។ លុះដល់វេលាព្រឹកថ្ងៃទី១៨ ខែឧសភា ឆ្នាំ២០១៨ កន្លងមកនេះមានការធ្វើពិធីបើកការដ្ឋានដាក់លូ កាត់ទទឹងផ្លូវខាងលើនោះ ដែលបានប្រព្រឹត្តទៅក្រោមអធិបតីភាពលោកនាយឧត្តសេនីយ៍ ស៊ូ គឹមស៊ុន ប្រធានគណៈពង្រឹងឃុំឆក់ឈើនាង និងជាអនុប្រធានគណៈពង្រឹងស្រុកអង្គស្នួល លោក នីម នីរ៉ាដេត អភិបាលស្រុកអង្គស្នួល លោក តាក់ ជីឡៅ អនុប្រធានគណៈពង្រឹងឃុំឆក់ឈើនាង និងជាឈ្មួញរណ្ដៅដីខាងលើ និងមានការចូលរួមពីសំណាក់បងប្អូនប្រជាពលរដ្ឋជាច្រើនទៀតផងដែរ។ ប្រភពដដែលបានបន្តទៀតថា ប៉ុន្តែក្រោយពេលបើកករដ្ឋានរួចបាន១ថ្ងៃគឺនៅថ្ងៃទី១៩ ខែឧសភា ពួកគាត់បានឃើញក្រុមហ៊ុន តាក់ជីឡៅ ដែលប្រធានក្រុមហ៊ុននេះឈ្មោះតាក់ជីឡៅ អនុប្រធានក្រុមគណៈពង្រឹងចុះជួយឃុំឆក់ឈើនាងដាក់គ្រឿងចក្រទៅកាន់ទីនោះធ្វើសកម្មភាពកាយដី។
ពេលនោះមុនដំបូងពួកគាត់ស្មានថា កាយដាក់លូដែលបើកការដ្ឋាននោះ ប៉ុន្តែផ្ទុយទៅវិញបែរជាកាយដីផ្លូវ ដាក់រថយន្តដឹកចេញជាបន្តបន្ទាប់យកទៅលក់បែបនេះទៅវិញ ដោយមិនមែនកាយទទឹងផ្លូវដាក់ លូឡើយ។ ដីផ្លូវខាងលើត្រូវបានក្រុមហ៊ុននេះបានកាយអស់ប្រមាណ២០០ម៉ែត្រជម្រៅជិត៣ម៉ែត្រ និងបានដឹកយកចេញតាមរថយន្តយីឌុបកង់១០ និងកង់៦រាប់រយឡាន។ ប្រភពខាងលើបានបន្តទៀតថា ដោយសារតែទង្វើបោកប្រាស់លេងបីសន្លឹកពីសំណាក់ក្រុមហ៊ុននេះមកលើពួកគាត់បែបនេះពួកគាត់មានការក្ដៅក្រហាយខ្លាំងណាស់ ហើយរហូតមកដល់វេលាល្ងាចថ្ងៃទី២២ ខែឧសភា ពួកគាត់បានទៅ ហាមឃាត់ឈប់ឲ្យកាយតទៅទៀត។ ខណៈនោះផ្លូវត្រូវបានក្រុមហ៊ុនតាក់ជីឡៅនេះកំពុងកាយដឹកចេញ យ៉ាងមមារញឹក និងបានទំនាក់ទំនងទៅលោកស្រីមេឃុំឲ្យចុះទៅពិនិត្យមើល។
ក្រោយមកក្រុមហ៊ុននេះ មិនព្រមឈប់កាយទេបានបន្តកាយ និងដឹកចេញរហូតដល់យប់ទើបឈប់ លុះព្រឹកឡើងបន្តកាយ និងដឹកចេញបានជាច្រើនរថយន្តទៀត ហើយដោយសារតែពួកគាត់រករឿងខ្លាំង និងឃើញសារព័ត៌មានកោះសន្តិភាពចុះផ្សាយពីបញ្ហានេះ ទើបឈប់ និងដឹកគ្រឿងចក្ររត់បាត់។ ប្រជាពលរដ្ឋបានបន្តថា កាលពីដំបូងក្រុមហ៊ុន តាក់ជីឡៅនេះ បានជីកដីនៅក្នុងភូមិត្រពាំងសុពណ៌ ឃុំឆក់ឈើនាង ប៉ុន្តែដោយទីនោះបាក់ដីប្រជាពលរដ្ឋច្រើនពេក ម្យ៉ាងក្បែរភូមិដ្ឋានប្រជាពលរដ្ឋ និងត្រូវបានប្រជាពលរដ្ឋប្ដឹងច្រើនផង។ ទើបប្ដូរទីតាំងមកជីកដីនៅក្នុងភូមិកណ្ដាល ឃុំឆក់ឈើនាងដដែលនោះវិញដែល រហូតមកដល់ពេលនេះបានក្លាយទៅជារណ្ដៅយ៉ាងធំ និងជ្រៅហួសបទដ្ឋានបច្ចេកទេសទៅហើយ។ ប៉ុណ្ណឹងហើយមិនទាន់អស់ចិត្តទេ ប្រធានក្រុមហ៊ុននេះគឺលោក តាក់ ជីឡៅ ក្នុងនាមខ្លួនជាអនុប្រធានគណពង្រឹងឃុំឆក់ឈើនាងផង បែរជាមកបោកប្រាស់ពួកគាត់ថា ដាក់លូហើយបែរជាកាយដយកដីផ្លូវដែលមានកម្ពស់ប្រមាណ៣ម៉ែត្រ ឲ្យរាបស្មើ និងវាលស្រែបែបនេះទៅវិញ ពួកគាត់ពិតជាមានការថ្នាំងថ្នាក់អាក់អន់ស្រពន់ចិត្តខ្លាំងណាស់។
ពេលនេះពួកគាត់ស្នើរសុំឲ្យអាជ្ញាធរស្រុកអង្គស្នួលចាត់វិធានការឲ្យក្រុមហ៊ុននេះដឹកដីយកទៅចាក់បំពេញផ្លូវសាធារណៈនេះឲ្យដូចដើមវិញនោះពួកគាត់និងបញ្ឈប់ការតវ៉ាហើយ បើមិនដូច្នោះទេមិនឈប់ឡើយ។ ប្រភពមួយនេះបានបញ្ជាក់ថា ផ្លូវលំនោះរឹងមាំណាស់មានប្រវែងរាប់រយគីឡូម៉ែត្រទទឹងជាង២០ម៉ែត្រ តភ្ជាប់ពីផ្លូវអូរដឹមកប់ស្រូវ ស្ថិតនៅក្នុងសង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ឆ្ពោះទៅកាន់ខេត្តព្រះសីហនុ ដោយបានឆ្លងកាត់ខេត្តកំពង់ស្ពឺផងដែរ។ ផ្លូវនេះបានកសាងឡើង ក្នុងរបបកម្ពុជាប្រជាធិបតេយ្យប៉ុលពត ដែលតាមគម្រោងគឺដើម្បីសាងសង់ផ្លូវដែកដឹកទំនិញពី ខេត្តព្រះសីហនុមកភ្នំពេញ ឬពីភ្នំពេញទៅកាន់ខេត្តព្រះសីហនុ។ ប៉ុន្តែមិនទាន់ត្រូវបានកសាងផ្លូវដែក ផងរបបប៉ុលពតត្រូវរំដោះហើយក្រោយថ្ងៃ៧មករា ឆ្នាំ១៩៧៩រហូតមកពួកគាត់បានប្រើប្រាស់ ដល់សព្វថ្ងៃនេះ។
ហើយក៏មានដាំបង្គោលភ្លើងអគ្គីសនីចេញពីតំបន់វារីអគ្គីសនី គីរីរម្យចូលមកភ្នំពេញ លើផ្លូវមួយនេះផងដែរ ហើយពេលនេះបង្គោលភ្លើងអាចប្រឈមនឹងការដួលរលំ ប្រសិនបើក្រុមហ៊ុននេះកាយដីផ្លូវអស់នោះ។ អ្នកភូមិខាងលើបាននិយាយថា ក្រោពេលដែលពួកគាត់តវ៉ាមានលោកអភិបាលរងស្រុកអង្គស្នួលខលមកសួរថា បើគេ(ក្រុមហ៊ុនតាក់ជីឡៅនេះ)ជួយអភិវឌ្ឍន៍ផ្លូវ១ខ្សែក្នុងភូមិជាថ្នូរនឹងការកាយយកដីផ្លូវនេះតើព្រមអត់? ពួកគាត់ឆ្លើយថាអត់ទេ។ លោកអភិបាលរងស្រុករូបនោះបានសួរបន្តថា ចុះកាយយកត្រឹមកន្លះម៉ែត្រព្រមទេ? ពួកគាត់នៅតែបដិសេធន៍មិនព្រមដដែល ហើយនិយាយថា ពួកខ្ញុំចង់បានឲ្យក្រុមហ៊ុននេះដឹកដីចាក់បំពេញផ្លូវឲ្យដូចដើមវិញប៉ុណ្ណោះគឺចប់ហើយ។ ការដែលខលមកអន្តរាគមន៍នេះ ពួកគាត់មិនបានដឹងច្បាស់ពីគោលបំណងឡើយ ប៉ុន្តែគ្រាន់តែដឹងខ្លះៗថា ទង្វើនេះជាប្រយោជន៍ផ្ទាល់ខ្លួនក្រុមហ៊ុនតាក់ជីឡៅ និងតម្រូវចិត្តក្រុមហ៊ុនដែលពុះដីឡូត៍នៅក្បែរនោះប៉ុណ្ណោះ៕
https://youtu.be/yapftl9T2mk
ចែករំលែកព័តមាននេះ