ការតុបតែងលំនៅឋាន ក្រៅពីភាពស្រស់ស្អាតហើយនោះ មនុស្សភាគច្រើនតែងគិតពីជំនឿផ្សេងៗចូលមកពាក់ព័ន្ធផងដែរ ហើយអ្នកខ្លះអាចមានអារម្មណ៍ថា ចង់រកវត្ថុថ្មីៗមកតុបតែងផ្ទះពួកគេនៅពេលឆ្នាំថ្មីជិតមកដល់ ជាដើម។ យើងមកមើលថា ផ្ទះរបស់យើងមានវត្ថុទាំងនេះដែរឬទេ ដែលគេជឿជាក់ថា វាជាសំណាងមិនល្អដល់ផ្ទះ ហើយបើផ្ទះយើងមាន សូមណែនាំឲ្យប្រញាប់យកចេញពីផ្ទះ ។
១-ដាក់កញ្ចក់នៅទល់មុខគ្រែគេង ៖
មានការណែនាំជាច្រើនថា ការដាក់កញ្ចក់នៅទល់មុខគ្រែគេងនោះ មិនមែនជារឿងល្អទេ ព្រោះវាធ្វើឲ្យប៉ះពាល់ដល់ទំនាក់ទំនង និងនាំយកបញ្ហាចូលមកក្នុងផ្ទះ ។
២-ទ្វារខាងមុខផ្ទះពណ៌ខ្មៅ ៖
តាមជំនឿរបស់ជនជាតិចិន ពណ៌របស់ទ្វារផ្ទះ គឺចាត់ទុកជារឿងសំខាន់ដែលមានឥទ្ធិពលដល់ការនាំមកនូវសំណាងល្អ ឬសំណាងអាក្រក់ចូលផ្ទះ ហើយពណ៌ខ្មៅ គឺជាពណ៌ដែលគេជឿថា អាចនាំសំណាងអាក្រក់ចូលផ្ទះ ។
៣-ដើមឈើមានបន្លា ៖
គេជឿថា បន្លារបស់ដើមឈើ នឹងនាំមកនូវសំណាងអាក្រក់មកឲ្យយើង ។ ដូច្នេះ គួរតែចៀសវាងផងដែរ ។
៤-ប្រតិទិនព្យួរខុសកន្លែង ៖
មនុស្សមួយចំនួនតែងព្យួរប្រតិទិននៅក្នុងបរិវេណទ្វារខាងមុខផ្ទះ ដើម្បីរំឭកការចងចាំពីពេលវេលាកន្លងមកក្នុងជីវិត ប៉ុន្តែវានឹងផ្តល់ផលមិនល្អសម្រាប់រយៈពេលយូរដល់អ្នករស់នៅ ។
៥-រូបសំពៅ-ទូកក្រឡាប់ ឬផ្អៀង ៖
គឺជាសញ្ញាបង្ហាញពីក្តីទុក្ខ និងនាំមកនូវកម្លាំងក្នុងផ្លូវអវិជ្ជមានដល់ក្រុមគ្រួសារ ។
៦-នាឡិកាងាប់ ៖
តាមជំនឿហុងស៊ុយតែងណែនាំថា យើងមិនគួរទុករបស់បែកបាក់ ឬខូចហើយនៅក្នុងផ្ទះឡើយ ជាពិសេស នាឡិកាងាប់ ព្រោះវាមានន័យថា គឺជាការស្លាប់បាត់បង់ជីវិត និងអាចនាំមកនូវភាពហិនហោច ឬខាតបង់ចូលក្នុងផ្ទះ ។
៧-គ្រឿងប្រើប្រាស់បាក់បែក (ចាន,កែវ ឬវត្ថុផ្សេងៗ) ៖
សម្រាប់វត្ថុដែលបាក់បែក ឬខូចហើយនោះ យើងមិនគួរទុកវានៅក្នុងផ្ទះបន្តទៀតទេ ព្រោះគេជឿថា វានឹងនាំមកនូវតែភាពមិនល្អចូលមកក្នុងជីវិត និងផ្ទះរបស់យើង ។
៨-ដើមឈើងាប់ ៖
ក្រៅពីដើមឈើដែលមានបន្លាខាងលើហើយ ការបណ្តោយឲ្យមានដើមឈើងាប់នៅក្នុងផ្ទះ គឺចាត់ទុកជាការបណ្តោយឲ្យរឿងមិនល្អ និងសំណាងអាក្រក់ចូលមកក្នុងជីវិត ។ ដូច្នេះ បើអ្នកគិតថា នឹងដាំដើមឈើនោះ គួរតែថែទាំវាយ៉ាងយកចិត្តទុកដាក់ ឬគួរជ្រើសរើសដើមឈើណាដែលមិនចាំបាច់ថែទាំច្រើន ។
៩-កៅអីរង្គើចុះឡើង និងមិនប្រើប្រាស់ ៖
គ្រាន់តែកៅអីរង្គើទៅមកបែបគ្មានមនុស្សណាម្នាក់អង្គុយ គឺមើលទៅដូចជាខ្មោចលងទៅហើយ ហេតុនេះ គេជឿថា បើមានកៅអីរង្គើចុះឡើងដែលយើងមិនបានប្រើប្រាស់នោះ ហើយត្រូវបានគេទុកចោលនៅក្នុងផ្ទះ គឺកម្លាំងនៃថាមពលអាក្រក់នឹងចូលមកជំនួសវិញ ។
រឿងទាំងនេះគឺជាជំនឿរបស់បុគ្គលតែប៉ុណ្ណោះ សាកល្បងពិចារណា និងសម្រេចចិត្តខ្លួនឯងតាមភាពសមស្របចុះ ព្រោះមនុស្សខ្លះអាចចូលចិត្តតុបតែងផ្ទះដោយសម្ភារចាស់ៗ និងមានអារម្មណ៍ថា ការប្រមូលទុកនូវវត្ថុពីសម័យដូនតា គឺជាការកត់ត្រានូវរឿងរ៉ាវផ្សេងៗក្នុងជីវិត ៕
ចែករំលែកព័តមាននេះ