រាជធានីភ្នំពេញ ៖ រថយន្ត២គ្រឿងបានបុកគ្នានៅផ្លូវបំបែកជា៥ធ្វើឲ្យរថយន្តមួយគ្រឿងជ្រុលទៅបុករបងវត្តមហាមន្ត្រីបណ្តាលឱ្យរងការខូចខាត ហេតុការណ៍បានកើតឡើងកាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី១៨ ខែឧសភា ឆ្នាំ២០១៨ នៅចំណុចផ្លូវ២៨៤ កែងនឹងផ្លូវ១៧៣ ខាងក្រោយវត្តមហាមន្ត្រី ស្ថិតក្នុងសង្កាត់អូឡាំពិក ខណ្ឌចំការមន ។
ប្រភពព័ត៌មានពីកន្លែងកើតហេតុបានឲ្យដឹងថា មុនកើតហេតុគេឃើញមានរថយន្តមួយគ្រឿងម៉ាកកាម៉ារី ស៊េរីចាស់មួយគ្រឿង ពណ៌ក្រហម ពាក់ស្លាកលេខ ភ្នំពេញ ២I-៤៣៣៤ បើកបរដោយបុរស៤នាក់តាមផ្លូវ១៧៣ ក្នុងទិសដៅពីត្បូងទៅជើងមកដល់ចំណុចផ្លូវបំបែកជា៥ស្រាប់តែមានរថយន្តមួយគ្រឿងទៀត ម៉ាកឡិចស៊ីស RX-300 ពណ៌ស ពាក់ស្លាកលេខ ភ្នំពេញ ២AT-៦៤៨៧ បើកបរដោយនារីមួយក្រុមមានគ្នាប្រមាណជា៤នាក់បានធ្វើដំណើរដំណើរតាមផ្លូវ២៨៤ក្នុងទិសដៅពីកើតទៅលិចមកចំណុចកើតហេតុក៏បានបុកគា្នជាមួយរថយន្តកាម៉ារីបណ្តាលឲ្យរថយន្តឡិចស៊ីសនោះខ្ទាតទៅបុកនឹងរបងវត្តខូចខាតតិចតួច ចំណែករថយន្តកាម៉ារីខ្ទេចមួយកំណាត់មុខហើយអ្នកបើកបររថយន្តទាំង២នោះពុំមានអ្នកណារងរបួសទេគ្រាន់តែខូចខាតរថយន្តប៉ុណ្ណោះ ។
ក្រោយកើតហេតុរថយន្តទាំង២គ្រឿងបានចចារគ្នាដោយភាគីខាងរថយន្តឡិចស៊ីសបានយករថយន្តកាម៉ារីទៅជួសជុលជូនម្ចាស់គេវិញ ចំណែករបងវត្តដែលខូចខាតនោះខាងសមត្ថកិច្ចបានទាក់ទងទៅខាងគណៈកម្មការវត្តសួរនាំសំណងនៃការខូចខាត ហើយគណៈកម្មការប្រាប់ថា របងវត្តនោះជារបស់រួមរបស់ញាតិញោមពុទ្ធបរិស័ទចំណុះជើងវត្ត ដូច្នេះខាងវត្តមិនបានដាក់តម្លៃនោះទេគឺឱ្យភាគីរថយន្តបង្កជួយចេញតាមសទ្ធាក្រោយមកខាងភាគីរថយន្តបង្កបានប្រមូលលុយគ្នាបានមួយចំនួនប្រគល់ឱ្យសមត្ថកិច្ចដើម្បីសងទៅខាងវត្តបន្តដើម្បីបញ្ចប់រឿង ៕
ចែករំលែកព័តមាននេះ