រាជធានីភ្នំពេញ ៖ បន្ទាប់ពីរប្រកាសទទួលស្គាល់គណបក្សនយោបាយចំនួន៥រួចមកគ.ជ.ប នឹងប្រកាសទទួលស្គាល់គណៈបក្សនយោបាយចំនួន៤បន្ថែមទៀត ។ នេះបើតាមមន្ត្រីជាន់ខ្ពស់គណៈកម្មាធិការជាតិរៀបចំការបោះឆ្នោត ។
ថ្លែងក្នុងកិច្ចប្រជុំជាមួយភាគីពាក់ព័ន្ធនាព្រឹកថ្ងៃទី១៧ ឧសភា នៅទីស្តីការគជបលោក ទេព នីថា អគ្គលេខាធិការ គជប បានឲ្យដឹងថា រហូតមកដល់ពេលនេះគជបបានសម្រេចទទួលស្គាល់គណបក្សនយោបាយចំនួន៥ រួមមានគណបក្សប្រជាជនកម្ពុជា គណបក្សយុវជនកម្ពុជា គណបក្សសញ្ជាតិកម្ពុជា គណបក្សខ្មែររួបរួមជាតិ និងគណបក្សហ្វ៊ុនស៊ិនប៉ិច ។
លោកបន្តថា គ.ជ.បនឹងប្រកាសទទួលស្គាល់គណបក្សនយោបាយចំនួន៤ទៀតនៅថ្ងៃទី១៨ ខែឧសភាខាងមុខនេះ ។ គណបក្សទាំង៤រួមមានទី១- គណបក្សខ្មែរតែមួយ ទី២- គណបក្សសំបុកឃ្មុំសង្គមប្រជាធិបតេយ្យ ទី៣-គណបក្សពន្លឺថ្មី និងទី៤- គណបក្សប្រជាធិបតេយ្យមូលដ្ឋាន ។
លោកបញ្ជាក់ថា« ពេលនេះយើងកំពុងពិនិត្យហើយត្រូវទទួលស្គាល់គណបក្សទាំងនេះ ព្រោះយើងមានរយៈពេល៧ថ្ងៃ សម្រាប់ពិនិត្យសម្រេច ។ ហើយក្នុងរយៈពេល៧ថ្ងៃនេះប្រសិនបើយើងពិនិត្យឃើញឯកសារត្រឹមត្រូវ គឺ គ.ជ.ប និងសម្រេចយល់ព្រម ប៉ុន្តែក្នុងករណីឯកសារមានការខ្វះខាតយើងនឹងឲ្យគាត់បំពេញរយៈពេល៥ថ្ងៃ ។ ក្នុងរយៈពេលប្រសិនបើគណបក្សនយោបាយមិនបានបំពេញគ.ជ.បនឹងប្រកាសមិនទទួលស្គាល់ទេ ហើយគណបក្សនយោ បាយមានសិទ្ធិប្តឹងទៅក្រុមប្រឹក្សាធម្មនុញ្ញ ដើម្បីតវ៉ាក្រុមប្រឹក្សាធម្មនុញ្ញមានរយៈពេល១០ថ្ងៃសម្រាប់ដោះស្រាយ » ។
ជាមួយគ្នានោះដែរលោកទេព នីថា ក៏បានឲ្យដឹងថា នៅថ្ងៃទី១៩ ខែឧសភា គ.ជ.ប នឹងពិនិត្យសម្រេចគណបក្សនយោបាយ គឺគណបក្សសម្ព័ន្ធ ដើម្បីប្រជាធិបតេយ្យផងដែរ ។ ចំណែកគណបក្សចំនួន១០ទៀតដែលបានចុះបញ្ជីបេក្ខជនឈរឈ្មោះបោះឆ្នោតចុងក្រោយនោះគ.ជ.ប នឹងពិនិត្យសម្រេចនៅថ្ងៃទី២១ ខែឧសភា ឆ្នាំ២០១៨ខាងមុខនេះ ។
លោកអគ្គេលខាធិការក៏បានអះអាងថា គណបក្សនយោបាយចំនួន២០ដែលបានចុះបញ្ជីបេក្ខជនឈរនៅគ.ជ.ប មានគណបក្សមួយចំនួនមិនបានដាក់បេក្ខជនឈរឈ្មោះគ្រប់រាជធានីខេត្តនោះទេ ។ គឺមានគណបក្សតែ៩ប៉ុណ្ណោះបានដាក់បេក្ខជនឈរនៅគ្រប់រាជធានីខេត្ត ឬឈរឈ្មោះនៅ២៥មណ្ឌល មានគណបក្សចំនួន១បានឈរឈ្មោះនៅ១៧មណ្ឌល គណក្សចំនួន២បានឈរឈ្មោះនៅ១៦មណ្ឌល គណបក្សចំនួន១ ឈរឈ្មោះនៅ១៣ ….។
លោកក៏បានឲ្យដឹងថា បេក្ខជនដែលគ.ជ.បទទួលបានសរុបទាំងអស់ គឺពេញសិទ្ធិ និងបំរុងមានប្រមាណ៤០៣៥នាក់ ក្នុងនោះមានបេក្ខជនជានារីមានប្រមាណ១៥០៧នាក់ត្រូវជា២៨% ។ ចំនួនការចុះបញ្ជីឈរឈ្មោះរបស់គណបក្សនយោបាយសម្រាប់ឆ្នាំ២០១៨នេះបើធៀបនឹងការចុះបញ្ជីឈរឈ្មោះការបោះឆ្នោតឆ្នាំ២០១៣ ឃើញថា ឆ្នាំ២០១៣ មានគណបក្សនយោបាយចំនួន៨ ហើយមានបេក្ខជនជាង៨៨០នាក់ ក្នុងនោះមានស្ត្រីប្រមាណ១៨% ដូច្នេះការបោះឆ្នោតឆ្នាំ២០១៨នេះ មានចំនួនគណបក្សច្រើន និងអ្នកចុះបញ្ជីបេក្ខជនឈរឈ្មោះក៏មានច្រើន ។
លោកបញ្ជាក់ថា ៖ « អីិញ្ចឹងទេ លើកនេះយើងមានទាំងចំនួនគណបក្សច្រើនដែលចំនួនបេក្ខជនឈរឈ្មោះច្រើនជាងឆ្នាំ២០១៣ ។ ខ្ញុំក៏ជម្រាបជូនថា ចំនួនអ្នកសង្កេតការណ៍មកពីសហភាពសហព័ន្ធយុវជនកម្ពុជា ចំនួន២១៧៨នាក់ ហើយមានអង្កការចំនួនពីរទៀតបានចុះបញ្ជីបេក្ខជន ប្រមាណជាង១ពាន់នាក់ទៀត ហើយពេលនេះគ.ជ.ប កំពុងពិនិត្យ ។ ដោយឡែកយើងក៏បានទទួលអ្នកសង្កេតការណ៍អន្តរជាតិមកពីតំណាងដ្ឋានទូតភូមាចំនួន៣គ.ជ.ប បានសម្រេចទទួល ។ យើងទទួលចុះបញ្ជីអ្នក សង្កេតការណ៍ជាតិរហូតដល់មុនមួយសប្តាហ៍នៃការបោះឆ្នោត និងសម្រាប់អ្នកសង្កេតការណ៍អន្តរជាតិមុន៣ថ្ងៃដល់ថ្ងៃបោះឆ្នោត» ។
សូមជម្រាបថាគ.ជ.បបានហាមឃាតសមាជិកក្រុមប្រឹក្សាឃុំ សង្កាត់ បេក្ខជនឈរឈ្មោះបោះឆ្នោតមេភូមិជំនួយការមេភូមិ និងកម្លាំងប្រដាប់អាវុធមិនអនុញ្ញាតឲ្យធ្វើជាអ្នកសង្កេតការណ៍ ដើម្បីសង្កេតមើលដំណើរការនៃការបោះឆ្នោត និងការរាប់សន្លឹកឆ្នោតទេ ។
គួររឮកថា ការបោះឆ្នោតជ្រើសតាំងអ្នកតំណាងរាស្ត្រនីតិកាលទី៦ ដែលនឹងប្រព្រឹត្តិទៅនៅថ្ងៃទី២៩ ខែកក្កដា ឆ្នាំ២០១៨ មានមណ្ឌលបោះឆ្នោតចំនួន២៥ មណ្ឌលរាជធានីខេត្ត និងការរិយាយល័យបោះឆ្នោតសរុបចំនួន ២២.៩៦៧ ការិយាល័យ ។
បើយោងតាមលទ្ធផលនៃការធ្វើបច្ចុប្បន្នភាពបញ្ជីបោះឆ្នោត និងការចុះឈ្មោះបោះឆ្នោតឆ្នាំ២០១៧ សម្រាប់ការបោះឆ្នោតជ្រើសតាំងអ្នកតំណាងរាស្ត្រនីតិកាលទី៦ ឆ្នាំ២០១៨ ប្រជាពលរដ្ឋដែលមានឈ្មោះនៅក្នុងបញ្ជីបោះឆ្នោតមានចំនួន ៨.៣៨០.២១៧នាក់ ៕
ចែករំលែកព័តមាននេះ