រាជធានីភ្នំពេញ ៖ អាជីវករជាង១០០នាក់ដែលជាម្ចាស់តូបជាង២០០នៅក្នុងផ្សារឯករាជ្យ២ បានប្រមូលផ្ដុំគ្នាធ្វើការតវ៉ាប្រឆាំង និងអ្នកគ្រប់គ្រងផ្សារខាងលើដោយពួកគាត់បានចោទប្រកាន់ថា តម្លើងថ្លៃអនាម័យ និងសន្តិសុខតាមតូបនីមួយៗស្រេចតែចិត្តនឹកឃើញ ។ មិនតែប៉ុណ្ណោះនៅពេលដែលពួកគាត់មិនយល់ព្រមស្រាប់តែអ្នកគ្រប់គ្រងផ្សារនេះបិទភ្លើងមិនឲ្យប្រើប្រាស់ឡើយ បន្ទាប់ពីទទួលរងនូវការគាបសង្កត់បែបនេះទើបពួកគាត់អត់ទ្រាំលែងបាននាំគ្នាធ្វើការតវ៉ាដើម្បីស្វែងរកយុត្តិធម៌ ។ ហេតុការណ៍នេះបានកើតឡើងកាលពីវេលាម៉ោង៩ព្រឹក ថ្ងៃទី១៦ ខែឧសភា ឆ្នាំ២០១៨ នៅក្នុងផ្សារឯករាជ្យ២ ស្ថិតនៅក្នុងភូមិព្រៃព្រីងខាងជើង សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
អាជីវករបាននិយាយថា ពួកគាត់លក់ដូរនៅក្នុងផ្សារឯករាជ្យ២នេះជាច្រើនឆ្នាំកន្លងមកហើយ ដោយអ្នកគ្រប់គ្រងផ្សារនេះបានកំណត់យកតម្លៃសេវាអនាម័យ និងសន្តិសុខក្នុង១ខែតូបមួយចំនួន២០ដុល្លារ ។ ពេលនោះពួកគាត់មិនបានប្រកែកនោះទេបានអនុវត្តន៍តាមគោលការខាងលើនេះរហូតមកមិនដែលមានបញ្ហាអ្វីកើតឡើងឡើយ ទើបតែពេលថ្មីៗនេះស្រាប់តែអ្នកគ្រប់គ្រងផ្សារបានរុះរើគោលការណ៍ចាស់ចោលហើយបានដាក់ចេញនូវគោលការថ្មីមកជំនួសវិញ ។
ប្រភពដដែលបានបន្តទៀតថា កាលពីពេលថ្មីៗនេះអ្នកគ្រប់គ្រងផ្សារបានកំណត់តម្លើងថ្លៃលើការប្រមូលសេវាអនាម័យ និងសន្តិសុខពីលើសេវាចាស់៥ដុល្លារទៀតដែលបានធ្វើឲ្យសេវាមួយនេះឡើងដល់២៥ដុល្លារ ។ ពេលនោះពួកគាត់មិនបានយល់ព្រមបង់តាមការទាមទារតម្លើងថ្លៃស្រេចតែចិត្តនេះឡើយ លុះដល់វេលាព្រឹកថ្ងៃទី១៦ ខែឧសភា ស្រាប់តែអ្នកគ្រប់គ្រងផ្សារខាងលើបិទភ្លើងឈប់ឲ្យប្រើ ដែលបានធ្វើឲ្យរំខាន និងប៉ះពាល់ការលក់ដូរប្រកបអាជីវកម្មពួកគាត់យ៉ាងខ្លាំង ហើយដោយអត់ទ្រាំចំពោះការគាបសង្កត់នេះលែងបានទើបពួកគាត់នាំគ្នាប្រមូលផ្ដុំបះបោរតវ៉ាទាមទាររកយុត្តិធម៌តែម្ដង ។
ទាក់ទិនទៅនឹងហេតុការណ៍នោះមិនអាចសុំការបំភ្លឺពីអ្នកគ្រប់គ្រងផ្សារបានឡើយ ហើយបន្ទាប់ពីអាជីវករផ្ទុះការតវ៉ាបះបោរអាជ្ញាធរសង្កាត់ចោមចៅ៣បានចុះទៅធ្វើការសម្របសម្រួលឲ្យប្រជាពលរដ្ឋមានការស្ងប់ស្ងាត់ និងឲ្យអ្នកគ្រប់គ្រងផ្សារបើកភ្លើងឡើងវិញសិនដែររង់ចាំការដោះស្រាយនៅពេលក្រោយ ៕
ចែករំលែកព័តមាននេះ