ខេត្តកណ្តាល ៖ មានការភ្ញាក់ផ្អើលមួយ កាលពីថ្ងៃទី១៣ ឧសភា នៅក្នុងភូមិស្វាយមាស ឃុំវិហារសួគ៌ ស្រុកខ្សាច់កណ្តាល ខណៈមានការជីកដីធ្វើស្រះទឹក ស្រាប់តែប៉ះចំគគីរមួយដើមមានទំហំធំដែលអាចថា មនុស្សសម័យនេះកម្របានឃើញដែលមានប្រវែងជិត៣០ម៉ែត្រ មានមុខកាត់ទំហុំប៉ុនកង់រទេះកប់ក្នុងដីជម្រៅជាង៤ម៉ែត្រខ្មៅរលោងត្រង់ភ្លឹង ។
ការភ្ញាក់ផ្អើល ដោយសារតែប្រទះឃើញដើមគគីរយក្សកប់ក្នុងដីនេះ បានកើតឡើងខណៈម្ចាស់ដីបានជួលគ្រឿងចក្រមួយគ្រឿងជីកដីធ្វើស្រះទឹក ស្រាប់តែប៉ះចំវត្ថុរឹងខុសធម្មតា ។ លុះកាយរហូតដល់ជម្រៅជាង៤ម៉ែត្រ ទើបដឹងច្បាស់ថា វត្ថុរឹងនេះ គឺជាឈើគគីរដ៏ធំមួយដើម។ បើតាមចាស់ព្រឹទ្ធាចារ្យនៅក្នុងភូមិបានប៉ាន់ប្រមាណថា ដើមគគីរដែលជីកឃើញនេះ មានអាយុមិនក្រោម១.០០០ឆ្នាំឡើយ ។ អ្នកភូមិនិយាយស្រដៀងគ្នាថា ឈើគគីរយក្សមួយដើមនេះប្រហែលជាមានអាយុរាប់រយឆ្នាំមកហើយ អាចត្រូវទឹកជំនន់ហូរនាំមកទើរនៅក្នុងតំបន់ឃុំវិហារសួគ៌នេះ លុះយូរៗទៅក៏កប់ក្នុងដីកាន់តែជ្រៅទៅៗ ដោយគ្មានអ្នកណាដឹងអស់ជាច្រើនសតវត្សមកហើយ ។ បានជាអ្នកភូមិនិយាយដូច្នេះ ព្រោះនៅទីនេះជិតផ្ទះប្រជាពលរដ្ឋ តែមិនដែលបានដឹងថា មានដើមគគីរដ៏ធំកប់ក្នុងដីទេ ហើយតំបន់នេះក៏មិនដែលមានដើមគគីរដុះដែរ ។
រហូតមកដល់ពេលនេះ មិនទាន់មានក្រុមជំនាញណាមួយមកត្រួតពិនិត្យដើមគគីរនេះ ដើម្បីវាយតម្លៃពីអាយុកាល និងមានប្រភពមកពីតំបន់ណានៅឡើយទេ ។វិហារសួគ៌ជាតំបន់ប្រវត្តិសាស្ត្រមួយ និងចាត់ទុកថា ជាតំបន់ដ៏ពិសិដ្ឋមួយសម្រាប់អ្នកគោរពបូជាទៅតាមជំនឿ ព្រមទាំងជាទីសក្ការបូជាបែបព្រះពុទ្ធសាសនាផងដែរ ។ វត្តវិហារសួគ៌ បានបង្កប់នូវអបិយជំនឿយ៉ាងច្រើន ដែលបានបន្សល់ទុកតាំងពីបុរាណកាលរហូតដល់សព្វថ្ងៃនេះ ៕
ចែករំលែកព័តមាននេះ