រាជធានីភ្នំពេញ ៖ អនុគណៈកម្មាការសុវត្ថិភាពចរាចរណ៍ផ្លូវគោករាជធានីភ្នំពេញ បានបន្តចុះទៅចែកខិតប័ណ្ណបិទស្ទីកគ័រអប់រំចរាចរណ៍ និងផ្តល់មួកសុវត្ថិភាពចំនួន២០០មួក ដល់ប្រជាពលរដ្ឋដែលកំពុងធ្វើចរាចរណ៍ នៅរង្វង់មូលកួចកាណុង និងផ្លូវជាតិលេខ៦ ដើម្បីពង្រឹងច្បាប់ចរាចរណ៍ ជាពិសេសកាត់បន្ថយគ្រោះថ្នាក់ចរាចរណ៍ជូនប្រជាពលរដ្ឋ ។ លោក សាំ ពិសិដ្ឋ នាយកមន្ទីរសាធារណៈការ និងដឹកជញ្ជូនរាជធានីភ្នំពេញ បានឲ្យដឹងថា ការចែកខិតបណ្ណ័អប់រំច្បាប់ចរាចរណ៍ និងផ្តល់មួកសុវត្ថិភាពនាពេលនេះ គឺសំដៅដាស់ស្មារតីដល់អ្នកបើកបរទាំងឡាយឲ្យបើកបរម៉ូតូត្រូវពាក់មួកសុវតិ្ថភាព ឯអ្នកបើករថយន្តត្រូវពាក់ខ្សែក្រវ៉ាត់,បើកបរគោរពច្បាប់ចរាចរណ៍,បើកបរមិនស្ថិតក្រោមឥទ្ធិពលនៃគ្រឿងស្រវឹង និងបើកបរត្រូវមាន ការយោគយល់គ្នា ដើម្បីបញ្ចៀសបាននូវគ្រោះថ្នាក់ចរាចរណ៍ ដែលគួរឲ្យភ័យខ្លាច។
លោកបន្តថា បញ្ហាគ្រោះថ្នាក់ចរាចរណ៍ គឺជាបញ្ហាចម្បងដែលរាជរដ្ឋាភិបាល បាន និងកំពុងគិតគូរ និងយកចិត្តទុកដាក់បំផុត ព្រោះបញ្ហាគ្រោះថ្នាក់នេះ តែងតែកើតមាន និងធ្វើឲ្យប្រជាពលរដ្ឋខាតបង់ទ្រព្យសម្បត្តិ និងអាយុជីវិតជារៀងរាល់ថ្ងៃ។ លោក សាំ ពិសិដ្ឋ បានបញ្ជាក់ថា តាមរយៈការយកចិត្តទុកដាក់ និងផែនការជុំរុញពីរាជរដ្ឋាភិបាល ក៏ដូចរដ្ឋបាលរាជធានីភ្នំពេញផងនោះ អនុគណៈកម្មាការសិវត្ថិភាពចរាចរផ្លូវគោករាជធានីភ្នំពេញ បានបន្តចុះទៅចែកខិត្តបណ្ណបិទស្ទីកគរ័អប់រំចរាចរណ៍ និងផ្តល់មួកសុវត្ថិភាព ដល់ប្រជាពលរដ្ឋដែលកំពុងធ្វើចរាចរណ៍ ដើម្បីជួយដាស់តឿនឲ្យប្រជាពលរដ្ឋមានការប្រុងប្រយ័ត្ន និងមានស្មារតីខ្ពស់ក្នុងការបើកបរ ត្រូវគោរពច្បាប់ចរាចរណ៍ ជាពិសេសកាត់បន្ថយគ្រោះថ្នាក់ចរាចរណ៍ជូនប្រជាពលរដ្ឋ ដែលតែងជួបជារៀងរាល់ថ្ងៃ។ សូមបញ្ជាក់ថា ក្នុងពេលចុះអប់រំផ្សព្វផ្សាយច្បាប់ចរាចរណ៍នោះ មានការរៀបចំជាសំនួរចម្លើយ ដើម្បីទទួលរង្វាន់មួក សុវត្ថិភាព ដែលត្រូវចែកជូនចំនួន២០០មួកផងដែរ ៕
ចែករំលែកព័តមាននេះ