ខេត្តមណ្ឌលគិរី ៖ អគារស្នាក់នៅរបស់កម្មករចម្ការកៅស៊ូប៊ិញភ្វឿក១ខ្នង ត្រូវរន្ទះបាញ់បណ្តាលឱ្យឆាបឆេះអស់ទាំងស្រុង កាលពីរាត្រីថ្ងៃទី១១ ឧសភា នៅភូមិពូគង់ ឃុំស្រែព្រះ ស្រុកកែវសីមា ។…
ខេត្តមណ្ឌលគិរី ៖ អគារស្នាក់នៅរបស់កម្មករចម្ការកៅស៊ូប៊ិញភ្វឿក១ខ្នង ត្រូវរន្ទះបាញ់បណ្តាលឱ្យឆាបឆេះអស់ទាំងស្រុង កាលពីរាត្រីថ្ងៃទី១១ ឧសភា នៅភូមិពូគង់ ឃុំស្រែព្រះ ស្រុកកែវសីមា ។ លោក ស៊ុន ប៊ុនធឿន អធិការនគរបាលស្រុកកែវសីមាបានឱ្យដឹងថា ភ្លៀងបានធ្លាក់យ៉ាងខ្លាំងតាំងពីព្រឹកថ្ងៃទី១១ ឧសភា រហូតដល់យប់ ។ ពេលកើតហេតុនោះ ភ្លៀងមិនទាន់រាំងនោះទេ ក៏ស្រាប់តែមានព័ត៌មានពីឃុំស្រែព្រះថា មានករណីរន្ទះបាញ់ចំឃ្លាំងផ្ទុកប្រេងសាំងនិងថ្នាំ កសិករបណ្តាលឱ្យឆាបឆេះទាំងអគារស្នាក់នៅរបស់កម្មករក្រុមហ៊ុនចម្ការកៅស៊ូយ៉ាងសន្ធោសន្ធៅមិនអាចជួយសង្គ្រោះទាន់ឡើយ ។
លោកអធិការបន្តថា គ្រាន់តែទទួលបានព័ត៌មានខាងលើភ្លាមលោកបានដឹកនាំកម្លាំងពន្លត់អគ្គិភ័យដោយផ្ទាល់ដើម្បីជួយពន្លត់ភ្លើង ប៉ុន្តែដោយស្ថានភាពផ្លូវឆ្ងាយរួមនឹងមានភ្លៀងធ្លាក់ខ្លាំងផង ទើបរថយន្តពន្លត់អគ្គិភ័យមិនអាចទៅទាន់ពេលវេលា បានត្រឹមតែបាញ់ពន្លត់គំនររងើកភ្លើងដែលឆេះអគាររាបដល់ដីទៅហើយនោះ ។ ករណីរន្ទះបាញ់នេះធ្វើឱ្យខូចខាតទ្រព្យសម្បត្តិនិងសម្ភារដូចជា ១-អគារស្នាក់នៅរបស់កម្មករក្រុមហ៊ុនទំហំ៥ម៉ែត្រគុណ២៥ម៉ែត្រ១ខ្នង ២-ឃ្លាំងស្តុកសម្ភារចំនួន១ខ្នង ៣-ប្រេងសាំងនិងប្រេងម៉ាស៊ូតចំនួន២០ប៊ីដុង (មួយប៊ីដុងស្មើ៣០លីត្រ) ៤-ម៉ាស៊ីនភ្លើង១គ្រឿង ៥-ម៉ូតូ១គ្រឿង ៦-ជីនិងថ្នាំកសិកម្ម(មានតម្លៃប្រមាណ១ម៉ឺនដុល្លារ)ផងដែរ ។ទោះជាយ៉ាងណាគ្រោះធម្មជាតិនេះមិនបានធ្វើឱ្យប៉ះពាល់ដល់អាយុជីវិតមនុស្សឡើយ ។
គួរបញ្ជាក់ថា ចាប់តាំងពីដើមខែឧសភាមក ស្ថានភាពអាកាសធាតុនៅខេត្តមណ្ឌលគិរី មានភ្លៀងធ្លាក់ស្ទើររៀងរាល់ថ្ងៃ ហើយតែងបង្កឱ្យមានករណីគ្រោះធម្មជាតិជារឿយៗ ដោយករណីខ្លះត្រូវរន្ទះបាញ់ប៉ើងដំបូលផ្ទះ របើកជញ្ជាំង បាក់ដើមឈើកាត់ទទឹងផ្លូវធ្វើដំណើរ…និងចុងក្រោយនេះបានបណ្តាលឱ្យមានអគ្គិភ័យឆាបឆេះអស់អគារស្នាក់នៅរបស់កម្មករកៅស៊ូថែមទៀត ។
គិតត្រឹមវេលាម៉ោង៣និង៣០រសៀល ថ្ងៃទី១៣ ឧសភា កោះសន្តិភាពមិនអាចសុំការបំភ្លឺពីអាជ្ញាធរបាននៅឡើយទេ អំពីករណីគ្រោះធម្មជាតិដែលបានកើតមាននៅទូទាំងខេត្តមណ្ឌលគិរី ថាតើមានមនុស្សរងគ្រោះប៉ុន្មាននាក់ ឬខូចខាតទ្រព្យសម្បត្តិអ្វីខ្លះ ?
ចែករំលែកព័តមាននេះ