Aleix Vidal តូចចិត្តនឹង Barcelona ដោយមិនសូវបានជាន់ទីលាន
តាមប្រភពព័ត៌មាន Marca បានឲ្យដឹងថា គ្រូបង្វឹកក្លិបអ្នកមានបុណ្យ Barcelona លោក Ernesto Valverde មិនសូវជាបានឲ្យ Aleix…
តាមប្រភពព័ត៌មាន Marca បានឲ្យដឹងថា គ្រូបង្វឹកក្លិបអ្នកមានបុណ្យ Barcelona លោក Ernesto Valverde មិនសូវជាបានឲ្យ Aleix Vidal ឡើងទាត់ប៉ុន្មានទេ នៅរដូវកាលនេះ ។ បើគិតទៅ Aleix ចូលប្រកួតបានត្រឹមតែ១២នាទីប៉ុណ្ណោះ តាំងពីខែមីនា មកម្ល៉េះ។ រូបគេកំពុងតែគិតគូរពីរឿងអនាគត ដោយសារតែការមិនផ្តល់ឱកាសពីសំណាក់ក្លិបបែបនេះ ។
Aleix បានចេញមកពីក្លិប Sevilla មកកាន់ Barcelona តែមិនបានល្អដូចចិត្ត ។ នៅក្នុងការប្រកួត១០ប្រកួតរបស់ក្លិបក្នុងរដូវកាលនេះ Aleix បានជាន់ស្មៅតែ២ប្រកួតប៉ុណ្ណោះ ។ ដោយសារតែហេតុនេះហើយមហាជនជឿថា កីឡាករម្នាក់នេះនឹងចាកចេញពីក្លិបអ្នកមានបុណ្យនៅរដូវកាលក្រោយនេះ ។
កន្លងមកថ្មីៗនេះ Aleix បានបង្ហោះរូបបង្ហាញពីអារម្មណ៍ពិបាកចិត្តរបស់ខ្លូននៅលើ Instagram ដោយសរសេរថា «ខ្ញុំអាចដួល តែខ្ញុំនឹងមិននៅដួលរហូតទេ ។ ទោះបីជាមានអ្វីកើតឡើង ខ្ញុំនៅតែសប្បាយចិត្ត ខណៈដែលខ្ញុំមិនដឹងថានឹងទៅទីណា ។ ខ្ញុំក៏មិនអន់ដែរ ហើយខ្ញុំនៅទីនេះ ក្រោកឈរ ហើយតស៊ូជានិច្ច» ។
គួរបញ្ជាក់ផងដែរថា Barcelona នៅមានការប្រកួត២ដងទៀត នៅមុនពេលរដូវកាលនេះត្រូវបញ្ចប់ ។ ការប្រកួតនោះគឺជាការជួបនឹងក្លិប Real Sociedad ៕
ចែករំលែកព័តមាននេះ