ទិន្នផលម្រេចវៀតណាមកើនឡើងខ្លាំង

ថ្ងៃទី ១៤ ខែ ឧសភា ឆ្នាំ ២០១៨

ម៉ោង ១០:២៩

ទីក្រុងហាណូយ ៖ យោងតាមសមាគមម្រេចវៀតណាម (VPA) បានឲ្យដឹងថា ទិន្នផល និងការនាំចេញម្រេចរបស់វៀតណាមបានកើនឡើងយ៉ាងខ្លាំងកាលពីឆ្នាំមុន ប៉ុន្តែតម្លៃ និងប្រាក់ចំណូលពីការនាំចេញបានធ្លាក់ចុះទៅវិញ ។

ក្រសួងកសិកម្ម និងការអភិវឌ្ឍជនបទ និងការិយាល័យស្ថិតិទូទៅ ឲ្យដឹងថា កាលពីឆ្នាំមុន ប្រទេសវៀតណាមដាំម្រេចបានចំនួន១៥ម៉ឺនហិកតា ហើយទទួលបានទិន្នផល២៤ម៉ឺនតោន ឬស្មើនឹង៤៨% នៃផលិតកម្មសរុបទូទាំងពិភពលោក ។

សមាគមម្រេចវៀតណាមបានបន្ថែមថា កាលពីឆ្នាំមុន ការប្រើប្រាស់ថ្នាំសម្លាប់សត្វល្អិតក្នុងប្រទេសវៀតណាមបានកាត់បន្ថយ ពីព្រោះបច្ចុប្បន្ន កសិករវៀតណាមយល់ដឹងពីបច្ចេកទេសធ្វើកសិកម្មល្អប្រសើរជាងមុន ។

តម្លៃម្រេចខ្មៅបានធ្លាក់ចុះពី៥,៨ដុល្លារក្នុង១គីឡូក្រាមកាលពីខែមករាឆ្នាំមុន មកស្មើត្រឹមតែ៣,២ដុល្លារប៉ុណ្ណោះកាលពីខែធ្នូឆ្នាំមុន ។

នាយកដ្ឋានពន្ធដារវៀតណាមនិយាយថា ប្រទេសវៀតណាមនាំចេញម្រេចបានចំនួន២១ម៉ឺន៥ពាន់តោន កើនឡើង២០% ប៉ុន្តែស្មើនឹងទឹកប្រាក់តែ១,១ប៊ីលានដុល្លារប៉ុណ្ណោះ ធ្លាក់ចុះ២២% ។

កត្តាដែលបង្កឲ្យតម្លៃម្រេចធ្លាក់ចុះនេះ រួមមាន បម្រែបម្រួលបរិយាកាស កំណើនផ្ទៃដីដាំដុះ និងកសិករខ្វះបទពិសោធន៍ក្នុងការដាំដុះ ដែលបង្កឲ្យមានកំណើនទិន្នផល ប៉ុន្តែខ្វះគុណភាព ។

សមាគមម្រេចវៀតណាមបានបន្ថែមទៀតថា តម្លៃម្រេចនៅក្នុងត្រីមាសទី១ ឆ្នាំ២០១៨នេះ គឺទាបជាងឆ្នាំមុន ដល់ទៅ៣០%ឯណោះ ។

អគ្គនាយករបស់ក្រុមហ៊ុន Nedspice Processing Viet Nam Ltd., ដែលបានសហការក្នុងវិស័យនេះនៅខេត្ត Binh Phuoc កាលពី៥ឆ្នាំមុន បាននិយាយថា នឹងត្រួតពិនិត្យគុណភាពម្រេចនាំចេញ ព្រមទាំងធ្វើការយ៉ាងជិតស្និទ្ធជាមួយកសិករផងដែរ សម្រាប់ជា
គន្លឹះដោះស្រាយបញ្ហានេះ ។

គេគិតថា ការនាំចេញម្រេចរបស់ប្រទេសវៀតណាមនៅក្នុងឆ្នាំនេះ គឺស្មើនឹងកាលពីឆ្នាំមុនដែរ ពីព្រោះវិស័យនេះនឹងបន្តជួបប្រទះឧបសគ្គជាច្រើនដូចជា បម្រែបម្រួលបរិយាកាស និងជំងឺ ជាដើម ៕