រាជធានីភ្នំពេញ ៖ «ស៊ីក្លូជាមធ្យោបាយធ្វើដំណើរដ៏សំខាន់មួយនិងពេញនិយមក្នុងសម័យសង្គមរាស្ត្រនិយម មានន័យថា ទាំងអ្នកមាននិងអ្នកក្រ គឺនិយមធ្វើដំណើរតាមស៊ីក្លូ ។ វាខុសពីសម័យបច្ចុប្បន្ននេះ មិនសូវមានប្រជាពលរដ្ឋជិះស៊ីក្លូទេ រាល់ថ្ងៃស៊ីក្លូត្រូវបានប្រើប្រាស់ច្រើនតែដឹកអីវ៉ាន់ពីផ្សារទៅផ្ទះ…
រាជធានីភ្នំពេញ ៖ «ស៊ីក្លូជាមធ្យោបាយធ្វើដំណើរដ៏សំខាន់មួយនិងពេញនិយមក្នុងសម័យសង្គមរាស្ត្រនិយម មានន័យថា ទាំងអ្នកមាននិងអ្នកក្រ គឺនិយមធ្វើដំណើរតាមស៊ីក្លូ ។ វាខុសពីសម័យបច្ចុប្បន្ននេះ មិនសូវមានប្រជាពលរដ្ឋជិះស៊ីក្លូទេ រាល់ថ្ងៃស៊ីក្លូត្រូវបានប្រើប្រាស់ច្រើនតែដឹកអីវ៉ាន់ពីផ្សារទៅផ្ទះ ដែលជាម៉ូយប្រចាំថ្ងៃតែប៉ុណ្ណោះ ហើយតម្លៃឈ្នួលទៀតសោតគឺបានតិចតួចប៉ុណ្ណោះ» ។ នេះជាការលើកឡើងលោកតា នៅ អ៊ុន អាយុ៧៨ឆ្នាំ ដែលប្រកបរបរធាក់ស៊ីក្លូតាំងពីសម័យសង្គមរាស្ត្រនិយម ដែលអតីតព្រះមហាក្សត្រសម្តេចព្រះ នរោត្តម សីហនុ គង់ជាព្រះប្រមុខរដ្ឋ ។
លោកតា នៅ អ៊ុន មានស្រុកកំណើតនៅភូមិក្រោក ឃុំសំរោង ស្រុកស្វាយអន្ទរ ខេត្តព្រៃវែង សព្វថ្ងៃពោះម៉ាយ មានកូនប្រុសស្រី៤នាក់ និងមានចៅ៧នាក់ ។ គាត់និយាយថានៅសម័យសង្គមរាស្ត្រនិយម(ចន្លោះឆ្នាំ១៩៥៣-១៩៧០) ស៊ីក្លូមានចំនួនរាប់រយគ្រឿងបម្រើសេវាកម្មដឹកជញ្ជួន ជាពិសេសរាល់ពេលធ្វើដំណើរចេញពីផ្ទះទៅផ្សារ ឬពីផ្ទះទៅកាន់ទីកន្លែងផ្សេងៗ ។
លោកតាដែលមានស្បែកជ្រីវជ្រួញ និងហាក់មានកម្លាំងទន់ខ្សោយទៅហើយនោះ បានបញ្ជាក់ថា បច្ចុប្បន្នគាត់អង្គុយចាំដឹកម៉ូយនៅផ្សារកណ្តាលក្នុងរាជធានីភ្នំពេញ រាល់ថ្ងៃគឺភាគច្រើនដឹកអីវ៉ាន់ពីផ្សារទៅផ្ទះឱ្យម៉ូយតែប៉ុណ្ណោះ ក្នុងតម្លៃឈ្នួលដឹកចន្លោះពី៣.០០០រៀល ទៅ៥.០០០រៀល តាមការជាក់ស្តែងអីវ៉ាន់តិចឬច្រើន ។ ចំណែកអ្នកដំណើរគេមិនហៅស៊ីក្លូជិះទេ គេជិះម៉ូតូឌុប ឬរ៉ឺម៉កម៉ូតូ ឬឡំប្រឺតា ។
លោកតា នៅ អ៊ុន និយាយទៀតថា «ទោះគ្មានកម្លាំងខ្លាំងដូចពីក្មេង តែលោកតាពឹងលើមុខរបរមួយនេះចិញ្ចឹមជីវិត ថ្វីបើមានកូនចៅក្តី ភាគច្រើនគឺដឹកអីវ៉ាន់របស់ម៉ូយ ព្រោះលែងមានអ្នកជិះស៊ីក្លូដូចសម័យមុនហើយ ។ យូរៗម្តង មានភ្ញៀវអន្តរជាតិជួលដឹកកម្សាន្តតាមរមណីយដ្ឋាននានាក្នុងរាជធានីភ្នំពេញ ហើយពួកគេឱ្យលុយជាដុល្លារគឺរយៈពេលពីរម៉ោងបាន១០ដុល្លារដែរ ហើយតម្លៃនេះគាត់មិនទារពីភ្ញៀវទេ គឺស្រេចតែភ្ញៀវឱ្យតាមមនោសញ្ចេតនាតែប៉ុណ្ណោះ» ។ លោកតាបន្តថា ក្នុងមួយថ្ងៃគាត់អាចរកបានពី២ម៉ឺនទៅ៣ម៉ឺនរៀល ក្រោយពីកាត់ថ្លៃហូបបាយនិងថ្លៃជួលស៊ីក្លូ ព្រោះតម្លៃជួលស៊ីក្លូក្នុងមួយថ្ងៃ២ពាន់រៀល រីឯផ្ទះស្នាក់នៅគឺស្នាក់នៅមុខផ្ទះថៅកែស៊ីក្លូតែម្តង មិនអស់លុយទេ ។ ទោះជាយ៉ាងណា លោកតាបានត្អូញត្អែរថា«ឆ្នាំនេះវ័យកាន់តែជ្រេ គឺអាយុ៧៨ឆ្នាំហើយ។
អ៊ីចឹងកម្លាំងមិនមាំទាំទេ ដូច្នេះខ្ញុំប្រហែលជារត់ស៊ីក្លូបានយ៉ាងយូរត្រឹម២ឆ្នាំទៀតប៉ុណ្ណោះ តែមិនដឹងថាពេលឈប់ធ្លាក់ស៊ីក្លូ តើបានលុយពីណាសម្រាប់ចាយវាយខ្លួនឯងនោះឡើយ» ។
លោកតានិយាយបណ្តើរយកដៃកាន់ក្រណាត់ជូតស៊ីក្លូបណ្តើរ ថា ចាប់តាំងពីសម្តេចតេជោ នាយករដ្ឋមន្ត្រី ហ៊ុន សែន បង្កើតមូលនិធិត្រីចក្រយានកម្ពុជា(មូលនិធិស៊ីក្លូ) កាលពីដើមឆ្នាំ២០១៨មកដល់ពេលនេះ គាត់មិនទាន់បានចូលជាសមាជិកមូលនិធិនេះនៅឡើយទេ ព្រោះមិនទាន់ដឹងថាត្រូវទាក់ទងទៅខាងណា ។
លោកតាបញ្ជាក់យ៉ាងខ្លីថា «ទោះដឹងថាកម្លាំងខ្សោយ ក៏ប្រឹងដឹកអីវ៉ាននិងធាក់ស៊ីក្លូដឹកភ្ញៀវដែរ ព្រោះគាត់មិនអាចដើរសុំទានគេឡើយ ។ ចំណែកសម្រាប់ទស្សនៈពលរដ្ឋទូទៅដែលនៅអាល័យពីស៊ីក្លូនិយាយថា ពួកគាត់ចង់ឃើញការអភិរក្សស៊ីក្លូនេះឱ្យនៅស្ថិតស្ថេរគង់វង្សរហូតទៅ តែបើឱ្យពួកគាត់ជិះស៊ីក្លូនោះគឺពិបាកក្នុងការសម្រេចចិត្ត ព្រោះអ្នកធាក់ស៊ីក្លូច្រើនជាមនុស្សចាស់ បើហៅគាត់ជិះគាត់ប្រើកម្លាំងធាក់អាណិតគាត់ណាស់ ។
ក្នុងចេតនារក្សាស៊ីក្លូមិនឱ្យបាត់បង់ទៅថ្ងៃមុខ សម្តេចតេជោ ហ៊ុន សែន បានប្រកាសបង្កើតមូលនិធិត្រីចក្រយានកម្ពុជា(មូលនិធិស៊ីក្លូ) កាលពីខែមករា ឆ្នាំ២០១៨ ដែលមានរូបសម្តេចផ្ទាល់ជាប្រធានកិត្តិយស ។ សម្តេចតេជោនាយករដ្ឋមន្ត្រី ក៏បានប្រាប់ពីអត្ថប្រយោជន៍ជាច្រើនដែលអ្នកធាក់ស៊ីក្លូនឹងទទួលបាននៅពេលចូលជាសមាជិកមូលនិធិនេះ ។ អត្ថប្រយោជន៍មួយក្នុងចំណោមអត្ថប្រយោជន៍សំខាន់ៗនោះគឺ សមាជិកមូលនិធិត្រីចក្រយានកម្ពុជា នឹងទទួលបានការព្យាបាលជំងឺតាមមន្ទីរពេទ្យរដ្ឋដោយមិនបង់ប្រាក់ ការទទួលបានប្រាក់ឧបត្ថម្ភចំនួន៧.០០០រៀលក្នុងមួយថ្ងៃ ក្នុងនោះ២.០០០រៀល សម្រាប់ថ្លៃជួលស៊ីក្លូ និង៥.០០០រៀលទៀតសម្រាប់ថ្លៃបាយ ហើយប្រាក់នេះនឹងបើកជូនរៀងរាល់១០ថ្ងៃម្តង ។
សម្រាប់លោក ហាក់ លន់ អាយុ៥៥ឆ្នាំ ដែលប្រកបរបរធាក់ស៊ីក្លូដែរនិយាយថា គាត់ជ្រើសរើសមុខរបរប្រើកម្លាំងកាយនេះដោយសារតែនៅឯស្រុកកំណើត«គ្មានដីធ្វើស្រែចម្ការដើម្បីចិញ្ចឹមគ្រួសារ ។ គាត់សុខចិត្តចាកចោលប្រពន្ធកូន ហើយមកនៅភ្នំពេញចាប់យកមុខរបរធាក់ស៊ីក្លូ ព្រោះយ៉ាងណាក៏អាចរកបានចំណូលជួយដល់ជីវភាពគ្រួសារបានខ្លះៗដែរ ទោះបីឥតមានលុយកាក់សល់ជាដុំកំភួនក៏ដោយ» ។
លោក ហាក់ លន់ មានស្រុកកំណើតនៅភូមិត្រពាំងគង ឃុំស្នំក្រពើ ស្រុកគងពិសី ខេត្តកំពង់ស្ពឺ ។ គាត់បាននិយាយរៀបរាប់ប្រាប់កោះសន្តិភាព ខណៈកំពុងចតស៊ីក្លូរង់ចាំម៉ូយនៅច្រកចូលផ្សារអូរឫស្សី ដែលជារៀងរាល់ថ្ងៃគាត់តែងតែចាំដឹកម៉ូយនៅទីនោះ ។ គាត់មានប្រពន្ធនិងកូន៥នាក់នៅឯស្រុកកំណើត ប៉ុន្តែដោយសារគ្មានដីធ្វើស្រែចម្ការ ទើបត្រូវបង្ខំចិត្តចាកចោលគ្រួសារមកនៅភ្នំពេញចាប់យកមុខរបរធាក់ស៊ីក្លូនេះអស់រយៈពេលជាង២០ឆ្នាំមកហើយ ដោយមកស្នាក់នៅផ្ទះថៅកែស៊ីក្លូម្តុំផ្សារទួលទំពូង រីឯស៊ីក្លូជួលក្នុងមួយថ្ងៃ២.០០០រៀល ។ ក្នុងមួយថ្ងៃគាត់រកបានប្រាក់ពីកម្លាំងញើសឈាមរបស់គាត់ ក្រោយពីហូបបាយ និងកាត់ថ្លៃជួលស៊ីក្លូរួចនៅសល់ជួនកាល១០.០០០រៀល ទៅ១៥.០០០រៀល ហើយក្នុងមួយខែអាចមានលទ្ធភាពផ្ញើទៅប្រពន្ធនៅឯស្រុកពី៣០ម៉ឺនរៀលទៅ៤០ម៉ឺនរៀលដែរ ។
លោក ហាក់ លន់ បញ្ជាក់ថា ៖ «ចំណូលបានមកពីរបរធាក់ស៊ីក្លូនេះ មិនអាចឱ្យខ្ញុំមានលទ្ធភាពសល់លុយកាក់អ្វីនោះទេ គឺបានត្រឹមតែដោះទ័លមួយគ្រាៗប៉ុណ្ណោះ ។ បើសិនជាត្រូវចំណាយលើថ្លៃស្នាក់នៅ គឺមិនអាចសល់លុយផ្ញើទៅស្រុកឱ្យប្រពន្ធទេ តែរាល់ថ្ងៃគឺបានថៅកែស៊ីក្លូ ឱ្យសម្រាកនៅផ្ទះគាត់ម្តុំផ្សារទួលទំពូង ទើបសល់បានខ្លះៗគ្រាន់ផ្ញើទៅអ្នកផ្ទះ» ។ បច្ចុប្បន្ន ថៅកែស៊ីក្លូនេះក៏ស្ទើរតែអស់ទៅហើយដែរ ខណៈស៊ីក្លូត្រូវបានម៉ូតូឌុបដណ្តើមម៉ូយស្ទើរតែអស់នោះ ។
មន្ត្រីការិយាល័យទេសចរណ៍ខណ្ឌដូនពេញមួយរូប លើកឡើងថា ស៊ីក្លូគឺជាយានជំនិះមួយប្រភេទ ដែលភាគច្រើនគឺជាចំណូលចិត្តរបស់អ្នកទេសចរបរទេសដែលនិយមជិះដើរកម្សាន្តនៅកម្ពុជា ។ ការធ្វើដំណើរតាមស៊ីក្លូ គឺជាការធ្វើដំណើរតាមយានមួយ ដែលគ្មានផ្សែងបំពុលមិនដូចការធ្វើដំណើរតាមត្រីចក្រយានយន្តនោះទេ ។ ទោះបីជាស៊ីក្លូធ្វើដំណើរយឺតមែន ប៉ុន្តែវាអាចឱ្យអ្នកជិះស្រូបយកខ្យល់អាកាសបានល្អ អាចមើលទិដ្ឋភាពក្រុងភ្នំពេញកាន់តែច្បាស់ ហើយមិនខ្លាចមានគ្រោះថ្នាក់ចរាចរណ៍អ្វីឡើយ ។
មន្ត្រីដដែលបញ្ជាក់ថា ក្រោយពីសម្តេចតេជោបានបង្កើតមូលនិធិត្រីចក្រយានកម្ពុជា(ម.ត.ក)ឃើញថា បច្ចុប្បន្ននេះមានអ្នកធាក់ស៊ីក្លូច្រើន ហើយពួកគាត់នាំគ្នាសំចតនៅមុខផ្សារធំថ្មី ផ្សារចាស់ ផ្សារកណ្តាល និងរមណីយដ្ឋាននានាក្នុងខណ្ឌដូនពេញ ។ ស៊ីក្លូគឺជាយានជំនិះមួយប្រភេទដែលបន្សល់ទុកតាំងពីសម័យសង្គមរាស្ត្រនិយម ប៉ុន្តែវត្តមានរបស់ស៊ីក្លូកាន់តែបាត់បង់ទៅដោយសារតែភាពជឿនលឿននៃមធ្យោបាយធ្វើដំណើរសម្រាប់ការដឹកជញ្ជូននាសម័យបច្ចុប្បន្ន ។
យោងតាមរបាយការណ៍របស់សមាគមស៊ីក្លូមួយនៅរាជធានីភ្នំពេញបានឱ្យដឹងថា នៅឆ្នាំ១៩៩៩ មានស៊ីក្លូប្រមាណជា៩ពាន់គ្រឿងនៅទូទាំងប្រទេស តែបានថយចុះនៅត្រឹម៧ពាន់គ្រឿងក្នុងឆ្នាំ២០០៧ និងបន្តថយចុះមកនៅត្រឹមតែ៤៤៧គ្រឿងក្នុងឆ្នាំ២០១៦ ក្នុងរាជធានីភ្នំពេញ ។ ការថយចុះនៃចំនួនស៊ីក្លូនេះ ដោយសារតែគ្មានអ្នកផលិតស៊ីក្លូថ្មីផង និងមិនមានកន្លែងជួសជុលត្រឹមត្រូវ ហើយក៏គ្មានការផលិតគ្រឿងបន្លាស់ ដែលធ្វើឱ្យស៊ីក្លូអាចលែងឃើញមានវត្តមានតទៅទៀតនៅថ្ងៃណាមួយមិនខាន ៕
ចែករំលែកព័តមាននេះ