រាជធានីភ្នំពេញ ៖ គួរឲ្យអាណោចអាធ័ម ដោយសារតែជីវភាពក្រលំបាក កុមារាម្នាក់ដើរតាមបងស្រីទៅបេះត្រកួនបានរអិលដួលលង់ទឹកស្លាប់ បង្កឲ្យមានការភ្ញាក់ផ្អើលកាលពីវេលាម៉ោង១០និង៣០នាទីយប់ថ្ងៃទី១៣ ខែឧសភា ឆ្នាំ២០១៨ នៅត្រពាំងខាងមុខផ្ទះ ដែលស្ថិតនៅភូមិដីថ្មី សង្កាត់ភ្នំពេញថ្មី ខណ្ឌសែនសុខ ។
កុមារារងគ្រោះឈ្មោះ ប៊ុត សុខ ហៅអាផ្លូច អាយុ៧ឆ្នាំ ជាសិស្សថ្នាក់ទី១ នៅសាលាបឋមសិក្សា សុភមង្គល ពោធិ៍ចិនតុង រស់នៅភូមិប៉ប្រកខាងជើង សង្កាត់កាកាប១ខណ្ឌពោធិ៍សែនជ័យ។ ឪពុកឈ្មោះ សាំង បុល អាយុ៤១ឆ្នាំ មុខរបររត់ម៉ូតូឌុប ស្នាក់នៅជាមួយបងស្រី ស្ថិតក្នុងភូមិប៉ប្រកខាងជើង សង្កាត់កាកាប១ ខណ្ឌពោធិ៍សែនជ័យ។
តាមការឲ្យដឹងពីឪពុកកុមារារងគ្រោះបានរៀបរាប់ថា គាត់មានកូនចំនួន៦នាក់ ក្នុងនោះកូនស្រី២នាក់ និងកូនប្រុសចំនួន៤នាក់ ដែលកូនស្រីច្បងអាយុ២០ឆ្នាំ ហើយកូនពៅអាយុ៧ឆ្នាំ ។ ជីវភាពរបស់គាត់សព្វថ្ងៃទីទាល់ក្រ រកព្រឹកខ្វះល្ងាច និងរកល្ងាចខ្វះព្រឹក ដោយគាត់ជាអ្នករត់ម៉ូតូឌុប ហើយបានឲ្យកូនៗរបស់គាត់ រស់នៅជាមួយជីដូនអាយុ៧៤ឆ្នាំ ព្រោះគាត់ជាបុរសពោះម៉ាយ លែងលះប្រពន្ធប្រមាណជាង៣ឆ្នាំមកហើយ ចំណែករូបគាត់ជាអ្នករត់ម៉ូតូឌុប ពេលខ្លះគាត់ឆ្លៀតធ្វើការសំណង់ដើម្បីចិញ្ចឹមកូនៗផងដែរ ។
តាមសម្តីបងស្រី និងឪពុករបស់កុមារារងគ្រោះបាននិយាយថា នៅវេលាម៉ោង៣រសៀលថ្ងៃទី១៣ ឧសភា កូនស្រីរបស់គាត់ដែលទើបអាយុជាង១០ឆ្នាំបានទៅបេះត្រកួននៅត្រពាំងខាងមុខផ្ទះចំងាយប្រមាណ៥០ម៉ែត្រ ដែលរំលងផ្លូវរថភ្លើងជាប់ព្រំប្រទល់ខណ្ឌពោធិ៍សែនជ័យ និងខណ្ឌសែនសុខ នៅពេលនោះដែរ ក្មេងៗបាននាំគ្នាចូលទៅបេះត្រកួនក្នុងត្រពាំងទឹកមានគ្នា៦នាក់ មានកូនអ្នកស្រុកភូមិផងរបងជាមួយខ្លះ នៅពេលនោះកុមារារងគ្រោះខាងលើបានដើរទៅបេះត្រកួនជាមួយបងស្រី លុះបេះហើយ ក្មេងស្រីជាបងបានដើរមកផ្ទះវិញ ឃើញប្អូនមកតាមក្រោយ នាងមិនបានចាប់អារម្មណ៍មើលប្អូនទៀតឡើយ លុះបាត់ប្អូន នាងក៏បានដើររកគ្រប់ច្រកល្ហក តែពុំឃើញឡើយ ។ បន្ទាប់មកឪពុក ព្រមទាំងជីដូនដើររកតាំងពីម៉ោង៣រសៀល រហូតទល់ព្រលប់ នៅមិនឃើញកុមារារងគ្រោះទៀត ពេលនោះឪពុកបានសួរនាំកូនស្រីរបស់គាត់ ដោយដឹងថា ក្មេងៗបានទៅបេះត្រកួននៅត្រពាំងនៅខាងមុខផ្ទះ បន្ទាប់មកប្រជាពលរដ្ឋក្នុងភូមិកើតហេតុដែលមានព្រំប្រទល់ខណ្ឌជាប់គ្នាបាននាំគ្នាចុះរាវរក ខ្លះមុជទឹករកតែពុំឃើញសោះ លុះនាំគ្នារាវរករហូតដល់វេលាម៉ោង១០និង៣០នាទីយប់ ទើបឃើញសពកុមារារងគ្រោះអណ្តែតទឹក ហើយប្រជាពលរដ្ឋបានបីសពមកលើគោក។
ចំណែកជីដូនបានស្រែកយំអាណិតចៅ ហើយគាត់បានរៀបរាប់ថា ជារៀងរាល់ថ្ងៃ ចៅរបស់គាត់តែងសុំលុយទៅរៀន ហើយពេលបងស្រីទៅបេះត្រកួនដូចរាល់ដង គាត់មិនដែលឱ្យចៅ (កុមារារងគ្រោះ) ទៅជាមួយឡើយ ដោយនៅតូចជាងគេពេក។
ក្រោយពេលកើតហេតុ សពកុមារារងគ្រោះខាងលើត្រូវបានមន្ត្រីជំនាញពិនិត្យកោសល្យវិច្ច័យ និងធ្វើលិខិតប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីនៅវត្តពោធិ៍ចិនតុង ៕
ចែករំលែកព័តមាននេះ