ខេត្តបាត់ដំបង៖ អ្នកបើកបររ៉ឺម៉កម៉ូតូដឹកទឹកសុទ្ធលក់ម្នាក់បានរងរបួសធ្ងន់ និងម្នាក់ទៀតជាអ្នករួមដំណើរបានស្លាប់ ដោយសារបើកលឿនជ្រុលធ្លាក់ចូលក្នុងអូរហើយផ្ទុះឆេះកាលពីវេលាម៉ោង៧និង៣០នាទីព្រឹកថ្ងៃទី១៣ឧសភា នៅត្រង់ចំណុចភូមិអូរមុន្នី២ ឃុំអន្លង់វិល ស្រុកសង្កែ។
មន្ត្រីចរាចរណ៍បានឲ្យដឹងថា រ៉ឺម៉កម៉ូតូដឹកទឹកសុទ្ឋនោះជិះគ្នាពីរនាក់ ដោយអ្នកបើករ៉ឺម៉កម៉ូតូឈ្មោះគីន សម្បត្តិ ភេទប្រុស អាយុ៣០ឆ្នាំ រស់នៅភូមិបឹងរាំង សង្កាត់អូរម៉ាល់ ក្រុងបាត់ដំបង រងរបួសធ្ងន់ និងឈ្មោះសម្បត្តិ សំបូរ ភេទប្រុស អាយុ៣៥ឆ្នាំ់ រស់នៅភូមិបោះពោធិ៍ ឃុំអូរដំបង១ ស្រុកសង្កែ ជាអ្នករួមដំណើរបានស្លាប់ ដោយសារភ្លើងឆេះផង និងម៉ូតូសង្កត់ផង។ បើតាមមន្ត្រីដដែលបានបញ្ជាក់ថា អ្នកបើករ៉ឺម៉កម៉ូតូនោះបានបើកលឿនហើយជ្រុលធ្លាក់ក្នុងអូរ ហើយម៉ូតូបានផ្ទុះឆេះទើបបណ្ដាលឲ្យស្លាប់អ្នករួមដំណើរម្នាក់ និងអ្នកបើកបររ៉ឺម៉កម៉ូតូរងរបួសធ្ងន់ផងដែរ។
បើតាមសាក្សីបាននិយាយថា នៅកន្លែងកើតហេតុជាចំណុចផ្លូវកោង ហើយអ្នកបើករ៉ឺម៉កម៉ូតូដឹកទឹកសុទ្ធលក់នោះបើកលឿនខ្វះការប្រុងប្រយ័ត្ន ទើបបត់មិនទាន់ក៏ជ្រុលធ្លាក់ចូលក្នុងអូរតែម្ដង។ សាក្សីដដែលបានបញ្ជាក់ថា ពេលនោះស្រាប់តែម៉ូតូបានផ្ទុះបង្កជាអគ្គីភ័យឆេះទាំងម៉ូតូ ឆេះទាំងអ្នកជិះបណ្ដាលឲ្យស្លាប់ម្នាក់ រីឯម្នាក់ទៀតរបួសធ្ងន់ ហើយត្រូវអ្នកភូមិនិងសមត្ថកិច្ចជួយដឹកទៅកាន់មន្ទីរពេទ្យភ្លាមៗ។
បច្ចុប្បន្ន សពត្រូវបានសមត្ថកិច្ចប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី រីឯអ្នករបួសត្រូវបានបញ្ជូនទៅមន្ទីរពេទ្យបង្អែកខេត្ត ចំណែករ៉ឺម៉កម៉ូតូត្រូវបានសមត្ថកិច្ចយកទៅរក្សាទុកបណ្ដោះអាសន្ន ៕
ចែករំលែកព័តមាននេះ