ខេត្តកំពង់ធំ ៖ បើតាមសេចក្តីរាយការណ៍បានឱ្យដឹងថា គ្រោះធម្មជាតិតែប៉ប្រិចភ្នែកបានឆក់យកជីវិតមនុស្សម្នាក់ស្លាប់យ៉ាងអាណោចអាធ័ម និងម្នាក់របួសស្រាល ព្រមទាំងយកជីវិតគោ៣ក្បាលទៀតក្នុងថ្ងៃតែមួយ ប៉ុន្តែនៅកន្លែងផ្សេងគ្នា។
បើតាមសមត្ថកិច្ចបានឱ្យដឹងថា គ្រោះធម្មជាតិទី១ បានកើតឡើងកាលពីម៉ោង២និង៤០នាទីរសៀល ថ្ងៃទី ១១ ឧសភា ស្ថិតនៅភូមិតាអោង ឃុំចើងដើង ស្រុកបារាយណ៍ ដោយករណីរន្ទះបាញ់ចំជើងសរសផ្ទះបែកដាច់ចំនួន២ដើម បណ្តាលឱ្យម្ចាស់ផ្ទះម្នាក់ឈ្មោះ ប៉ិច ម៉ាច ភេទស្រី អាយុ២៨ឆ្នាំ រងរបួស។ ហើយនៅរសៀលថ្ងៃដដែលនេះ ក៏មានករណីរន្ទះបាញ់ចំគោចំនួន២ក្បាលងាប់ភ្លាមៗ ខណៈពេលមេឃកំពុងភ្លៀងលាយលំនឹងផ្គររន្ទះបាញ់ ស្ថិតនៅភូមិប្រនាគ ឃុំចើងដើង មានម្ចាស់ឈ្មោះ មោញ យេន ភេទប្រុស អាយុ៦២ឆ្នាំ។
សមត្ថកិច្ចឱ្យដឹងទៀតថា ចំណែកគ្រោះធម្មជាតិទី២ កើតឡើងនៅក្នុងស្រុកកំពង់ស្វាយ នៅវេលាម៉ោង៣និង៣០នាទីរសៀល ថ្ងៃទី១១ ឧសភា ស្ថិតក្នុងភូមិខ្សាច់ជីរស់ ឃុំកំពង់គោ ស្រុកកំពង់ស្វាយ រន្ទះបាញ់បុរសស្លាប់ម្នាក់ ដោយជនរងគ្រោះឈ្មោះ អ៊ឹង សំអាន អាយុ២៦ឆ្នាំ រស់នៅភូមិអំពិល ឃុំសំព្រោច ស្រុកស្ទោង ខេត្តកំពង់ធំ ខណៈពេលជនរងគ្រោះទៅបាញ់ថ្នាំស្រូវពេលកំពុងភ្លៀង ស្រាប់តែរន្ទះបាញ់ស្លាប់តែម្តង។ ហើយនៅម៉ោង៤និង៣០នាទី នៅភូមិទៀមចាស់ ឃុំកំពង់ស្វាយ ស្រុកកំពង់ស្វាយ រន្ទះក៏បានបាញ់ស្លាប់គោ១ក្បាល មានម្ចាស់ឈ្មោះ សៀត យីម ភេទស្រី អាយុ៣៧ឆ្នាំ រស់នៅភូមិ-ឃុំកើតហេតុ ខណៈ ម្ចាស់យកគោទៅចង់ឲ្យស៊ីស្មៅនៅខាងក្រោយភូមិពេលមេឃកំពុងភ្លៀងធ្លាក់ បណ្តាលឲ្យរន្ទះបាញ់ស្លាប់។
ចែករំលែកព័តមាននេះ