រាជធានីភ្នំពេញ៖ បុរសម្នាក់ដោយសារតែកំហឹងពុះកញ្ជ្រោល បន្ទាប់ពីឃើញឪពុកចុងឈ្លោះប្រកែកគ្នាជាមួយម្ដាយបង្កើតរបស់ខ្លួនញឹកញាប់ពេក ។ បុរសនោះក៏បានទាញកាំភ្លើងខ្លីដែលបានលាក់ទុកអាម៉េបញ្ចូលគ្រាប់រួចភ្ជង់ក្បាលឪពុកចុងគំរាមបាញ់សម្លាប់ចោល តែក៏ត្រូវបានឪពុកចុងប្ដឹងនគរបាលឲ្យចាប់ខ្លួនតែម្តង។ ហេតុការណ៍នោះបានកើតឡើងកាលពីរសៀលថ្ងៃទី៩ ខែឧសភា ឆ្នាំ២០១៨ ក្នុងភូមិព្រៃកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ ។
នគរបាលបានឱ្យដឹងថា កូនប្រុសដែលជាជនសង្ស័យខាងលើឈ្មោះ ឆាង សារ៉េត អាយុ២១ឆ្នាំ មុខរបរកម្មករសំណង់ ហើយត្រូវនគរបាលដកហូតបានកាំភ្លើងខ្លីម៉ាកកា៥៩ គ្មានលេខ១ដើម និងគ្រាប់១គ្រាប់ ។ ចំណែកឪពុកចុងឈ្មោះ នាង យ៉េត អាយុ៤១ឆ្នាំស្នាក់នៅជាមួយគ្នា ក្នុងភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ ។
នគរបាលបានឲ្យដឹងបន្តទៀតថា កន្លងមកឪពុកចុងបានឈ្លោះប្រកែកគ្នាជាមួយប្រពន្ធដែលត្រូវជាម្ដាយបង្កើតរបស់ជនសង្ស័យញឹកញាប់ ។ លុះនៅសៀលថ្ងៃទី៩ ខែឧសភា ឆ្នាំ២០១៨ បានបន្តឈ្លោះគ្នាម្តងទៀត ធ្វើឲ្យជនសង្ស័យខាងលើខឹងខ្លាំងណាស់ ក៏បានយកកាំភ្លើងខ្លីម៉ាកកា៥៩មួយដើមដែលលាក់ទុកយូរហើយអាម៉េបញ្ចូលគ្រាប់ភ្ជង់ក្បាលឪពុកចុងគំរាមបាញ់សម្លាប់។ ប្រភពដដែលបានបន្តទៀតថា ពេលនោះជនរងគ្រោះជាឪពុកចុងបានដើរគេចចេញ រួចបានទៅប្ដឹងនគរបាលខណ្ឌដង្កោ ឲ្យចុះទៅជួយអន្តរាគមន៍ភ្លាមៗ ប៉ុន្តែជនសង្ស័យដឹងខ្លួនទាន់បានរត់គេចខ្លួនចេញពីផ្ទះ លុះដល់វេលាម៉ោង៥ល្ងាចថ្ងៃដដែល បានត្រឡប់ចូលទៅផ្ទះវិញ ក៏ត្រូវនគរបាលចាប់ខ្លួនតែម្ដង។
ក្រោយពេលឃាត់ខ្លួន ជនសង្ស័យបានសារភាពថា ខ្លួនពិតជាបានធ្វើសកម្មភាពភ្ជង់កាំភ្លើងទៅលើឪពុកចុងប្រាកដមែន ។ ចំណែកអាវុធខ្លីម៉ាកកា៥៩នេះ ខ្លួនរើសបានកាលវេលាម៉ោង៣និង៣០នាទីរសៀលថ្ងៃទី៧ ខែឧសភា ឆ្នាំ២០១៨ ត្រង់ចំណុចមុខវត្តព្រែកថ្លឹង ស្ថិតនៅភូមិព្រែករទាំង សង្កាត់ព្រែកកំពឹស ខណ្ឌដង្កោ ដោយមិនបានយកកាំភ្លើងនោះទៅប្រគល់ជូននគរបាលទេ បានលាក់ទុកគំរាមឪពុកចុងព្រោះខឹងគាត់យូរមកហើយ ដោយសារពូកែរករឿងឈ្លោះទាស់ទែងម្ដាយបង្កើតរបស់ខ្លួនខ្លាំងពេក ៕
ចែករំលែកព័តមាននេះ