ខេត្តកណ្ដាល ៖ នគរបាលស្រុកអង្គស្នួលបានបង្ក្រាបការជួញដូរ និងប្រើប្រាស់គ្រឿងញៀនជាប់ជាប្រចាំដូចភ្លៀងរលឹម ប៉ុន្តែទោះជាយ៉ាងណាក៏មិនអស់ដែរ ដូចជាការវែកវកអញ្ចឹង ព្រោះជនសង្ស័យត្រូវបាននគរបាលឃាត់ខ្លួនបានជាបន្តបន្ទាប់មកហើយ ប៉ុន្តែមិនអស់ទាល់តែសោះនៅតែមានជាហូរហែ។
ជាក់ស្ដែងកាលពីវេលាម៉ោង២និង៣០នាទីរសៀលថ្ងៃទី១០ ខែឧសភា ឆ្នាំ២០១៨ កម្លាំងនគរបាលស្រុកអង្គស្នួល ដហការណ៍ជាមួយកម្លាំងនគរបាលប៉ុស្តិ៍ពើក បានចុះធ្វើការចាប់ខ្លួនជនសង្ស័យក្នុងការជួញដូរគ្រឿង១ក្រុមមានគ្នាចំនួន៣នាក់ខណៈពេលកំពុងធ្វើសកម្មភាពជួញដូរនៅតាមផ្លូវលំ ស្ថិតនៅក្នុងភូមិអង្គសំណាង ឃុំពើកស្រុកអង្គស្នួល ខេត្តកណ្តាល ។
ជនសង្ស័យទាំង៣នាក់នោះរួមមាន១-ឈ្មោះធួក រតនៈ ហៅតឿ អាយុ២២ឆ្នាំ មុខរបរកសិករ មានទីលំនៅក្នុងភូមិទួលស្រម៉ ឃុំពើកស្រុកអង្គស្នួល ខេត្តកណ្តាល ២-ឈ្មោះធួក គន្ធា អាយុ១៥ឆ្នាំ មុខរបរកម្មករចាប់មាន់ មានទីលំនៅក្នុងភូមិទួលស្រម៉ ឃុំពើក ស្រុកអង្គស្នួលខេត្តកណ្តាល និង៣-ឈ្មោះម៉ន សំណាង ហៅម៉ង់ អាយុ៣២ឆ្នាំ ជនជាតិខ្មែរ មុខរបរកម្មករចាប់មាន់ មានទីលំនៅក្នុងភូមិ ទួលស្រម៉ ឃុំពើក ស្រុកអង្គស្នួលខេត្តកណ្តាល ។
នគរបាលបានឱ្យដឹងថា នៅក្នុងប្រតិបត្តិការនោះកម្លាំងបានធ្វើការដកហូតបានវត្ថុតាងមួយចំនួនរួមមាន ថ្នាំញៀនចំនួន៨កញ្ចប់តូច, កាំភ្លើងច្នៃបាញ់គ្រាប់កង់១ដើម, ឧបករណ៍សម្រាប់ប្រើប្រាស់ថ្នាំញៀនមួយចំនួនទៀត, ថ្នាំញៀនចំនួន៦កញ្ចប់តូចរុំស្កុតពណ៌ក្រហមដាក់ក្នុងកញ្ចប់បារី, គ្រាប់កង់ដែលជាគ្រាប់សម្រាប់បាញ់កាំភ្លើងឆ្នៃចំនួន១៩គ្រាប់, ទូរសព្ទ័ដៃ១គ្រឿងម៉ាកអាយខល (iCall) ពណ៌មាស ។ ប្រភពដដែលបានបន្តទៀតថា កម្លាំងបានធ្វើការស្រាវជ្រាវដើម្បីស្វែងរកមុខសញ្ញាប្រព្រឹត្តបទល្មើសគ្រប់ប្រភេទជាពិសេសក្រុមជួញដូរនិងប្រើប្រាស់គ្រឿងញៀន ព្រមទាំងក្រុមចោរលួចចោរប្លន់ជាដើម។ ដោយឡែក ជនសង្ស័យឈ្មោះធួក រតនៈហៅតឿខាងលើបានសារភាពថាខ្លួន បានទិញថ្នាំញៀនពីឈ្មោះ ឡុង ភេទប្រុស អាយុប្រហែល ២១ឆ្នាំ នៅភូមិព្រៃគុយ ឃុំត្រពាំងស្រុកសំរោងទងខេត្តកំពង់ស្ពឺ យកមកលក់បន្ត ដោយទិញម្តងៗតម្លៃ១០០.០០០រៀល៕
ចែករំលែកព័តមាននេះ