រាជធានីភ្នំពេញ ៖ បុរសដែលជាភេទទី៣ម្នាក់ត្រូវបានកំលាំងអន្តរាគមន៍ខណ្ឌពោធិ៍សែនជ័យឃាត់ខ្លួនប្រគល់អោយកំលាំងនគរបាលប៉ុស្តិ៍កាកាបកាលពីវេលាម៉ោង១២និង៥០នាទីរំលងអធ្រាត្រឈានចូលថ្ងៃទី១១ ខែឧសភា ឆ្នាំ២០១៨ នៅតាមបណ្តោយផ្លូវបេតុងភូមិ ប៉ប្រកខាងត្បូង សង្កាត់កាកាប១ ខណ្ឌពោធិ៍សែនជ័យ ។
បុរសដែលជាភេទទី៣ ឈ្មោះ វណ្ណ ភក្តី អាយុ២៧ឆ្នាំ មុខរបររត់ម៉ូតូឌុប និងសុំទាន ស្នាក់នៅ ម្តុំ ជ្រោយចង្វា ខណ្ឌជ្រោយចង្វារ ជិះម៉ូតូម៉ាកគុបជ្រុងសេ៥០ ពណ៌ខៀវខ្ចី ពាក់ស្លាកលេខ ថ-៣៦៧៦ ភព១។
កម្លាំងអន្តរាគមន៍ខណ្ឌពោធិ៍សែនជ័យបានឲ្យដឹងថា នៅមុនពេលកើតហេតុ ពួកគាត់បានប្រទះឃើញបុរសដែលជាភេទទី ៣ខាងលើនេះ កំពុងបណ្ដើរម៉ូតូ មានសម្ភារៈសាក់កាដូ ដោយមានការសង្ស័យបានឃាត់សួរនាំ ពេលនោះបុរសដែលជាភេទទី៣បាននិយាយថា រូបគាត់ជាអ្នករត់ម៉ូតូឌុប ទើបតែឌុបបុរសម្នាក់មកជិតកន្លែងកើតហេតុ តែម៉ូតូរបស់គាត់អស់សាំងធាក់មិនឆេះ ក៏បណ្តើរទាំងកណ្ដាលយប់តែម្ដង ។ ភ្លាមៗនោះកម្លាំងអន្តរាគមន៍ខណ្ឌពោធិ៍សែនជ័យក៏មានការសង្ស័យ បានសុំឆែកសាក់កាដូដែលមានសភាពសំពីងសំពោង ហើយបើកមើលសាំងម៉ូតូ ដែលគាត់និយាថាអស់ ពេលនោះឃើញសាំងនៅច្រើន ហើយបានឆេកមើលសាកកាដូ ដែលមានសម្ភារៈជាច្រើន ក្នុងនោះមានលុយក្រដាសប្រាក់១.០០០រៀល ៥០០រៀល និង១០០រៀល ជាច្រើនសន្លឹក រួមទាំងសំលៀកបំពាក់ និងអាវទ្រនាប់ផងដែរ បន្ទាប់មកបុរសដែលជាភេទទី៣ខាងលើនេះបានសារភាពថា រូបគាត់ជាអ្នកសុំទាន ហើយពេលខ្លះគាត់រត់ម៉ូតូឌុប ដើម្បីជីវភាពប្រចាំថ្ងៃ ។
ដោយនៅតែមានការសង្ស័យ កម្លាំងនគរបាលអន្តរាគមន៍ខណ្ឌពោធិ៍សែនជ័យបាននាំបុរសដែលជាភេទទី៣ខាងលើទៅប៉ុស្តិ៍នគរបាលដើម្បីសាកសួរបន្ត ៕
ចែករំលែកព័តមាននេះ