រាជធានីភ្នំពេញ ៖ មន្ត្រីជាន់ខ្ពស់ និងជាអ្នកនាំពាក្យគណបក្សប្រជាជនកម្ពុជា លោក សុខ ឥសាន អះអាងថា ការផ្តល់គំនិតចង់ឲ្យអតីតបក្សប្រឆាំងមាននីតិសម្បទានមុន ឬក្រោយបោះឆ្នោតនោះជាអន្ទាក់នយោបាយដែលរាជរដ្ឋាភិបាលមិនអាចលេងចូលបានឡើយ ។
លោក សុខ ឥសានបានឲ្យដឹងនៅថ្ងៃទី១០ ឧសភាថា មានអតីតមន្ត្រីរបស់អតីតបក្ស ប្រឆាំងម្នាក់បានលើកជា សេនារីយោមួយហាក់ដូចជា មានចេតនាល្អណាស់ ។ ប៉ុន្តែ បើពិនិត្យទៅអាចថា ជាអន្ទាក់នយោបាយ ។
ជាមួយគ្នានោះដែរអ្នកនាំពាក្យក៏បានលើកឡើងពីសេនារីយោដែលអតីតមន្ត្រីបក្សប្រឆាំងម្នាក់បានលើកមានដូចជាទី១ – ការចង់ឲ្យមានការផ្តល់នីតិសម្បទាឲ្យអតីតបក្សប្រឆាំងបានមុនការបោះឆ្នោតបានចូលរួមបោះឆ្នោត ។ គណបក្សប្រជាជនកម្ពុជានឹងនៅតែឈ្នះឆ្នោតដដែល ហើយរាជរដ្ឋាភិបាលកម្ពុជាដែលកើតចេញពីការបោះឆ្នោតនឹ ងត្រូវទទួលស្គាល់ជាអន្តរជាតិ ។ ទី២ – បើអតីតបក្សប្រឆាំងមាននីតិសម្បទាក្រោយការបោះឆ្នោតនោះនឹងមានបញ្ហាប្រឈមច្រើនជាមួយអន្តរជាតិ ។
រាជរដ្ឋាភិបាលកម្ពុជានឹងមិនត្រូវទទួលស្គាល់ពីអន្តរជាតិឡើយនោះ សម្តេចតេជោ ហ៊ុន សែនក៏មានបញ្ហាដែរ ។
លោកបញ្ជាក់ការលើកសេនារីយោទាំងពីរខាងលើនេះហាក់មានទំនោរឲ្យមានការផ្តល់នីតិសម្បទាឲ្យអតីតបក្សប្រឆាំងឲ្យបាន មុនការបោះឆ្នោត ដើម្បីកុំឲ្យមានបញ្ហា ។
លោកថា ចំពោះសេនារីយោខាងលើនេះដែរ រាជរដ្ឋាភិបាលកម្ពុជាមិនមានសមត្ថកិច្ចសម្រេចជំនួសតុលាការឡើយមិនអាចលេងចូលទេ ។ សំណុំរឿង កឹម សុខា បាននិងកំ ពុងស្ថិតនៅក្នុងដំណើរការនីតិវិធីរបស់តុលាការ គ្មានស្ថាប័នណាអាចលូកដៃចូលកិច្ចការតុលាការជាដាច់ខាត ។ ការដោះលែង ឬមិនដោះលែងអតីតបក្សប្រឆាំងអាស្រ័យ ដោយសាច់រឿង និងការកាត់សេចក្តីរបស់ស្ថាប័នតុលាការមិនអាចធ្វើតាមការចង់បានរបស់ជនណា ឬស្ថាប័នជាតិ អន្តរជាតិណាឡើយ ។
ចំណែកទី២ – ការចង់ឲ្យមានការផ្តល់នីតិសម្បទាឲ្យអតីតបក្សប្រឆាំងក្រៅពីស្ថាប័នតុលាការ គឺជាចេតនាអាក្រក់ចង់បង្វែរសាច់រឿងល្មើសច្បាប់របស់អតីតបក្សប្រឆាំង ទៅជារឿងនយោបាយដែលប្រែប្រួលទៅតាមសភាពការណ៍ ។
ឆ្លើយតបទៅអ្នកដែលលើកឡើងពីសេនារីយោដោយមិនបានបញ្ជេញឈ្មោះលោកសុខ ឥសានលើកឡើងយ៉ាងដូច្នេះថា « អ្នកដែលលើកសេនសរីយោ ជូនសម្តេចតេជោ ហ៊ុន សែននេះស្គាល់ សម្តេចតេជោតិចពេកហើយ ។ អ្នកណាក៏បានដឹងដែរថា ក្នុងការដោះស្រាយបញ្ហាជាតិ សម្តេចមានបទពិសោធន៍ជ្រាលជ្រៅជាងអ្នកនយោបាយអតីតបក្សប្រឆាំងអាចប្រៀបធៀបទៅនឹងសម្តេចហូបអំបិលច្រើនជាងអ្នកនយោបាយទាំងនោះហូបបាយទៅទៀត កុំចង់យកអន្ទាក់មកដាក់សម្តេចធ្វើហាក់ដូចជា ជួយឈឺឆ្អាលចំពោះសម្តេចណាស់ នោះមិនទទួលបានជោគជ័យជាដាច់ខាត» ។
ជាការកត់សម្គាល់ការលើកឡើងរបស់អ្នកនាំពាក្យគណបក្សកាន់អំណាចស្របពេលដែលស្ថាប័ននៃអង្គការសហប្រជាជាតិ សម្រេចចាត់ទុកការឃុំខ្លួនលោក កឹម សុខា ជាការបំពានទៅលើច្បាប់អន្តរជាតិ ។
យោងតាមហ្វេសប៊ុករបស់លោកកឹម សុខា បានលើកឡើងថា បន្ទាប់ពីទ0ទួលបានពាក្យបណ្តឹងពីអង្គការFIDH (International Federation for Human Rights) ក្រុមការងារនៃអង្គការសហប្រជាជាតិទទួលបន្ទុកដោះស្រាយការឃុំខ្លួនដោយបំពាន(UN Working Group on Arbitrary Detention) បានបើកសវនការកាលពីចុងខែមេសា ឆ្នាំ២០១៨ ហើយធ្វើសេចក្តីសន្មតថា ការចាប់ខ្លួនលោកកឹម សុខា គឺជាការបំពានលើសេចក្តីប្រកាសជាសកលនៃសិទ្ធិមនុស្ស និងកិច្ចព្រមព្រៀងអន្តរជាតិ ។ ស្ថាប័នអង្គការសហប្រជាជាតិនេះបានទាមទារឲ្យមានការដោះលែងលោកកឹម សុខាជាបន្ទាន់ និងស្នើរឲ្យអជ្ញាធរកម្ពុជាសងនូវជំងឺចិត្ត និងការប៉ះប៉ូវផ្សេងៗទៀតដល់រូបលោក ។
លោកសុខឥសាន ក៏បានលើកឡើងផងដែរថា ក្រុមជនមួយចំនួនចេះតែចង់ឲ្យមានការចរចានយោបាយ ដើម្បីបានដោះលែង កឹម សុខា ឲ្យរួចពីការឃុំឃាំង ដោយចង់បង្វែ ងដានរឿងផ្លូវច្បាប់ទៅជារឿងនយោបាយទៅវិញ ។
ចំណែកជនបរទេសមួយចំនួនមិនព្រមធ្វើយល់ពីច្បាប់អន្តរជាតិ ចេះតែចង់ចាប់បង្ខំឲ្យរាជរដ្ឋាភិបាលកម្ពុជាធ្វើតាមចិត្តខ្លួន ដោយរំលោភលឯករាជ្យ និងអធិបតេយ្យភាពកម្ពុជាឡើយ ៕
ចែករំលែកព័តមាននេះ