ខេត្តសៀមរាប ៖ រថយន្តដឹកដីបើកក្នុងល្បឿនលឿនបានបុកម៉ូតូបណ្តាលឲ្យកិនបែកក្បាលស្លាប់ភ្លាមៗនៅនឹងកន្លែងកើតហេតុ ហើយបានបើករថយន្តរត់គេចខ្លួនបាត់ ប៉ុន្តែទោះបីជាយ៉ាងណាក៏ដោយរថយន្តបង្កត្រូវបានកាមេរ៉ាសុវត្ថិភាពរបស់ផ្ទះប្រជាពលរដ្ឋនៅកន្លែងកើតហេតុថតបាន ខណៈពេលកំពុងបើករត់គេច ។ ហេតុការណ៍គ្រោះថ្នាក់ចរាចរណ៍នោះបានកើតឡើងនៅវេលាម៉ោង១៤រសៀលថ្ងៃទី០៩ ខែឧសភា ឆ្នាំ២០១៨នេះ…
ខេត្តសៀមរាប ៖ រថយន្តដឹកដីបើកក្នុងល្បឿនលឿនបានបុកម៉ូតូបណ្តាលឲ្យកិនបែកក្បាលស្លាប់ភ្លាមៗនៅនឹងកន្លែងកើតហេតុ ហើយបានបើករថយន្តរត់គេចខ្លួនបាត់ ប៉ុន្តែទោះបីជាយ៉ាងណាក៏ដោយរថយន្តបង្កត្រូវបានកាមេរ៉ាសុវត្ថិភាពរបស់ផ្ទះប្រជាពលរដ្ឋនៅកន្លែងកើតហេតុថតបាន ខណៈពេលកំពុងបើករត់គេច ។
ហេតុការណ៍គ្រោះថ្នាក់ចរាចរណ៍នោះបានកើតឡើងនៅវេលាម៉ោង១៤រសៀលថ្ងៃទី០៩ ខែឧសភា ឆ្នាំ២០១៨នេះ ស្ថិតនៅតាមបណ្តោយផ្លូវកៅស៊ូ ក្នុងភូមិខ្នារ សង្កាត់ជ្រាវ ក្រុងសៀមរាប ខេត្តសៀមរាប ។
បើតាមការសាក្សីនៅកន្លែងកើតហេតុបានប្រាប់ថា មុនពេលកើតហេតុពួកគាត់បានឃើញរថយន្តដឹកដីបើកបរក្នុងល្បឿនលឿនដូចហោះ ហើយទៅបុកម៉ូតូជនរងគ្រោះ ខណៈបើកបរស្របទិសគ្នាពីត្បូងទៅជើង បណ្តាលឲ្យរថយន្តកិនចំក្បាលបែកស្លាប់ម្ចាស់ម៉ូតូភ្លាមៗនៅហ្នឹងកន្លែង ។
ចំណែកសមាជិកក្រុមប្រឹក្សាសង្កាត់ជ្រាវលោក គង់ ប៊ឹប បានប្រាប់ថា ជនរងគ្រោះដែលស្លាប់នោះមានឈ្មោះ រី ណារិន ភេទប្រុស មានទីលំនៅភូមិខ្នារ សង្កាត់ជ្រាវ ក្រុងសៀមរាប ខេត្តសៀមរាប ។ បានជិះម៉ូតូម្នាក់ឯង ហើយរថយន្តបានបើកពីក្រោយស្របទិសគ្នា ពីទិសត្បូងទៅទិសជើង ហើយរថយន្តក៏បុកកិនចំពីក្រោយ បណ្តាលឲ្យបែកក្បាលស្លាប់ភ្លាមៗតែម្តង ។
លោក គង់ ប៊ឹប បានបញ្ជាក់ទៀតថា ក្រោយពីកើតហេតុសមត្ថកិច្ចបានចុះទៅដល់កន្លែង ហើយធ្វើការវាស់វែង រួចយកម៉ូតូជនរងគ្រោះចេញ ដើម្បីកុំឲ្យកកស្ទះចរាចរណ៍ផងដែរ ។
បច្ចុប្បន្នសពជនរងគ្រោះត្រូវបានសមត្ថកិច្ចធ្វើការប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី ។ ចំណែករថយន្តបង្កដែលបណ្តាលឲ្យមានមនុស្សស្លាប់ ហើយបើករត់គេចនោះត្រូវបានកាមេរ៉ាសុវត្ថិភាពថតជាប់សកម្មភាពដែលរថយន្តបង្កនោះបើករត់គេច ហើយបានបង្ហាញថា រថយន្តនោះធុនកូរ៉េ ពណ៌ខៀវ ចង្កូតស្តាំ ថែមទៀតផង ។ តាមរយៈការថតជាប់ក្នុងកាមេរ៉ាសុវត្ថិភាពនេះ សមត្ថកិច្ចសង្ឃឹមថា ១០០ភាគរយ និងស្រាវជ្រាវរកឃើញ ដើម្បីយកផ្តន្ទាទោសទៅតាមផ្លូវច្បាប់ ជូនជនរងគ្រោះឲ្យខានតែបាន ៕
ចែករំលែកព័តមាននេះ