រាជធានីភ្នំពេញ ៖ ចៅក្រមជំនុំជម្រះសាលាដំបូងរាជធានី កាលពីព្រឹកថ្ងៃទី៩ ឧសភា បានប្រកាសសាលក្រមផ្តន្ទាទោសលើសំណុំរឿងឃាតកម្មមួយដែលជនជាប់ចោទជាចៅបានវាយសម្លាប់ជីដូនរបស់ខ្លួន តម្រូវឱ្យដាក់ពន្ធនាគារអស់មួយជីវិត ។ ជនជាប់ចោទឈ្មោះ ឆាយ…
រាជធានីភ្នំពេញ ៖ ចៅក្រមជំនុំជម្រះសាលាដំបូងរាជធានី កាលពីព្រឹកថ្ងៃទី៩ ឧសភា បានប្រកាសសាលក្រមផ្តន្ទាទោសលើសំណុំរឿងឃាតកម្មមួយដែលជនជាប់ចោទជាចៅបានវាយសម្លាប់ជីដូនរបស់ខ្លួន តម្រូវឱ្យដាក់ពន្ធនាគារអស់មួយជីវិត ។ ជនជាប់ចោទឈ្មោះ ឆាយ សុីនហូ ភេទប្រុស អាយុ២៣ឆ្នាំ មានអាស័យដ្ឋានរស់នៅជាមួយជីដូនផ្ទះលេខ២៤ ផ្លូវលេខ៥៩២ សង្កាត់បឹងកក់២ ខណ្ឌទួលគោក ។ ការប្រកាសសាលក្រមនោះដឹកនាំដោយលោក ហេង កេសរោ ប្រធានក្រុមប្រឹក្សា លោក តុប ឈុនហេង និងលោក ម៉េង តូនី ចៅក្រមក្រុមប្រឹក្សា និងលោក វង្ស ប៊ុនវិសុទ្ធ ព្រះរាជអាជ្ញារង តំណាងឲ្យស្ថាប័នអយ្យការអមសាលាដំបូង ។ សាលក្រមបានប្រកាសធ្វើឡើងជាសាធារណៈនៅចំពោះមុខជនជាប់ចោទ និងមេធាវីការពារក្តី ព្រមទាំងភ្ញៀវចូលរួមស្តាប់ផងដែរ។
គួរបញ្ជាក់ថា កាលពីព្រឹកថ្ងៃទី២៦ មេសា ២០១៨ លោក ហេង កេសរោ ប្រធានក្រុមប្រឹក្សាចៅក្រមជំនុំជម្រះ នៃសាលាដំបូងរាជធានីភ្នំពេញ បានលើកយកសំណុំរឿងព្រហ្មទណ្ឌមួយនេះមកបើកសវនាការផ្តន្ទាទោសលើជនជាប់ចោទ ជាចៅប្រុសម្នាក់ដែលបានវាយសម្លាប់ជីដូន តាមមាត្រា២០០ នៃក្រមព្រហ្មទណ្ឌ ។
អង្គសវនាការលោក ស្រី ម៉ាក់នី តំណាងអយ្យការសវនាការ បានចោទប្រកាន់លើឈ្មោះ ឆាយ ស៊ីនហូ ពីបទឃាតកម្មគិតទុកជាមុន លើជីដូនបង្កើតរបស់ខ្លួនអាយុ៨៧ឆ្នាំ ដែលបានប្រព្រឹត្តកាលពីយប់ថ្ងៃទី១៣ ខែសីហា ឆ្នាំ២០១៧ នៅចំណុចផ្ទះលេខ២៤ ផ្លូវ៥៩២ សង្កាត់បឹងកក់២ ខណ្ឌទួលគោក រាជធានីភ្នំពេញ ។
ចំពោះមុខអង្គសវនាការ ជនជាប់ចោទបានសារភាពថា នៅយប់កើតហេតុនោះខ្លួនបានបើកដំបូលផ្ទះ ឡើងទៅអង្គុយលេងនៅខាងលើ ពេលនោះជីដូនរបស់ខ្លួនឃើញ ក៏ហៅឲ្យចុះមកក្រោមវិញ ទើបខ្លួនខឹងក៏ចុះទៅយកដំបងឈើជ្រុងវាយជីដូនចំនួន៥ដំបង រហូតដល់ស្លាប់តែម្តងទៅ ។ ក្រោយពេលវាយជីដូនសម្លាប់ហើយ ក៏ត្រូវបងស្រីទៅប្តឹងសមត្ថកិច្ចឲ្យចាប់ខ្លួនភ្លាមៗ ។
លោក នាង ហៃ មេធាវីការពារក្តីឲ្យជន ជាប់ចោទ បានសំណូមពរឲ្យតុលាការកែប្រែបទចោទលើកូនក្តីរបស់លោក ពីបទឃាតកម្មគិតទុកជាមុន ទៅជាបទឃាតកម្មធម្មតាវិញ ។ លោកមេធាវីលើកឡើងបែបនេះដោយសំអាងហេតុថា កូនក្តីរបស់លោកមានសតិមិនគ្រប់ ពោលគឺញៀនថ្នាំរហូតវិកលចរិតទៅហើយ ។ ដូច្នោះ មនុស្សវិកលចរិតបង្ហាញឲ្យឃើញថា កាលណាបើខឹងភ្លាមវ៉ៃភ្លាម មិនមានចេតនាគិតទុកជាមុនដូចដែលតំណាងអយ្យការចោទប្រកាន់នោះទេ ៕
ចែករំលែកព័តមាននេះ