រាជធានីភ្នំពេញ ៖ តាមការកត់សម្គាល់ នាពេលបច្ចុប្បន្ន ក្រៅពីទំនេរពីការសិក្សា និងការងារ យុវជនច្រើនឡើងបានងាកមកលេងកីឡាជាការកម្សាន្ត ដើម្បីសុខភាព ក៏ដូចជាដើម្បីរឹតចំណងមិត្តភាពរវាងគ្នានឹងគ្នាផងដែរ។ អ៊ីចឹងហើយទើបធ្វើឱ្យសកម្មភាពបើកតារាងបាល់ខ្នាតតូចសម្រាប់ជួលនៅក្នុងតំបន់ប្រជុំជនមួយចំនួនផុសឡើងដូចផ្សិត…
រាជធានីភ្នំពេញ ៖ តាមការកត់សម្គាល់ នាពេលបច្ចុប្បន្ន ក្រៅពីទំនេរពីការសិក្សា និងការងារ យុវជនច្រើនឡើងបានងាកមកលេងកីឡាជាការកម្សាន្ត ដើម្បីសុខភាព ក៏ដូចជាដើម្បីរឹតចំណងមិត្តភាពរវាងគ្នានឹងគ្នាផងដែរ។ អ៊ីចឹងហើយទើបធ្វើឱ្យសកម្មភាពបើកតារាងបាល់ខ្នាតតូចសម្រាប់ជួលនៅក្នុងតំបន់ប្រជុំជនមួយចំនួនផុសឡើងដូចផ្សិត ប៉ុន្តែក៏មានអ្នកបិទ និងសេងចោលបន្តបន្ទាប់ដែរ ដោយសារតែមិនអាចប្រកួតប្រជែងជាមួយតារាងបាល់ដែលទើបបង្កើតឡើងថ្មីមានលក្ខណៈទំនើបនិងស្ដង់ដារខ្ពស់ជាង ។
ការសាងសង់តារាងបាល់ទាត់ទាំងខ្នាតតូច និងខ្នាតធំសម្រាប់ជួលនោះ គេនៅតែឃើញមានសកម្មភាពខ្លាំងក្នុងរង្វង់ប្រមាណជា៤ឆ្នាំចុងក្រោយ ។ សព្វថ្ងៃនេះ តារាងបាល់ទាត់សម្រាប់ជួលនៅរាជធានីភ្នំពេញមានសឹងតែគ្រប់ទីកន្លែង បើតាមការប៉ាន់ស្មានមានមិនក្រោម៥០ទៅ៦០កន្លែងនោះទេ ចំណែកតម្លៃជួលវិញ គឺទៅតាមទីតាំងដូចជានៅកណ្តាលក្រុងថ្លៃជាងជាយក្រុងបន្តិចអាចខ្ទង់ជាង១០ដុល្លារនៅពេលថ្ងៃ និងជាង២០ដុល្លារនៅពេលយប់សម្រាប់ការជួលលេងមួយម៉ោង ខណៈនៅតាមជាយក្រុងមានតម្លៃក្រោម១០ដុល្លារនៅពេលថ្ងៃនិងពី១៥ទៅ២០ដុល្លារនៅពេលយប់ក្នុងរយៈពេលមួយម៉ោងដូចគ្នា ។ តម្លៃជួលពេលយប់ថ្លៃជាងពេលថ្ងៃគឺដោយសារតែម្ចាស់តារាងបាល់នីមួយៗត្រូវប្រើភ្លើងហ្វានិងមានអ្នកជួលលេងច្រើនផង។
ម្ចាស់តារាងបាល់ទាត់ជួលមួយនៅរាជធានីភ្នំពេញបានអះអាងទាក់ទងទៅនឹងការបើកអាជីវកម្មមួយនេះថា ដើម្បីទទួលបានតារាងបាល់ទាត់មួយត្រូវប្រើដើមទុនក្នុងការសាងសង់មិនក្រោមខ្ទង់សែនដុល្លារនោះទេ ក៏ប៉ុន្តែក្នុងមួយថ្ងៃគិតត្រឹមថ្ងៃធម្មតា ក៏អាចរកចំណូលបានពីការជួលតារាង លក់ទឹកសុទ្ធ និងសេវាផ្ញើម៉ូតូជាដើមជាមធ្យមពី៧រយទៅ១ពាន់ដុល្លារដែរ បើថ្ងៃសៅរ៍-អាទិត្យ និងថ្ងៃឈប់សម្រាកវិញគឺបានលើសនេះចង់២ដង ។ ម្ចាស់តារាងបាល់ទាត់ដដែលដែលសុំមិនឱ្យបញ្ចេញឈ្មោះបន្តថា តារាងបាល់ដែលជួលកាន់តែខ្ពស់ គឺត្រូវប្រឈមការបង់ថ្លៃឈ្នួលកាន់តែថ្លៃទៅលើបុគ្គលិក ថ្លៃ
ជួលដីនិងថ្លៃភ្លើងជាដើមអាចដល់១ម៉ឺនដុល្លារ។
ចំពោះបច្ចេកទេសសាងសង់តារាងស្មៅសិប្បនិម្មិតគឺលោកជួលក្រុមហ៊ុនរបស់វៀតណាមមួយជាអ្នករៀបចំ ប៉ុន្តែប៉ុន្មានឆ្នាំនេះក៏មានក្រុមហ៊ុនក្នុងស្រុកបើកបម្រើសេវានេះដែរ ។ លោកបញ្ជាក់ថាអ្នកមកលេងបាល់ក្នុងតារាងរបស់លោកមានគ្រប់វ័យ គឺមិនមែនតែក្មេងៗជាសិស្សឬនិស្សិតនោះទេ សូម្បីតែអ្នកធ្វើការដែលស្ថិតក្នុងវ័យកណ្ដាលទៅហើយ ក៏មកជុំគ្នាលេងច្រើនដែរ។
លោក ព្រំ វណ្ណឌី ម្ចាស់តារាងបាល់ ទាត់ធំមួយនៅម្តុំលូប្រាំបានឲ្យដឹងថា តារាងបាល់ទាត់របស់លោកដែលមានរហូតដល់៧តារាង ចំណាយអស់ប្រាក់ខ្ទង់២០ម៉ឺនដុល្លារក្នុងការសាងសង់ដោយមិនទាន់រាប់បញ្ចូលតម្លៃដីដែលលោកជួលគេក្នុងមួយខែ៣ពាន់ដុល្លារទេ។ តារាងបាល់នេះទើបតែធ្វើរួចរាល់ប្រហែលជា៣ខែកន្លងទៅ ប្រសិនបើមានភ្ញៀវចូលលេងច្រើនលោកអាចទទួលបានប្រាក់ចំណូលយ៉ាងហោចណាស់៧ពាន់ដុល្លារអាមេរិកក្នុងមួយខែក្រោយពីគិតលើការចំណាយផ្សេងៗរួចរាល់។
លោកបញ្ជាក់ថា មូលហេតុដែលលោកចំណាយដើមទុនបង្កើតតារាងបាល់ទាត់សម្រាប់ជួលនេះដោយសារលោកមើលឃើញថា បច្ចុប្បន្នយុវវ័យភាគច្រើនចូលចិត្តវិស័យបាល់ទាត់ដូចជារូបលោកដែរ ទើបលោកចាប់យកឱកាសនេះបង្កើតតារាងបាល់ទាត់សម្រាប់ជួលឱ្យពួកគាត់លេងដើម្បីទទួលបានប្រាក់ចំណូលផងនិងចង់ឲ្យមានសកម្មភាពលេងបាល់ទាត់កាន់តែច្រើននៅកម្ពុជាផង។
ទន្ទឹមនឹងការកើតឡើងនូវតារាងបាល់ថ្មីៗតារាងបាល់ចាស់ៗ និងតារាងបាល់តូចៗដែលខ្វះដើមទុនពង្រីកអាជីវកម្ម ក៏ត្រូវគេឃើញបិទទ្វារបន្តបន្ទាប់ផងដែរ ។ ហេតុផលបិទទ្វារមួយភាគធំមិនដោយសារក្ស័យធននោះទេ ប៉ុន្តែអាចបណ្ដាលមកពីតារាងបាល់នោះ
កាលពីមុនជាតារាងបាល់ចូលហ៊ុនគ្នាបើក លុះដល់ភាគហ៊ុនម្នាក់ៗមានប្រាក់អាចបើកខ្លួនឯងក៏ចែកជើងគ្នាទៅបើកថ្មី ។ ក្នុងនោះហេតុផលម្ចាស់ដីឈប់ជួលបន្តក៏ធ្វើឱ្យតារាងបាល់មួយចំនួនត្រូវបិទចោលដែរ ។ អ៊ីចឹងហើយទើបមុខរបរបើកតារាងបាល់ទាត់ជួលត្រូវគេឃើញមានបិទមានបើកនាពេលចុងក្រោយ ដែលផ្ទុយពីពេលមុនៗគឺមានតែបើក។
ក្រុមអ្នកជំនាញនិយាយថា តារាងបាល់តូចៗដែលមិនមានស្ដង់ដារចាប់ផ្ដើមបិទចោលបណ្ដើរៗហើយជំនួសដោយតារាងបាល់ថ្មីដែលមានស្ដង់ដារច្រើនឡើងៗដោយសារតែការប្រកួតប្រជែង ។ ទាំងអស់នេះគឺជាសម្ពាធមួយធ្វើឱ្យម្ចាស់តារាងដែលខ្វះដើមទុនពង្រីកបាត់បង់ភ្ញៀវបន្តិចម្ដងៗរហូតឈានដល់ការបិទទ្វារតែម្ដង ។ ប៉ុន្តែសម្រាប់សកម្មភាពជួលតារាងបាល់លេងមិនបានបាត់បង់នោះទេ គឺនៅតែខ្លាំងដដែលដោយគ្រាន់តែសកម្មភាពជួលតារាងបាល់លេងនោះ លេចនៅក្នុងទីតាំងតារាងបាល់ធំៗជំនួសឱ្យការបិទទ្វាររបស់តារាងបាល់តូចៗ៕
ចែករំលែកព័តមាននេះ