គំរូរថយន្តហោះដូចនឹង Drone យក្ស

ថ្ងៃទី ១០ ខែ ឧសភា ឆ្នាំ ២០១៨
ម៉ោង ១០:២៨
គង់ រិទ្ឋរីណា

Uber បានដាក់បង្ហាញគំរូរថយន្តចេះហោះរបស់ខ្លួន នៅឯកិច្ចប្រជុំកំពូល Uber Elevate ប្រចាំឆ្នាំលើកទី២ ដែលបង្ហាញពីគំរូដើមសម្រាប់រថយន្តតាក់ស៊ីហោះនៅលើអាកាស ។

ក្រុមហ៊ុនសង្ឃឹមថា រថយន្តហោះនេះនឹងបង្ហាញខ្លួនដល់អ្នកធ្វើដំណើរនៅរយៈពេលពី២ ទៅ៥ឆ្នាំខាងមុខ ។ រថយន្តនេះអាចហោះឡើងត្រង់ចុះឡើង ហើយអាចចតនៅកន្លែងផ្សេងៗបានយ៉ាងងាយស្រួលដូចជា នៅលើដំបូលផ្ទះ និងទីធ្លា ជាដើម ។

សម្រាប់គំរូដំបូងនេះ Uber មានគម្រោងធ្វើវាឲ្យមានអ្នកបញ្ជា ។ ប៉ុន្តែគម្រោងនៅថ្ងៃខាងមុខ គឺនឹងធ្វើឲ្យវាមានសមត្ថភាពបើកដោយខ្លួនឯងបាន គ្មានអ្នកបញ្ជា ។

គំរូនេះមើលទៅដូចជា Drone យក្សច្រើនជាងឧទ្ធម្ភាគចក្រ ដោយសារតែមានស្លាបចក្រដល់ទៅ៤ ។ ខាងបុគ្គលិករបស់ Uber បានបង្ហើបថា គេនឹងធ្វើឲ្យវាមានសុវត្ថិភាពខ្ពស់ ហើយអាចហោះបានកម្ពស់ពី៣០០ម៉ែត្រ ទៅ ៦០០ម៉ែត្រពីដី ជាមួយនឹងសំឡេងស្ងាត់ជាងឧទ្ធម្ភាគចក្រ (គឺដូចសំឡេងរថយន្តធុនធំធម្មតាបើកនៅលើដី) ។

Uber ជាដៃគូជាមួយ NASA ក្នុងការអភិវឌ្ឍសេវាកម្ម UberAIR កំពុងតែប្រឈមនឹងការប្រកួតប្រជែងក្នុងវិស័យអាកាស ។

Kitty Hawk ជាក្រុមហ៊ុនរថយន្តតាក់ស៊ីស្វយ័តមួយ ដែលគាំទ្រដោយក្រុមហ៊ុនយក្ស Alphabet (មេធំរបស់ Google) បានបង្ហាញយន្តហោះពាណិជ្ជកម្មចុងក្រោយរបស់ខ្លួន ឈ្មោះថា Cora កាលពីខែមីនា ។ ក្រុមហ៊ុននេះកំពុងធ្វើការជាមួយរដ្ឋាភិបាលនូវែលសេឡង់ ដើម្បីធ្វើអាជីវកម្មតាក់ស៊ីរត់លើអាកាសផងដែរ។

គូប្រកួតប្រជែងមួយទៀត គឺក្រុមហ៊ុន Airbus បានធ្វើការហោះហើរប្រកបដោយជោគជ័យជាលើកដំបូងនៃរថយន្តហោះស្វ័យប្រវត្តិរបស់ខ្លួន នៅក្នុងខែកុម្ភៈ ។

Uber និយាយថា អ្នកដំណើរនឹងបង់ប្រាក់ដំបូងដូច Uber Black ដែរ ប៉ុន្តែនៅពេលដែលសេវាមានអ្នកដំណើរគ្រប់កម្រិត តម្លៃនឹងថយចុះដូច Uber X សម្រាប់ការធ្វើដំណើរដូចគ្នា ។

ក្រុមហ៊ុននេះគ្រោងនឹងបង្កើត UberAIR នៅ Dallas-Fort Worth និងទីក្រុង Los Angeles នៅឆ្នាំ២០២៣ ដោយមានការធ្វើតេស្តក្នុងទីក្រុងទាំងនេះនៅឆ្នាំ២០២០ ៕