ព្រឹកឡើងទើបដឹងថា «ច្រឡំ»…
- ភ្នំពេញ
រាជធានីភ្នំពេញ ៖ ព័ត៌មានជំហានដំបូងភ្លាមៗ បានផ្ទុះឡើងនាវេលារំលងអធ្រាត្រ ឈានចូល ថ្ងៃទី៩ ឧសភា ដែលការនិយាយតៗគ្នាតាមវិទ្យុ និងតាមហ្វេសប៊ុក មានការស៊ែរ(Share)តៗគ្នា…
រាជធានីភ្នំពេញ ៖ ព័ត៌មានជំហានដំបូងភ្លាមៗ បានផ្ទុះឡើងនាវេលារំលងអធ្រាត្រ ឈានចូល ថ្ងៃទី៩ ឧសភា ដែលការនិយាយតៗគ្នាតាមវិទ្យុ និងតាមហ្វេសប៊ុក មានការស៊ែរ(Share)តៗគ្នា ជុំវិញចោរលួចកាត់ដែកស្ពានបេឡត៍ ដែលទើបសម្ពោធឱ្យប្រើប្រាស់កាលពីរសៀលថ្ងៃទី៨ខែឧសភា ។ ព័ត៌មាននេះ ធ្វើឱ្យម្នាក់ៗ មានការហួសចិត្ត និងបានដាក់បណ្តាសាយ៉ាងចាស់ដៃដល់ជនសង្ស័យ៤នាក់ ដែលត្រូវបានចាប់ខ្លួនដោយជាប់ចោទជាចោរលួចកាត់ដែកសសរស្ពានបេឡេត៍នោះ ។ ដំបូងៗលើយ ជនជាប់ចោទមិនត្រឹមតែជាប់ឈ្មោះថា ជាចោរទេ តែបានឈានទៅដល់បទឧក្រិដ្ឋ ធ្វើវិទ្ធង្សនាផងដែរ ។
ទោះបីជាបែបណា មន្ទីរសាធារណការនិងដឹកជញ្ជូនរាជធានីភ្នំពេញ ក៏ដូចជារដ្ឋបាលរាជធានីភ្នំពេញ បានធ្វើការប្រកាសភ្លាមៗ ជុំវិញព័ត៌មានទាំងនេះនៅព្រឹកថ្ងៃទី៩ ឧសភា ថា ពុំមានការលួចកាត់ដែកស្ពានបេឡេត៍នោះទេ ការពិតក្រុមជនទាំងនោះ បាននាំគ្នាទៅប្រមូលយកដែកដែលសេសសល់ចេញពីការដ្ឋានប៉ុណ្ណោះ។ ការប្រកាសនេះ ក៏បានឱ្យប្រជាពលរដ្ឋដែលធ្វើដំណើរឆ្លងស្ពាននេះ អាចធ្វើដំណើរបានជាធម្មតា ។
ការប្រកាសឆ្លើយតបភ្លាមៗនេះ គឺបន្ទាប់ពីមានការចុះត្រួតពិនិត្យយ៉ាងល្អិតល្អន់ នៅកន្លែងកើតហេតុ នាព្រឹកថ្ងៃទី៩ ឧសភា ដោយមន្ត្រីជំនាញក្រសួង និងមន្ទីរសាធារណការ និងដឹកជញ្ជូនរាជធានីភ្នំពេញ រួមជាមួយតំណាងក្រុមហ៊ុនOCIC ។ ក្រោយពីការត្រួតពិនិត្យ ក៏បានបញ្ជាក់ច្បាស់ថា ពុំមានអ្នកលួចកាត់ដែកសសរស្ពាន ឬដៃស្ពាន ដូចការផ្អើលតៗគ្នាកាលពីយប់នោះទេ ។
តាមពិត គឺពលរដ្ឋនាំគ្នាជិះទូកមកយកដែកដែលសេសសល់ពីការសម្អាតការដ្ឋាន និងដែកការពារសុវត្ថិភាពការដ្ឋានក្នុងពេលសាងសង់កន្លងមក ខណៈដែលការដ្ឋានកំពុងរុះរើ ដើម្បីដឹកចេញ ។ ឯចំពោះដែកស្ពានបេឡេត៍ទាំងមូល មិនមានការបាត់បង់ ឬប៉ះពាល់ដល់គ្រោងដែកស្ពាននោះឡើយ ។
តាមព័ត៌មានដំបូងៗ ដែលបង្កឱ្យមានការភ្ញាក់ផ្អើលនោះ គឺបន្ទាប់ពីមានបងប្អូនខ្មែរអ៊ិស្លាមជាង១០ទូក នាំគ្នា ទៅយកដែកពីក្រោមស្ពាន ហើយត្រូវសមត្ថកិច្ចដេញតាមឃាត់ខ្លួនបានចំនួន៤នាក់ កាលពីវេលាម៉ោង១២និង៣០នាទីរំលងអធ្រាត្រ ឈានចូលថ្ងៃទី៩ ខែឧសភា នៅតាមផ្លូវជាតិលេខ៦ ចំណុចស្ពានបេឡេត៍ដែលទើបនឹងសម្ពោធឱ្យឆ្លងកាត់ទន្លេសាប ស្ថិតក្នុងសង្កាត់ជ្រោយចង្វា ខណ្ឌជ្រោយចង្វា ។
ជនដែលត្រូវបានឃាត់ខ្លួនមាន ៖១-ឈ្មោះ ម៉ោះ ម៉ូត ភេទប្រុស អាយុ៣០ឆ្នាំ ជាអ្នកនេសាទត្រី ស្នាក់នៅលើទូក មានស្រុកកំណើតនៅខណ្ឌជ្រោយចង្វា ២-ឈ្មោះ ម៉ាត់ គ្រីយា ភេទប្រុស អាយុ៥៦ឆ្នាំ មុខរបរជាអ្នកនេសាទ ស្នាក់នៅក្នុងខណ្ឌជ្រោយចង្វា និងមានស្រុកកំណើតនៅស្រុកកំពង់ត្របែក ខេត្តព្រែវែង ៣-ឈ្មោះ ទីស្មាន់ កោះទៀតអាតុ អាយុ១៧ឆ្នាំ ជាអ្នកនេសាទត្រី ស្នាក់នៅក្នុងសង្កាត់ជ្រោយចង្វា ខណ្ឌជ្រោយសង្វា និងមានស្រុកកំណើតនៅស្រុកស្អាង ខេត្តកណ្តាល និង៤-មិនស្គាល់អត្តសញ្ញាណទេ ។
ប្រភពព័ត៌មានពីកម្លាំងអន្តរាគមន៍ខណ្ឌជ្រោយចង្វាឱ្យដឹងថា មុនពេលឃាត់ខ្លួនពួកគេ គឺមានសន្តិសុខម្នាក់ឈ្មោះ សារី ភេទប្រុស អាយុ៤៧ឆ្នាំ ស្នាក់នៅបុរីរុងរឿង សង្កាត់ជ្រោយចង្វា ខណ្ឌជ្រោយចង្វា បានរាយ ការណ៍ប្រាប់ថា មានខ្មែរអ៊ិស្លាមជាង១០ទូកនាំគ្នាទៅលួចកាត់យកដែកក្រោមស្ពានដែលទើបសម្ពោធដាក់ឱ្យប្រើប្រាស់មិនទាន់ទាំងបាន១ថ្ងៃស្រួលបួលផង ។ ព័ត៌មាននេះ បង្កឱ្យមានការភ្ញាក់ផ្អើលដល់កម្លាំងអន្តរា គមន៍ខណ្ឌជ្រោយចង្វា នាំគ្នាទៅកាន់ចំណុចខាងលើ ។
នៅពេលនោះ ក្រុមជនទាំងនេះនាំគ្នាជិះទូករត់ទៅខាងជើងសំដៅទៅម្តុំច្រាំងចំរេះរួចគេចខ្លួនបាត់អស់ ឯកម្លាំងអន្តរាគមន៍រួមនឹងសន្តិសុខយាមស្ពាន ចាប់បានតែទូកមួយគ្រឿងដែលដឹកដែករួចនាំយកមកកន្លែងកើតហេតុវិញ ។ លុះប្រមាណកន្លះម៉ោងក្រោយមក កម្លាំងអន្តរាគមន៍និងសន្តិសុខជ្រោយចង្វា បានស្រាវ ជ្រាវរកឃើញទូកជិត១០គ្រឿងទៀតចតនៅក្បែរសណ្ឋាគារសុខាកំពុងទម្លាក់ដែកចុះទៅក្នុងទឹកដើម្បីកុំឱ្យគេដឹង ទើបសមត្ថកិច្ចឃាត់ខ្លួនបានចំនួន៤នាក់ និងដកហូតបានវត្ថុតាងដែកកសាងស្ពានជាច្រើនកំណាត់ រួចនាំយកទៅសាកសួរ៕
ចែករំលែកព័តមាននេះ