ខេត្តកំពង់ស្ពឺ ៖ បុរសម្នាក់ត្រូវបានគោយន្តបុកកៀបជាប់ពីក្រោម បណ្តាលឱ្យស្លាប់នៅនឹងកន្លែងកើតហេតុ និងម្នាក់ទៀតរងរបួសធ្ងន់ត្រូវបានបញ្ជូនទៅសង្គ្រោះ ចំណែកម្ចាស់គោយន្តបានរត់គេចខ្លួនបាត់ បន្សល់ទុកតែគោយន្តដឹកឈើនៅកន្លែងកើត ។ គ្រោះថ្នាក់ចរាចរណ៍នេះបានកើតឡើងកាលពីរសៀលថ្ងៃទី៩ ខែឧសភា…
ខេត្តកំពង់ស្ពឺ ៖ បុរសម្នាក់ត្រូវបានគោយន្តបុកកៀបជាប់ពីក្រោម បណ្តាលឱ្យស្លាប់នៅនឹងកន្លែងកើតហេតុ និងម្នាក់ទៀតរងរបួសធ្ងន់ត្រូវបានបញ្ជូនទៅសង្គ្រោះ ចំណែកម្ចាស់គោយន្តបានរត់គេចខ្លួនបាត់ បន្សល់ទុកតែគោយន្តដឹកឈើនៅកន្លែងកើត ។
គ្រោះថ្នាក់ចរាចរណ៍នេះបានកើតឡើងកាលពីរសៀលថ្ងៃទី៩ ខែឧសភា ឆ្នាំ២០១៨ ចន្លោះគីឡូម៉ែត្រ៧៥ និង៧៦ លើផ្លូវលេខ៤៤ នៅចំណុចភូមិផ្លោច ឃុំត្រពាំងជោ ស្រុកឱរ៉ាល់ ខេត្តកំពង់ស្ពឺ ។
បើតាមសាក្សីបានឱ្យដឹងថា មុនពេលកើតហេតុ គេបានឃើញបុរស២នាក់បើកគោយន្តដោយមានដឹកឈើទិសដៅពីលិចទៅកើតលុះមកដល់ចំណុចកើតហេតុស្រាប់តែគោយន្តបានរេចង្កូតទៅបុកម៉ូតូមួយគ្រឿងជិះគ្នាពីរនាក់ម៉ាកហុងដាសេ១២៥ ពណ៌ខ្មៅ ស៊េរី២០១៤ ពាក់ស្លាកលេខភ្នំពេញ ១CH-០៣៤៥ ដែលកំពុងធ្វើដំណើរបញ្ច្រាសទិសគ្នាយ៉ាងពេញទំហឹង បណ្តាលឱ្យកិនទាំងម៉ូតូ និងអ្នកបើកបរជាប់ពីក្រោមគោយន្តស្លាប់ភ្លាមៗនៅកន្លែងកើតហេតុ ចំណែកអ្នករួមដំណើរម្នាក់ទៀតរងរបួសធ្ងន់។ ចំណែកអ្នកបើកគោយន្តបានរត់គេចខ្លួនបាត់ស្រមោល ។
សមត្ថកិច្ចបានឱ្យដឹងថា ជនរងគ្រោះឈ្មោះណាត លាងហេង ភេទប្រុស អាយុ១៧ឆ្នាំ ជាអ្នកបើកបរម៉ូតូបានស្លាប់នៅនឹងកន្លែងកើតហេតុ ចំណែកអ្នករួមដំណើរឈ្មោះពក ដេត ភេទប្រុស អាយុ២៨ឆ្នាំ រងរបួសធ្ងន់ ។ ជនរងគ្រោះទាំងពីរនាក់រស់ភូមិត្រពាំងក្រើញ ឃុំប្រាំបីមុំ ស្រុកថ្ពង ខេត្តកំពង់ស្ពឺ ។ ចំណែកម៉ូតូត្រូវខូចខាតទាំងស្រុង ។
ប្រភពព័ត៌មានបន្តថា ក្រោយកើតហេតុ សពត្រូវបានប្រគល់ជូនសាច់ញាតិដើម្បីយកទៅធ្វើបុណ្យតាមប្រពៃណី។ ចំពោះគោយន្ត និងម៉ូតូត្រូវបានយកទៅរក្សាទុកជាបណ្ដោះអាសន្ននៅអធិការដ្ឋាននគរបាលស្រុកឱរ៉ាល់ ដើម្បីរង់ចាំការដោះស្រាយតាមនីតិវិធី។
លោកវរសេនីយ៍ទោប៊ុត ប៊ុននធឿន អធិការនគរបាលស្រុកឱរ៉ាល់បានឱ្យដឹងនៅព្រឹកថ្ងៃទី១០ ឧសភា ២០១៨ ថា បច្ចុប្បន្នកំលាំងជំនាញកំពុងកសាងសំណុំរឿង និងស្រាវជ្រាវរកអត្តសញ្ញាណអ្នកបើកគោយន្ត អោយចូលខ្លួនមកដោះស្រាយជាមួយភាគីជនរងគ្រោះតាមនីតិវិធីច្បាប់៕
ចែករំលែកព័តមាននេះ