ខេត្តបាត់ដំបង ៖ សមត្ថកិច្ចបានឱ្យដឹងថា ជនសង្ស័យម្នាក់ត្រូវបានឃាត់ខ្លួនពីបទជួញដូរគ្រឿងញៀន កាលពីវេលាម៉ោង០៣ និង១៥នាទីរសៀលថ្ងៃទី៩ ឧសភា ស្ថិតនៅលើដងផ្លូវមួយកន្លែង ក្នុងភូមិពោធិ៍ ឃុំព្រៃខ្ពស់…
ខេត្តបាត់ដំបង ៖ សមត្ថកិច្ចបានឱ្យដឹងថា ជនសង្ស័យម្នាក់ត្រូវបានឃាត់ខ្លួនពីបទជួញដូរគ្រឿងញៀន កាលពីវេលាម៉ោង០៣ និង១៥នាទីរសៀលថ្ងៃទី៩ ឧសភា ស្ថិតនៅលើដងផ្លូវមួយកន្លែង ក្នុងភូមិពោធិ៍ ឃុំព្រៃខ្ពស់ ស្រុកបវេល ជាមួយនឹងថ្នាំញៀនដ៏ច្រើនសន្ធឹកសន្ធាប់ ។ ជាមួយការឃាត់ខ្លួននេះ គឺបន្ទាប់កម្លាំងចាប់បានបក្សពួកគេម្នាក់ កាលពីវេលាម៉ោង១០ និង២០នាទីយប់ថ្ងៃទី០៨ ឧសភា នៅលើផ្លូវត្រង់ចំណុចក្រុមទី៣ ភូមិបវេល១ ឃុំបវេល ស្រុកបវេល ដោយប្រើល្បិចឱ្យជនសង្ស័យទាំង២នាក់ទំនាក់ទំនងគ្នា ធ្វើជាចង់ទិញថ្នាំញៀន ទើបចូលអន្ទាក់សមត្ថកិច្ចតែម្តង ។
លោក សុខ សារិន អធិការស្រុកបវេលបានឱ្យដឹងទៀតថា ជនសង្ស័យទាំង២នាក់ ១-ឈ្មោះផល្លី វិ ហៅឆ្អឹង អាយុ២២ឆ្នាំ មានទីលំនៅក្នុងភូមិស្រណាល ឃុំព្រៃខ្ពស់ ស្រុកបវេល និង២-ឈ្មោះរត្ន័ ម៉ារ៉ាដូ ហៅប៉ូឡូ អាយុ៣៥ឆ្នាំ រស់នៅភូមិសាលាដែង ឃុំប្ញស្សីក្រោក ស្រុកមង្គលបូរី ខេត្តបន្ទាយមានជ័យ ដោយជននេះ ត្រូវកម្លាំងអធិការស្រុកបវេល កាក់ជាប់តាមដងផ្លូវ ខណៈនាំថ្នាំញៀនមកលក់ឱ្យជនសង្ស័យម្នាក់ទៀត ហើ់យបានឆែកឆេររកឃើញម្សៅក្រាមពណ៌.សមានសារធាតុញៀនជាច្រើនកញ្ចប់នៅជាប់ខ្លួនតែម្តង ។
លោកបន្តថា ជាមួយនឹងការឃាត់ខ្លួន ជនសង្ស័យឈ្មោះផល្លី វី គឺរឹបអូសបាននូវវត្ថុតាងជាច្រើន រួមមានម្សៅក្រាម ពណ).សថ្លាច្រកក្នុងថង់ចំនួន៤ថង់ ទម្ងន់១៤,៣៥ក្រាមទាំងសំបក, ថ្នាំគ្រាប់រាងមូលសំប៉ែត ពណ៌ផ្កាឈូកមានត្រាអក្សរ (WY) ចំនួន១៣៣គ្រាប់, ទូរស័ព្ទដៃ១គ្រឿង, ដាវសាមូរ៉ៃ១, កូនកន្ត្រៃ២, ដែកកេះ២, កាបូបដាក់ថ្នាំញៀន២, ប្រាក់ខ្មែរ៥ម៉ឺនរៀល, ម៉ូតូ១គ្រឿងមានស្លាក លេខបាត់ដំបង1AB-7804 ។ ដោយឡែក ជនសង្ស័យឈ្មោះរ័ត្ន ម៉ារ៉ាដូ ក៏បានរឹបអូសវត្ថុតាងដូចគ្នា គឺមានម្សៅក្រាមពណ៌.ថ្លា ច្រកថង់ប្លាស្ទិកចំនួន១៥ថង់ ទម្ងន់៥២,៤៦ក្រាមទាំងសំបក, ដែកកេះ១, កាបូប១ និងម៉ូតូមួយគ្រឿង មានស្លាកលេខប.មានជ័យ 1N-2717 ។
បច្ចុប្បន្ន ជនសង្ស័យទាំង២នាក់ កំពុងត្រូវបានឃាត់ខ្លួនសួរនាំនៅអធិការដ្ឋាននគរបាលស្រុកបវេល ដើម្បីកសាងសំណុំរឿងបញ្ចូនទៅការិយាល័យជំនាញនៃស្នងការខេត្តចាត់ការបន្ត ។
ចែករំលែកព័តមាននេះ