រាជធានីភ្នំពេញ ៖ បុរសម្នាក់ជិះម៉ូតូធុនធំមួយគ្រឿងគោលបំណងទៅមើលបងប្អូនឈឺនៅមន្ទីរពេទ្យព្រះកេតុមាលា លុះដល់មុខមន្ទីរពេទ្យត្រូវជនសង្ស័យមួយក្រុមមានគ្នា៦នាក់វាយប្លន់យកម៉ូតូមិនបានសម្រេច ហើយបានវាយម៉ូតូរងការខូចខាត ហេតុការណ៍នេះបានកើតឡើងកាលពីវេលាម៉ោង៣នឹង១៥នាទីទៀបភ្លឺថ្ងៃទី១០ ខែឧសភា ឆ្នាំ២០១៨ តាមបណ្តោយផ្លូវ៤៧ នៅចំណុចមុខមន្ទីរពេទ្យព្រះកេតុមាលា ស្ថិតនៅក្នុងសង្កាត់ស្រះចក ខណ្ឌដូនពេញ ។
ជនរងគ្រោះឈ្មោះនឿន រតនា ភេទប្រុស អាយុ៣៣ឆ្នាំ មុខរបរផ្នែកលក់អោយក្រុមហ៊ុនFaerd ស្នាក់នៅផ្លូវ៣១០ សង្កាត់បឹងកេង១ ខណ្ឌចំការមន ។
តាមប្រភពព័ត៌មានពីជនរងគ្រោះបានអោយដឹងថា មុនពេលកើតហេតុគាត់បានជិះម៉ូតូមួយគ្រឿងម៉ាកFS S ពណ៌ខ្មៅ ពាក់ស្លាកលេខកំពង់ស្ពឺ ១J-៨៣១៥ ចេញមកពីម្តុំសាលាហ្សាមេន គោលបំណងទៅមើលបងប្អូនឈឺនៅមន្ទីរពេទ្យព្រះកេតុមាលា ខណៈពេលមកដល់ចំណុចកើតហេតុខាងលើ ក៏ស្រាប់តែលេចមុខជនសង្ស័យមានគ្នាចំនួន៦នាក់ជិះម៉ូតូ២គ្រឿង ដោយមួយគ្រឿងម៉ាកហ្ស៊ុយស៊ុយគីឡេត ពណ៌ខ្មៅលាយស ពាក់ស្លាកលេខភ្នំពេញ១CX-៦១១៧ និងមួយគ្រឿងទៀតម៉ាកហ្ស៊ុយស៊ុយគីនិច មិនចាំពណ៌មិនចាំស្លាកលេខ បានជិះមកជិត រួចធ្វើសកម្មភាពយកដុំថ្ម និងខ្សែក្រវ៉ាត់វាយម៉ូតូរបស់គាត់ប៉ុនប៉ងប្លន់យកម៉ូតូ ភ្លាមៗនោះជនរងគ្រោះដកសោម៉ូតូ ហើយរត់ទៅអោយសន្តិសុខ និងយោធាយាមនៅមុខមន្ទីរពេទ្យព្រះកេតុមាលាជួយ ប៉ុន្តែគ្មាននរណាហ៊ានជួយឡើយ ហើយក្រុមជនសង្ស័យបានវាយម៉ូតូរបស់គាត់ រួចបានជិះម៉ូតូចេញទៅបានមួយស្ទុះ ក្រោយមកក៏បកត្រឡប់មកវិញវាយម្តងទៀត បណ្តាលឱ្យម៉ូតូជនរងគ្រោះរងការខូចខាត ។
ក្រោយពេលកើតហេតុជនរងគ្រោះបានទៅដាក់ពាក្យបណ្តឹងនៅប៉ុស្តិ៍ស្រះចកដើម្បីអោយសមត្ថកិច្ចស្រាវជ្រាវតាមចាប់ជនសង្ស័យមកផ្តន្ទាទោសទៅតាមផ្លូវច្បាប់ ៕
ចែករំលែកព័តមាននេះ