រាជធានីភ្នំពេញ ៖ កម្លាំងនគរបាលអន្តោប្រវេសន៍នៃក្រសួងមហាផ្ទៃ ដែលដឹកនាំដោយលោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តន៍នីតិវិធីបានចុះត្រួតពិនិត្យការស្នាក់នៅ និង បំពេញការរបស់ជនបរទេស នៅក្នុងខណ្ឌមានជ័យ និងខណ្ឌចំការមន ។ ប្រតិបត្តិការនេះដែរបានធ្វើឡើងកាលពីវេលាម៉ោង៩ និង៥នាទីព្រឹកថ្ងៃទី០៩ ខែឧសភា ឆ្នាំ២០១៨ នៅក្នុងសង្កាត់ចាក់អង្រែក្រោម ខណ្ឌមានជ័យ និងសង្កាត់ផ្សារដើមថ្កូវ ខណ្ឌចំការមន ។
លោកឧត្តមសេនីយ៍ឯក អ៊ុក ហៃសីឡា ប្រធាននាយកដ្ឋានស៊ើបអង្កេត និងអនុវត្តន៍នីតិវិធីបានប្រាប់ឱ្យដឹងថា ក្នុងព្រឹកនេះដែរ កម្លាំងរបស់លោកបានធ្វើការចុះត្រួតពិនិត្យការស្នាក់នៅ និងបំពេញការងារបស់ជនបរទេសចំនួន២ទីតាំងខុសពីគ្នា ។
ដោយមួយគោលដៅទី ១ – កម្លាំងរបស់លោកបានធ្វើឡើងនៅក្នុងរោងសិប្បកម្មក្រដាសមួយកន្លែង ដែលមានទីតាំងនៅ តាមបណ្តោយផ្លូវជាតិលេខ២ ក្នុងភូមិទួលរការ សង្កាត់ចាក់អង្រែក្រោម ខណ្ឌមានជ័យ ។ ដោយបានធ្វើការឃាត់ខ្លួនជនជាតិវៀតណាមចំនួន៤នាក់ (ស្រីម្នាក់) និងបុរសជនជាតិចិនចំនួន ម្នាក់ ដែលពួកគេបានលួចចូលមកស្នាក់នៅ និងធ្វើការងារដោយខុសច្បាប់ប្រើប្រាស់ឯកសារមិនត្រឹមត្រូវ ។
គោលដៅទី២-កម្លាំងរបស់លោកបានធ្វើឡើងនៅក្នុង រោងសិប្បកម្មកែច្នៃឈើមួយកន្លែង ដែលមានទីតាំងនៅតាមបណ្តោយផ្លូវលេខ៩៧ ភូមិ៤ សង្កាត់ផ្សារដើមថ្កូវ ខណ្ឌចំការមន ដោយបានធ្វើការឃាត់ខ្លួនបុរសជនជាតិវៀតណាមចំនួន៦នាក់ថែមទៀត ដែលពួកគេបានប្រព្រឹត្តធ្វើឡើងដូចទៅនឹងករណីគោលដៅទី១ដែរ សរុប១១នាក់ (ស្រីចំនួនម្នាក់) ។
ក្រោយពីកម្លាំងនគរបាលអន្តោប្រវេសន៍ចុះប្រតិបត្តិការត្រួតពិនិត្យការស្នាក់នៅ និងបំពេញការងាររបស់ជនបរទេស នៅក្នុងរោងសិប្បកម្មក្រដាស ក្នុងខណ្ឌមានជ័យ និងរោងសិប្បកម្មកែច្នៃឈើ នៅក្នុងខណ្ឌចំការមន ទាំង២គោលដៅរួចហើយ ក្រុមជនជាតិវៀតណាម និងជនជាតិចិនទាំង១១នាក់ (ស្រីម្នាក់) រួចហើយ ក៏បាននាំខ្លួនទៅកាន់អគ្គនាយកដ្ឋានអន្តោប្រវេសន៍ ដើម្បីចាត់ការទៅតាមនីតិវិធីច្បាប់ជាបន្តទៀត ៕
ចែករំលែកព័តមាននេះ