ខេត្តបាត់ដំបង ៖ ពិធីផ្ទេរ-ប្រគល់គ្រឿងចក្រ និងសម្ភារៈបោសសំអាតមីននៃគំរោងសមាហរណកម្មបោសសំអាតមីន និងសង្គ្រោះជនពិការដោយសារមីន ដំណាក់កាលទី៣ គាំទ្រថវិកាដោយប្រជាជន និងរដ្ឋាភិបាលជប៉ុន ក្រោមអធិបតីភាពលោកបណ្ឌិត ហ៊ុន ម៉ាណែត តំណាងសម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា លោក ហូរិនូឈិ ហិដេហិសា (H.E Mr.HorinOuchi HideHisa) ឯកអគ្គរដ្ឋទូតជប៉ុន ប្រចាំប្រទេសកម្ពុជា សេនានុព័ន្ធតំណាងស្ថានទូតថៃ លោកឧត្តមសេនីយ៍ទោ ឯក សំអូន មេបញ្ជាការស្តីទីយោធភូមិភាគទី៥ លោកងួន រតនះ អភិបាលខេត្តបាត់ដំបង លោក សួន បវរ អភិបាលខេត្តបន្ទាយមានជ័យ លោកផាន់ ចាន់ធុល អភិបាលខេត្តប៉ៃលិន ស្នងការ អាវុធហត្ថខេត្ត មន្ត្រីរាជការ ប្រជាពលរដ្ឋសរុបចំនួន១៨២០នាក់បានចូលរួមនៅវេលាព្រឹកថ្ងៃទី៨ ខែឧសភា ឆ្នាំ២០១៨ ស្ថិតនៅទីបញ្ជាដ្ឋានកងឯកភាពកំចាត់មីនភូមិភាគ២ ក្នុងសង្កាត់អូរចារ ក្រុង-ខេត្តបាត់ដំបង។
លោក ងួន រតនះ អភិបាលខេត្តបាត់ដំបងបានមានមតិស្វាគមន៍ និងរំលឹកពីតំបន់ដែលមានសង្គ្រាមរ៉ាំរ៉ៃច្រើនជាងគេគឺក្នុងខេត្តបាត់ដំបង ដែលបានបន្សល់ទុកមកជាច្រើននូវគ្រឿងយុទ្ធភ័ណ្ឌមិនទាន់ផ្ទុះដែលមានកប់នៅក្នុងដី ហើយជាច្រើនឆ្នាំកន្លងមកនេះក្រោមការរៀបចំពីសម្តេចតេជោដែលបានរៀបចំស្តារប្រទេសជាតិឡើងវិញដែលត្រូវការបំផុតអង្គភាពកំចាត់មីន(ស៊ីម៉ាក់) បានរំដោះដីចេញពីចំការមីន មកឲ្យប្រជាពលរដ្ឋបានធ្វើស្រែចំការបង្កបង្កើនផល ហើយក៏បានអំពាវនាវសូមមហាជន និងសិស្សានុសិស្ស យុវវ័យទាំងអស់ត្រូវស្គាល់យល់ដឹងពីស្លាកសញ្ញាគោរពទៅតាមការនែនាំពីស៊ីម៉ាក់អំពីទីកន្លែងដែលនៅមានហានិភ័យនៅមានគ្រាប់មិនទាន់ផ្ទុះ និងកន្លែងដែលមានសុវត្ថិភាពចៀសវាងការគ្រោះថ្នាក់ដែលតែងតែកើតមានមិនដាច់កន្លងមកនេះ។
បន្ទាប់មក លោកហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកមជ្ឈមណ្ឌលសកម្មភាពកំចាត់មីនកម្ពុជាបានថ្លែងថា ពេលនេះដំណាក់កាលទី៣ក្នុងការផ្ទេរ-ប្រគល់គ្រឿងចក្រកម្ទេចមីនធុនធ្ងន់ គ្រឿងបន្លាស់ និងតង់ស្នាក់នៅ នៃគំរោងសមាហរណកម្ម បោសសម្អាតមីន និងសង្គ្រោះជនពិការដោយសារមីន ដែលជាអំណោយសប្បុរសធម៌របស់រដ្ឋាភិបាល និងប្រជាជនជប៉ុនជូនដល់កម្ពុជាសម្រាប់គាំទ្រកិច្ចសហប្រតិបត្តិការបោសសម្អាតមីនរបស់មជ្ឈមណ្ឌលសកម្មភាពកំចាត់មីននៅកម្ពុជា ដែលមានគ្រឿងចក្រកម្ទេចមីនធុនធ្ងន់ចំនួន៥គ្រឿង គ្រឿងបន្លាស់គ្រឿងចក្រ និងតង់ស្នាក់នៅចំនួន៣៨តង់ ដែលសរុបជាទឹកប្រាក់ប្រមាណ៥,២លានដុល្លាអាមេរិក និងផ្តល់ជំនួយគាំទ្រគំរោងសមាហរណកម្មការបោសសម្អាតគ្រាប់មីន និងសង្គ្រោះជនពិការដោយសារមីនជូនរាជរដ្ឋភិបាលកម្ពុជា ផ្តល់ជូនស៊ីម៉ាក់មានថវិកាប្រមាណ១៧,៩លានដុល្លារ សម្រាប់រយៈពេល៣ឆ្នាំ(២០១៦-២០១៩)មានគោលដៅ៣សំខាន់គឺ ១-ធ្វើការបោសសម្អាតតំបន់ចំការមីនចំនួនជិត១ម៉ឺនហិកតា ២- ជួយសង្គ្រោះជនពិការដោយសារមីន និង៣- ទិញគ្រឿងចក្រកំទេចមីនធុនធ្ងន់ចំនួន៥គ្រឿង គ្រឿងបន្លាស់ តង់ស្នាក់នៅ៣៨តង់ ដោយត្រូវអនុវត្តន៍ក្នុងស្រុកតាមគោលដៅចំនួន៤ មានស្រុកសំឡូត សស្រុកបាណន់ ស្រុករតនមណ្ឌល និងស្រុកបវេលក្នុងខេត្តបាត់ដំបង ហើយបានផ្តល់ប្រយោជន៍ដល់ប្រជាពលរដ្ឋចំនួន៤៥ .២៦១គ្រួសារ។
បន្ទាប់មក លោក ហូរិនូឈិ ហិដេហិសា ឯកអគ្គរដ្ឋទូតជប៉ុន ប្រចាំប្រទេសកម្ពុជា បានបញ្ជាក់ថា ក្នុងនាមមនុស្សធម៌ រដ្ឋាភិបាល និងប្រជាជនជប៉ុន បានជំរុញការឧបត្ថម្ភបន្ថែមទៀតនៅពេលកម្ពុជាត្រូវការ ដើម្បីបោសសម្អាតគ្រាប់មីនដែលកើតមាននៅកម្ពុជាឲ្យមានប្រសិទ្ធិភាពបំផុត។
លោកបណ្ឌិត ហ៊ុន ម៉ាណែត បានថ្លែងថា រាជរដ្ឋាភិបាលកម្ពុជាបានកែប្រែពីដីចំការមីន ឲ្យក្លាយទៅជាដីធ្វើស្រែចំការដាំដំណាំដាំដុះដល់ប្រជាជនបានចំនួនរាប់ពាន់លានគីឡូម៉ែត្រក្រឡា ដែលជាចំណែកមួយបន្ថែមទៀតលើកស្ទួយវិស័យសេដ្ឋកិច្ចក្នុងប្រទេស និងមានភាពធូរធារផ្នែកជីវភាពមួយកម្រិតដល់ប្រជាជននៅតំបន់នេះ ហើយក៏ជាភ័ព្វសំណាងដែលកម្ពុជាបានរួចចាកផុតពីសង្គ្រាមប្រមាណជាង៣ទសវត្សដែលមានតែភាពរងគ្រោះកន្លងមក ៕
ចែករំលែកព័តមាននេះ