រាជធានីភ្នំពេញ ៖ រយៈពេល៤ខែដើមឆ្នាំ២០១៨ គ្រោះមហន្តរាយបានកើតឡើង ២២៨លើក សម្លាប់មនុស្ស៣៦នាក់ របួស៣៣នាក់ នេះបើយោងតាមរបាយការណ៍ គណៈកម្មាធិការគ្រប់គ្រងគ្រោះមហន្តរាយ (គ.ជ.គ.ម)បានឲ្យដឹង…
រាជធានីភ្នំពេញ ៖ រយៈពេល៤ខែដើមឆ្នាំ២០១៨ គ្រោះមហន្តរាយបានកើតឡើង ២២៨លើក សម្លាប់មនុស្ស៣៦នាក់ របួស៣៣នាក់ នេះបើយោងតាមរបាយការណ៍ គណៈកម្មាធិការគ្រប់គ្រងគ្រោះមហន្តរាយ (គ.ជ.គ.ម)បានឲ្យដឹង ។
របាយការណ៍បានបញ្ជាក់ថា អគ្គីភ័យ២២៨លើក បំផ្លាញផ្ទះ២៥០ខ្នង តូបលក់ដូរ ៨០៧តូប ឃ្លាំង១ សិប្បកម្ម៥អគារ រដ្ឋបាល៥អគារ និងស្ពានឈើ១ បណ្តាលឲ្យ មនុស្សស្លាប់១២នាក់ របួស១៣នាក់ ។ ខ្យល់កន្ត្រាក់កើតឡើង៥៣លើក ផ្ទះរលំ ១៨៩ខ្នង ផ្ទះរបើក៨០៨ខ្នង សាលារៀន១១ អគារ ផ្សេងៗ៥អគារ បណ្តាលឲ្យ មនុស្សស្លាប់២នាក់ របួស៨នាក់ ។
ករណីរន្ទះបាញ់កើតឡើង៣១លើក បណ្តាលឲ្យមនុស្សស្លាប់២២នាក់ របួស១២នាក់ សត្វ១២ក្បាល ។ ដោយឡែករាជធានីភ្នំពេញអគ្គិភ័យកើតឡើងចំនួន៣៩លើក បំផ្លាញផ្ទះ៥៤ខ្នង តូបលក់ដូរ៥៨៩តូប គ្មានអ្នកស្លាប់ របួស៣នាក់ ,ខ្យល់កន្ត្រាក់មួយ លើក របើកផ្ទះ៤៤ខ្នង ។
ខេត្តបន្ទាយមានជ័យអគ្គិភ័យកើតឡើង១៩លើក ខូចខាតផ្ទះ១៧ខ្នង ស្លាប់១នាក់ ខ្យល់កន្ត្រាក់កើតឡើង៨លើក ផ្ទះរលំ៣០ខ្នង ផ្ទះរបើក៩២ខ្នង សាលារៀន៣អគារ ករណីរន្ទះបាញ់២លើក ស្លាប់២នាក់ ។
ខេត្តបាត់ដំបងអគ្គិភ័យកើតឡើង១៨លើក ខូចខាតផ្ទះ១៥ខ្នង ខ្យល់កន្ត្រាក់ កើតឡើង ៨លើក ផ្ទះរលំ៣១ខ្នង របើក៧៧ខ្នង ករណីរន្ទះបាញ់កើតឡើង៦លើក ស្លាប់៦នាក់ របួស១នាក់ ។
ខេត្តកំពង់ធំអគ្គិភ័យកើតឡើង១៧លើក ខូចខាតផ្ទះ១៥ខ្នង របួស៥នាក់ ខ្យល់កន្ត្រាក់កើតឡើង២លើក រលំផ្ទះ៣ខ្នង ផ្ទះរបើក១២ខ្នង ករណីរន្ទះបាញ់កើតឡើង៣លើក ស្លាប់៣នាក់ ។
ខេត្តកណ្តាលអគ្គិភ័យកើតឡើង១៤លើក ខូចខាតផ្ទះ១៣ខ្នង ស្លាប់១នាក់ ។
ខេត្តស្វាយរៀងអគ្គិភ័យកើតឡើង១៤លើក ខូចខាតផ្ទះ១៤ខ្នង របួស៤នាក់ ។ ខ្យល់កន្ត្រាក់កើតឡើង៣លើក ផ្ទះរលំ២៥ខ្នង ផ្ទះរបើក៨១ខ្នង ស្លាប់១នាក់ របួស២នាក់ រន្ទះបាញ់២លើក ស្លាប់១នាក់ សត្វ២ក្បាល ។
ដោយឡែកចាប់ពីពាក់កណ្តាលខែមេសាមក ដោយសារឥទ្ធិពលសម្ពាធ ទាបបង្កឲ្យមាន ភ្លៀងធ្លាក់ពីមធ្យមទៅច្រើន ជាមួយ និងខ្យល់បក់បោកខ្លាំង ជាពិសេសបណ្តាខេត្តនៅតំបន់ទំនាបកណ្តាលភាគពាយ័ព្យ ។ ការប៉ះពាល់ និងខូចខាតដោយសារខ្យល់កន្ត្រាក់ក្នុងខែមេសាមាន ៖ កើតមានចំនួន៣៤លើក នៅរាជធានី-ខេត្តចំនួន១៨ ការខូចខាត ៖ ផ្ទះរលំធ្ងន់ធ្ងរ ៩១ ខ្នង, របើកដំបូល និងខូចខាតមធ្យម ៦៣១ខ្នង, របើកដំបូលសាលារៀន៣អគារ និងអគារផ្សេងៗ៣ អគារ , ប្រជាពលរដ្ឋរងគ្រោះស្លាប់១នាក់ និងរបួស៥នាក់ ការទទួលរងគ្រោះ ដោយរន្ទះបាញ់ ៖ ស្លាប់១១នាក់ របួស៨នាក់ ងាប់គោក្របី៩ក្បាល ។ ករណី អគ្គិភ័យការទទួលរងគ្រោះដោយអគ្គិភ័យក្នុងខែនេះកើតមានច្រើន ជាពិសេសក្នុងរយៈពេល ៣ថ្ងៃនៃថ្ងៃចូលឆ្នាំប្រពៃណីខ្មែរដែលការទទួលរងគ្រោះ មានរហូតដល់៩ករណី កើនឡើងលើសឆ្នាំកន្លងមក ដែលមានតែ៤ករណី (ទិន្នន័យរងគ្រោះមានក្នុងតារាងឧបសម្ព័ន្ធ) ។
គ្រោះថ្នាក់ចរាចរណ៍ ការផ្សព្វផ្សាយអប់រំ ដើម្បីលើកកម្ពស់សុវត្ថិភាពចរាចរណ៍របស់ផ្នែកជំនាញ និងសមត្ថកិច្ចត្រូវបានធ្វើជាប្រចាំនៅតាមសាលារៀន ភូមិឃុំ
ដើម្បីកាត់បន្ថយគ្រោះថ្នាក់ចរាចរណ៍ ដែលត្រូវបានអនុវត្តដោយផ្ទាល់ និងស្ពតអប់រំតាមប្រព័ន្ធផ្សព្វផ្សាយទាំងរដ្ឋ និងឯកជនផង ក្នុងគោលបំណងពន្យល់ និងបង្ហាញអំពីការប្រើប្រាស់ផ្លូវ និងឥរិយាបថខុស ឆ្គងក្នុងការធ្វើ ដំណើរ តាមដងផ្លូវដែលនាំឲ្យមានគ្រោះថ្នាក់ ជាពិសេសក្នុងពេលមានបុណ្យទានធំ ដូចជា ពេលចូលឆ្នាំជាដើម ។ ក្នុងរយៈពេល ៣ថ្ងៃចូលឆ្នាំប្រពៃណីជាតិខ្មែរ គ្រោះថ្នាក់ចរាចរណ៍កើតមាន ៥៥លើក បណ្តាលឲ្យស្លាប់ ២៦នាក់ និងរបួសធ្ងន់ស្រាល ៨១ នាក់ ដែលជាករណីថយចុះគួរកត់សម្គាល់ បើធៀបទៅនឹងរយៈពេលដូចគ្នាកាលពីឆ្នាំទៅ ។
គ្រោះថ្នាក់ចរាចរណ៍ទូទាំងប្រទេសក្នុងខែមេសា ឆ្នាំ២០១៨ កើតឡើង ៣១៦លើក ស្លាប់មនុស្សចំនួន ១៧៧ នាក់ រងរបួសសរុបចំនួន ៤៧៤ នាក់ ៕
ចែករំលែកព័តមាននេះ