ប្រទេសកូរ៉េទាំង២ ៖ ការជួបគ្នាកំពូល កាលពីថ្ងៃទី២៧ មេសា រវាងមេដឹកនាំកូរ៉េទាំង២ ទោះបីជានិមិត្តរូប តែនឹងមានឥទ្ធិពល។ ពេលជួបគ្នាកំពូលអន្តរកូរ៉េនេះនៅភូមិប៉ានមុនហ្សូម ប្រធានាធិបតីកូរ៉េខាងត្បូងលោក MOON JAE IN និងមេដឹកនាំកូរ៉េខាងជើង លោកគីម ជុងអ៊ុន បានដើរឆ្លងកាត់តំបន់ហាមមិនឲ្យមានកងទ័ព ជាសញ្ញានៃនៃការខិតចូលជិតគ្នារវាងរដ្ឋទាំង២ ដែលមានគម្រោងបំផ្លាញនុយក្លេអ៊ែរនៅឧបទ្វីបកូរ៉េ។
យោងតាមការស្ទាបស្ទង់មតិនានា បង្ហាញថា អ្វីៗមានការផ្លាស់ប្ដូរច្រើនចាប់តាំងពីមេដឹកនាំកូរ៉េទាំង២មកជួបគ្នានៅតំបន់ហាមមិនឲ្យមានកងទ័ព ដែលពុះចែកកូរ៉េទាំង២។
ប្រជាជនកូរ៉ខាងត្បូងដល់ទៅ៧៨% ពេលនេះមានទំនុកចិត្តចំពោះមេដឹកនាំកូរ៉េខាងជើង។ កាលពីមិនដល់១ខែកន្លះមុននេះ ក្នុងការស្ទាបស្ទង់មតិមួយរបស់ GALLUP KOREA ទំនុកចិត្តរបស់ពលរដ្ឋកូរ៉េខាងត្បូង ចំពោះលោក គីមជុងអ៊ុន មានត្រឹមតែ១០%ប៉ុណ្ណោះ។
ចំណែកលោក MOON JAE IN វិញ ក្នុងការស្ទាបស្ទង់មតិតាមទូរស័ព្ទមួយលើមនុស្ស១០២៣នាក់ ប៉ុន្មានថ្ងៃក្រោយការជួបគ្នានៅប៉ានមុនហ្សូម ៨៦% សម្ដែងការគាំទ្រលោក។ នេះជាប្រជាប្រិយភាពខ្ពស់បំផុតមួយជាប្រវត្តិសាស្ត្រ សម្រាប់ប្រធានាធិបតីកូរ៉េខាងត្បូង១រូប។
ការផ្លាស់ប្ដូរពិតជាមានទំហំធំសម្រាប់លោកគីម ជុងអ៊ុន ដែលរហូតរៀងមកមានរូបភាពជាសត្រូវដ៏គ្រោះថ្នាក់មួយ ក្រោយរយៈពេលជាង១ឆ្នាំនៃការបង្កើនការគំរាមកំហែង នុយក្លេអ៊ែរ ជាពិសេសចំពោះសហរដ្ឋអាមេរិក និងលោកដូ ណាល់ត្រាំ។
តាមការស្ទាបស្ទង់មតិរបស់ MBC ថា ៨៩% នៃប្រជាជនកូរ៉េខាងត្បូង ដែលគេសាកសួរចាត់ទុកការជួបគ្នាកំពូលអន្តរកូរ៉េថា ជាជោគជ័យមួយ ហើយ៣០% រង់ចាំផ្ដល់យោបល់ក្រោយការជួបគ្នាកំពូលរវាងសហរដ្ឋអាមេរិក និងកូរ៉េខាងជើង ថា តើពិតជាទទួលបានជ័យជម្នះប្រាកដឬយ៉ាងណា? ហើយ៥០%យល់ថា ការជួបគ្នានេះពិតជាទទួលបានផ្លែផ្កា៕
ចែករំលែកព័តមាននេះ