ខេត្តកំពង់ស្ពឺ ៖ យ៉ាងហោចណាស់ផ្ទះឈើ៣ខ្នងបានរងការខូចខាតដោយសារភ្លៀងលាយឡំដោយខ្យល់កន្ក្រាក់តែក្នុងហេតុការណ៍នោះមិនបណ្តាលឱ្យរងគ្រោះថ្នាក់ដល់អាយុជីវិតមនុស្សសត្វឡើយ ។ ហេតុការណ៍នេះកើតឡើងកាលពីវេលាម៉ោង០៦និង៥នាទីយប់ ថ្ងៃទី៧ ខែឧសភា ឆ្នាំ២០១៨ នៅចំណុចច្រកឫស្សី ស្ថិតក្នុងភូមិអូរអង្គំ ឃុំអមលាំង ស្រុកថ្ពង ខេត្តកំពង់ស្ពឺ ។
ប្រភពពីសមត្ថកិច្ចបានឱ្យដឹងថា តាមការសាកសួរពីប្រជាពលរដ្ឋគឺមុនពេលកើតហេតុមានខ្យល់បោកបក់យ៉ាងខ្លាំងស្រាប់តែភ្លៀងបានបង្អុរចុះមកហើយបណ្តាលឱ្យប៉ើកដំបូលស័ង្កសីចំនួន៣ខ្នងមានម្ចាស់ផ្ទះរងគ្រោះទី១-ឈ្មោះ រុន សាវ៉េត ភេទប្រុស អាយុ២៨ឆ្នាំ ប៉ើងខាងមុខទាំងស្រុង អស់ស័ង្កសីចំនួន១០សន្លឹក, ទី២-ឈ្មោះ ទុយ រីម ភេទប្រុស អាយុ៣៤ឆ្នាំ ប៉ើងដំបូលពីក្រោយទាំងស្រុងអស់ស័ង្កសីចំនួន១០សន្លឹក និងទី៣-ឈ្មោះ សាន សៅថេង ភេទប្រុស អាយុ៣០ឆ្នាំ ប៉ើងអស់ស័ង្កសីអស់៣សន្លឹក ។ ករណីខាងលើមិនមានបង្កប៉ះពាល់ដល់ជីវិតមនុស្សឬសត្វទេ ៕
ចែករំលែកព័តមាននេះ