ថៃ ៖ តាមប្រភពព័ត៌មាន Metro បានឲ្យដឹងថា បុរសជនជាតិអង់គ្លេសដែលជាប្តី បានសារភាពថា ខ្លួនពិតជាបានធាក់ប្រពន្ធចំច្រើនកន្លែង ដែលបណ្តាលឲ្យនាងស្លាប់ ក្រោមហេតុផលថានាងមិនព្រមរួមភេទនៅពេលយប់កើតហេតុ។
វិស្វករមេកានិច Kevin Smitham អាយុ៥១ឆ្នាំ បានសារភាពប្រាប់ប៉ូលិសថា ខ្លួនពិតជាបានធាក់ប្រពន្ធជាជនជាតិថៃ Kanda អាយុ២៩ឆ្នាំ នៅលើមុខ និងលើដងខ្លួនទាំងមូល។ រឿងរ៉ាវនេះកើតឡើងនៅ Ubon Ratchathani នាយប់ថ្ងៃអាទិត្យ ដែលជាថ្ងៃសង្ក្រាន្តនៅប្រទេសថៃ។
នាយប៉ូលិសស៊ើបអង្កេត Watcharapol Pimwong បានមានប្រសាសន៍ថា៖ «ខ្ញុំបានមកដល់ហើយ ឃើញស្ត្រីម្នាក់ ដែលជានាង Kanda Smitham ដេកស្លាប់នៅមុខផ្ទះទាំងគ្មានស្លៀកអ្វីសោះ។ ខ្លួនប្រាណរបស់នាងមានគ្របភួយពីលើ ហើយមានស្នាមជាំនៅនឹងមុខ និងខ្លួន។ នាងបានស្លាប់រយៈពេលជាច្រើនម៉ោងដែរហើយ»។
នាយ Pimwong បានប្រាប់ពីសេចក្តីលម្អិតថា៖ «នេះមកពីប្តីរបស់នាងបានធាក់នាងជាច្រើនជើង ដែលធ្វើឲ្យនាងរត់មកដេកក្រៅផ្ទះ។ ប្តីរបស់នាងមិនដឹងសោះឡើយថា ប្រពន្ធស្លាប់បែបនេះ ទើបរូបគេបានយកភួយមកដណ្តប់ឲ្យប្រពន្ធដោយគិតថា កុំឲ្យមូសខាំ ស្រាប់តែព្រឹកឡើងក៏ក្លាយទៅជាសាកសព។ មូលហេតុនៃការធាក់នេះ គឺមកពីនាងជាប្រពន្ធប្រកែកមិនរួមភេទនាយប់នោះ។ បុរសជាប្តីខឹងខ្លាំងពេក ក៏កើតទៅជាអំពើហិង្សារហូតដល់មានអ្នកស្លាប់បែបនេះ»។
នាពេលនេះ ប៉ូលិសកំពុងធ្វើការស្រាវជ្រាវពីមូលហេតុនៃការស្លាប់របស់នាងឲ្យបានកាន់តែជាក់លាក់ ខណៈដែលបុរសជាប្តីកំពុងតែជាប់ក្នុងដៃប៉ូលិស៕
ចែករំលែកព័តមាននេះ