រាជធានីភ្នំពេញ ៖ បន្ទាប់ពីគម្រោងអភិវឌ្ឍន៍អចលនទ្រព្យធំៗបានចាប់ផ្តើមបែរឆ្ពោះទៅតំបន់ច្បារអំពៅ ជាពិសេសតាមបណ្ដោយផ្លូវជាតិលេខ១ វិនិយោគិនក្នុងវិស័យនេះបានសម្លឹងមើលការវិនិយោគរបស់ខ្លួន និងត្រៀមអភិវឌ្ឍន៍តំបន់នោះឲ្យកាន់តែប្រសើរ ជាពិសេសវិស័យលំនៅឋាន ។ ជាការកត់សម្គាល់ តំបន់ច្បារអំពៅតាមបណ្ដោយផ្លូវជាតិលេខ១…
រាជធានីភ្នំពេញ ៖ បន្ទាប់ពីគម្រោងអភិវឌ្ឍន៍អចលនទ្រព្យធំៗបានចាប់ផ្តើមបែរឆ្ពោះទៅតំបន់ច្បារអំពៅ ជាពិសេសតាមបណ្ដោយផ្លូវជាតិលេខ១ វិនិយោគិនក្នុងវិស័យនេះបានសម្លឹងមើលការវិនិយោគរបស់ខ្លួន និងត្រៀមអភិវឌ្ឍន៍តំបន់នោះឲ្យកាន់តែប្រសើរ ជាពិសេសវិស័យលំនៅឋាន ។ ជាការកត់សម្គាល់ តំបន់ច្បារអំពៅតាមបណ្ដោយផ្លូវជាតិលេខ១ បានក្លាយជាតំបន់លំនៅឋានដ៏មានសក្ដានុពលមួយនៅជាយរាជធានីភ្នំពេញ បន្ទាប់ពីផ្លូវជាតិលេខ១បានស្ថាបនារួចរាល់ និងងាយស្រួលធ្វើដំណើរ ជាពិសេសនោះ វាជាតំបន់នៅជាប់ទន្លេ ដែលងាយស្រួលក្នុងការរំដោះទឹកជំនន់ ។
លោក ប៉ូ អ៊ាវគង់ នាយកប្រតិបត្តិក្រុមហ៊ុនអចលនទ្រព្យ Advance បានឲ្យដឹងថា តំបន់តាមបណ្ដោយផ្លូវជាតិលេខ១ ចាប់ពីគល់ស្ពានច្បារអំពៅដល់តំបន់វាលស្បូវ កំពុងមានសក្ដានុពលវិនិយោគខ្ពស់លើវិស័យលំនៅឋាន ។ ជាក់ស្ដែងបច្ចុប្បន្ននេះ គេឃើញមានគម្រោងធំៗមួយចំនួនបានលេចរូបរាងឡើង និងគម្រោងធំៗមួយចំនួនទៀត ក៏បានប្រកាសដំណើរការផងដែរ ។
លោកថា ៖« ដូចយើងឃើញស្រាប់ហើយ តាមបណ្ដោយផ្លូវជាតិលេខ១ គម្រោងបុរីលំនៅឋានដែលមានផ្ទះរាប់ពាន់ល្វែង និងមានមនុស្សជាច្រើនបានផ្លាស់ទៅរស់នៅតំបន់នោះ ។ ម្យ៉ាងទៀត យើងក៏ឃើញថា អាជីវកម្មធំៗមួយចំនួនរួមទាំងធនាគារ សាលារៀន មន្ទីរពេទ្យ ក៏បានងាកទៅវិនិយោគក្នុងតំបន់នោះផងដែរ » ។
លោកបន្តថា ថ្មីៗនេះ គម្រោងផ្ទះវីឡា The Palm ក៏បានប្រកាសសាងសង់ជាផ្លូវការនៅក្នុងតំបន់ជាប់ផ្លូវជាតិលេខ១នេះ ដែលវានឹងធ្វើឲ្យតំបន់នោះកាន់តែមានសក្ដានុពល និងតម្លៃខ្ពស់ទៅលើដីធ្លី ព្រមទាំងទាក់ទាញវិនិយោគិនដទៃទៀតមកវិនិយោគក្នុងតំបន់នោះ ។
លោកនិយាយថា ៖« បើនិយាយពីតម្លៃដីធ្លីនៅក្នុងតំបន់ច្បារអំពៅ ផ្លូវជាតិលេខ១វិញឃើញថា បានកើនឡើងខ្ពស់គួរឲ្យកត់សម្គាល់ ជាពិសេសចាប់តាំងពីផ្លូវជាតិលេខ១ បានស្ថាបនារួចរាល់ជាថ្មី » ។
លោកបញ្ជាក់ថា ការអភិវឌ្ឍវិស័យអចលនវត្ថុនៅក្នុងរាជធានីភ្នំពេញ នាពេលបច្ចុប្បន្ននេះ មានស្ទើរតែគ្រប់តំបន់ មិនមែនតែតំបន់ផ្លូវជាតិលេខ១នោះទេ ពោលគឺគ្រប់ទិសទាំងអស់មានសកម្មភាពដូចគ្នា ក៏ប៉ុន្តែគ្រាន់តែតំបន់ខ្លះមានសកម្មភាពខ្លាំងជាងគ្នាបន្តិចបន្តួចប៉ុណ្ណោះ ។
លោក ជា សុផារ៉ា រដ្ឋមន្ត្រីក្រសួងដែនដីនគរូបនីយកម្ម និងសំណង់ បានលើកឡើងផងដែរថា កាលពី១០ទៅ២០ឆ្នាំមុន វាលស្បូវជាតំបន់ដែលមិនមានអ្នកណាចាប់អារម្មណ៍ឡើយ ហើយកាលនោះ តម្លៃដីធ្លីមិនដល់១ដុល្លារអាមេរិកផងក្នុង១ម៉ែត្រការ៉េ តែពេលបច្ចុប្បន្ននេះ តម្លៃដីធ្លីបានកើនឡើងរហូតដល់ជិត១ពាន់ដុល្លារអាមេរិកក្នុង១ម៉ែត្រការ៉េ ដូចនេះ វាបានកើនឡើងហួសពីការស្មាន ។
លោកបន្តថា ការអភិវឌ្ឍបន្តបន្ទាប់ទៅលើវិស័យលំនៅឋាននៅរាជធានីភ្នំពេញ បាននិងកំពុងឆ្លើយតបទៅនឹងតម្រូវការដែលបានកើនឡើងជាបន្តបន្ទាប់ ទាំងលំនៅឋានតម្លៃខ្ពស់ និងលំនៅឋានតម្លៃសមរម្យសម្រាប់អ្នកមានចំណូលទាប និងមធ្យម ក៏ដូចជាមន្ត្រីរាជការ ជាដើម ៕
ចែករំលែកព័តមាននេះ